SSLC Supplementary Result Date: ವಾರದಲ್ಲಿ ಎಸ್ಸೆಸ್ಸೆಲ್ಸಿ ಪೂರಕ ಪರೀಕ್ಷೆ ಫಲಿತಾಂಶ

ಬೆಂಗಳೂರು: ಎಸ್ಸೆಸ್ಸೆಲ್ಸಿ ಪೂರಕ ಪರೀಕ್ಷೆಯ ಮೌಲ್ಯಮಾಪನ ಬಹುತೇಕ ಪೂರ್ಣಗೊಂಡಿದ್ದು, ಮುಂದಿನ ವಾರ ಫಲಿತಾಂಶ ಪ್ರಕಟಿಸಲು ಪ್ರೌಢಶಿಕ್ಷಣ ಪರೀಕ್ಷಾ ಮಂಡಳಿ ಕ್ರಮ ಕೈಗೊಂಡಿದೆ.

ಉತ್ತರ ಪತ್ರಿಕೆಗಳ ಅಂಕ ಎಣಿಕೆಯಲ್ಲಿ ಮೌಲ್ಯಮಾಪಕರು ಎಸಗುತ್ತಿದ್ದ ಲೋಪ ತಡೆಯುವ ನಿಟ್ಟಿನಲ್ಲಿ ಇದೇ ಮೊದಲ ಬಾರಿಗೆ ಮೌಲ್ಯಮಾಪನ ಕೇಂದ್ರದಿಂದಲೇ ಅಂಕಗಳನ್ನು ಆನ್‌ಲೈನ್‌ ಮೂಲಕ ಅಪ್‌ಡೇಟ್‌ ಮಾಡುವ ಕಾರ್ಯವನ್ನು ಮಂಡಳಿ ಯಶಸ್ವಿಯಾಗಿದೆ ನಿರ್ವಹಿಸಿದೆ.

ಎಲ್ಲಾ ವಿಷಯಗಳು ಸೇರಿದಂತೆ ಒಟ್ಟು 5,92,622 ಉತ್ತರ ಪ್ರತಿಕೆಗಳು ಮೌಲ್ಯಮಾಪನಕ್ಕೆ ಪರೀಕ್ಷಾ ಮಂಡಳಿಗೆ ಬಂದಿದ್ದವು. ಇದರಲ್ಲಿ ಒಟ್ಟು 5.38 ಲಕ್ಷ ಉತ್ತರ ಪತ್ರಿಕೆಗಳು ಮೌಲ್ಯಮಾಪನಗೊಂಡಿದ್ದು, ಒಟ್ಟು 5.08 ಲಕ್ಷ ಉತ್ತರ ಪತ್ರಿಕೆಗಳ ಅಂಕಗಳನ್ನು ಆನ್‌ಲೈನ್‌ ಮೂಲಕ ಅಪ್‌ಡೇಟ್‌ ಮಾಡಲಾಗಿದೆ.

ಈ ಬಗ್ಗೆ 'ವಿಕ'ದೊಂದಿಗೆ ಮಾತನಾಡಿದ ಮಂಡಳಿ ನಿರ್ದೇಶಕಿ ವಿ.ಸುಮಂಗಲಾ, ''ಬಹುತೇಕ ಉತ್ತರ ಪತ್ರಿಕೆಗಳ ಮೌಲ್ಯಮಾಪನ ಪೂರ್ಣಗೊಂಡಿದ್ದು, ಆನ್‌ಲೈನ್‌ ಮೂಲಕ ಅಂಕಗಳನ್ನು ಅಪ್‌ಡೇಟ್‌ ಮಾಡುವ ಕಾರ್ಯವನ್ನು ಯಶಸ್ವಿಯಾಗಿ ನಿರ್ವಹಿಸಿದ್ದೇವೆ. ಭಾನುವಾರದ ಒಳಗೆ ಮೌಲ್ಯಮಾಪನದ ಎಲ್ಲಾ ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸಿ, ಮುಂದಿನ ವಾರ ಫಲಿತಾಂಶ ಪ್ರಕಟ ಮಾಡಲಾಗುವುದು. ಮೌಲ್ಯಮಾಪನ ಕೇಂದ್ರಗಳಿಂದಲೇ ಅಂಕಗಳನ್ನು ಅಪ್‌ಡೇಟ್‌ ಮಾಡುವ ವ್ಯವಸ್ಥೆಯಿಂದಾಗಿ ಮಂಡಳಿಗೆ ಲಕ್ಷಾಂತರ ರೂ. ಹಣ ಉಳಿತಾಯವಾಗಿದೆ. ಮುಂದಿನ ವರ್ಷ ಎಲ್ಲಾ ಮೌಲ್ಯಮಾಪನ ಕೇಂದ್ರಗಳಲ್ಲೂ ಈ ವ್ಯವಸ್ಥೆ ಜಾರಿಗೆ ತರಲಾಗುವುದು,'' ಎಂದು ತಿಳಿಸಿದರು.