ಕಬ್ಬು ಬೆಳೆಗೆ ದರ ನಿಗದಿಪಡಿಸಲು ಆಗ್ರಹ

ಬೆಂಗಳೂರು: ರಾಜ್ಯ ಕಬ್ಬು ಬೆಳೆಗಾರರ ಬಾಕಿ ಹಣ ಪಾವತಿಸುವುದರ ಜತೆಗೆ ರಾಜ್ಯ ಸರಕಾರ ಇನ್ನೊಂದು ವಾರದೊಳಗೆ ಕಬ್ಬು ಬೆಳೆಗಾರರ ಬೆಳೆಗೆ ಸೂಕ್ತ ದರ ನಿಗದಿಪಡಿಸಬೇಕು ಎಂದು ಅಖಿಲ ಕರ್ನಾಟಕ ಕಬ್ಬು ಬೆಳೆಗಾರರ ಸಂಘ ಆಗ್ರಹಿಸಿದೆ.

''ಕಬ್ಬು ಬೆಳೆಗೆ 2013-14ರಿಂದ ಈವರೆಗೂ ಕೇಂದ್ರ ಪ್ರೋತಾಹ ಧನ (ಎಫ್‌ಆರ್‌ಪಿ) ಹಾಗೂ ರಾಜ್ಯ ಸಲಹಾ ದರ (ಎಸ್‌ಎಪಿ) ನಿಗದಿ ಮಾಡುವಲ್ಲಿ ಸರಕಾರ ವಿಫಲವಾಗಿದೆ. ಈ ಕುರಿತು ಸರಕಾರ ಶೀಘ್ರವೇ ಕ್ರಮ ಕೈಗೊಳ್ಳದಿದ್ದರೆ ಸಕ್ಕರೆ ಕಾರ್ಖಾನೆಗಳಿಗೆ ಬೀಗ ಜಡಿದು ಚಳವಳಿ ನಡೆಸಲಾಗುವುದು,'' ಎಂದು ಸಂಘದ ರಾಜ್ಯಾಧ್ಯಕ್ಷ ಶಿವಾನಂದ ಗುರುಮಠ ಪತ್ರಿಕಾಗೋಷ್ಠಿಯಲ್ಲಿ ಬುಧವಾರ ಎಚ್ಚರಿಸಿದರು.

''ರಾಜ್ಯದಲ್ಲಿ ಶೇ. 80ರಷ್ಟು ರಾಜಕಾರಣಿಗಳು ಸಕ್ಕರೆ ಕಾರ್ಖಾನೆಗಳ ಮಾಲೀಕರಾಗಿರುವುದರಿಂದ ಸರಕಾರವನ್ನು ತಮ್ಮ ಹಿಡಿತದಲ್ಲಿಟ್ಟುಕೊಂಡಿದ್ದಾರೆ. ಹೀಗಾಗಿಯೇ ರೈತರು ಎಷ್ಟೆಲ್ಲಾ ಹೋರಾಟ ಮಾಡಿದರೂ ಯಾವುದೇ ಪ್ರಯೋಜನವಾಗುತ್ತಿಲ್ಲ,''ಎಂದರು.

''ರಾಜ್ಯದ ಸಂಪತ್ತನ್ನು ಹೀಗೆ ಮಾರಾಟ ಮಾಡುವ ಮೂಲಕ ರಾಜಕಾರಣಿಗಳು ಮುಂದೊಂದು ದಿನ ರೈತರನ್ನು ಜೀತದಾಳುಗಳಾಗಿ ಮಾಡಲಿದ್ದಾರೆ,'' ಎಂದು ಹೇಳಿದರು.