Viral Video: ಕೈಲಾಸದಲ್ಲಿ ಹೆರಿಗೆಯಾದ್ರೆ ಮಗುವಿಗೆ ಅಲೌಕಿಕ ಶಕ್ತಿಯ ಡಿಎನ್ಎ ಅಳವಡಿಕೆ: ಜಗತ್ತಿನ ಮಹಿಳೆಯರಿಗೆ ನಿತ್ಯಾನಂದನ ಆಫರ್!

ಬೆಂಗಳೂರು: ದೇಶ ಬಿಟ್ಟು ಪರಾರಿಯಾಗಿ ದೂರದಲ್ಲೆಲ್ಲೋ ‘ಕೈಲಾಸ’ ಎಂಬ ಪ್ರತ್ಯೇಕ ರಾಷ್ಟ್ರವನ್ನು ಕಟ್ಟಿಕೊಂಡು, ತನ್ನದೇ ಪ್ರತ್ಯೇಕ ರಾಷ್ಟ್ರಧ್ವಜ, ಕರೆನ್ಸಿ, ಪಾಸ್ ಪೋರ್ಟ್ ವ್ಯವಸ್ಥೆ ಇತ್ಯಾದಿಗಳನ್ನು ಸೃಷ್ಟಿಸಿಕೊಂಡಿರುವ ಬಿಡದಿ ಸ್ವಾಮಿ ನಿತ್ಯಾನಂದ, ಈಗ ವಿಶ್ವದ ಎಲ್ಲಾ ಗರ್ಭಿಣಿ ಮಹಿಳೆಯರಿಗೆ ಹೆರಿಗೆಗೆ ತನ್ನ ದೇಶಕ್ಕೆ ಬರುವಂತೆ ಸಲಹೆ ನೀಡಿದ್ದಾನೆ.

ಕೈಲಾಸದಲ್ಲಿ ಹೆರಿಗೆಯಾಗುವ ಪ್ರತಿ ಮಗುವಿಗೆ, ಪ್ರಬುದ್ಧವಾದಂಥ ಅಲೌಕಿಕವಾದ ಪ್ರಕಾಶಮಾನವಾದ ಶಕ್ತಿಯುಳ್ಳ (enlightened supernal effulgence) ಡಿಎನ್ಎ ದಯಪಾಲಿಸುವುದಾಗಿ ಆತ ಹೇಳಿದ್ದಾನೆ. ಇದೂ ಸೇರಿದಂತೆ ಕೈಲಾಸದಲ್ಲಿ ಪ್ರಸವವಾದರೆ ಏನೇನು ಪ್ರಯೋಜನೆ ಎಂಬುದರ ಬಗ್ಗೆ ಪ್ರತ್ಯೇಕ ವಿಡಿಯೋವೊಂದನ್ನು ಮಾಡಿ ಆತ ಹರಿಬಿಟ್ಟಿದ್ದಾನೆ. ವಿಡಿಯೋ ಅಂತರ್ಜಾಲದಲ್ಲಿ ವೈರಲ್ ಆಗಿದೆ.

'ನಿತ್ಯಾನಂದ ಜೊತೆ ಮದುವೆ ಆಗುವೆ..' ಎಂದಿದ್ದ ಪ್ರಿಯಾ ಆನಂದ್; ಕೊನೆಗೂ ಸ್ಪಷ್ಟನೆ ನೀಡಿದ 'ಜೇಮ್ಸ್' ನಟಿ!
ವಿಡಿಯೋದಲ್ಲಿ ಆತ ನೀಡುವ ಸಲಹೆಯೇನು?

ವಿಡಿಯೋದ ತುಣುಕಿನ ಆರಂಭದಲ್ಲಿ ಆತ, ಕೈಲಾಸದಲ್ಲಿ ಸದ್ಯದಲ್ಲೇ ಇಡೀ ಬ್ರಹ್ಮಾಂಡಕ್ಕಾಗಿಯೇ ಮೀಸಲಾಗಿರುವ ಪರ್ಮನೆಂಟ್ ಕಾಸ್ಮಿಕ್ ಏರ್ ಪೋರ್ಟ್ ಹಾಗೂ ಹೆರಿಗೆ ಆಸ್ಪತ್ರೆಯನ್ನು ಸದ್ಯದಲ್ಲೇ ನಿರ್ಮಿಸಲಾಗುತ್ತದೆ. ಇಲ್ಲಿ ಹೆರಿಗೆಯಾಗುವ ಪ್ರತಿ ಮಗುವಿಗೂ ಪ್ರಬುದ್ಧವಾದಂಥ ಅಲೌಕಿಕವಾದ ಪ್ರಕಾಶಮಾನವಾದ ಶಕ್ತಿಯುಳ್ಳ ಡಿಎನ್ಎ ಅಳವಡಿಸಲಾಗುತ್ತದೆ. ಜೊತೆಗೆ, ಬ್ರಹ್ಮಜ್ಞಾನವುಳ್ಳ ಅನುವಂಶೀಯ ಕೋಡ್ ಅನ್ನು ನೀಡಲಾಗುತ್ತದೆ.

ಹಾಗಾಗಿ, ನೀವು ಎಲ್ಲೇ ಇರಿ, ಯಾವ ದೇಶದಲ್ಲೇ ಇರಿ ಅಲ್ಲೇ ಗರ್ಭಿಣಿಯಾಗಿರಿ. ಆದರೆ, ನೀವು ಪ್ರಸೂತಿಗಾಗಿ ನೀವು ಕೈಲಾಸವನ್ನು ಆಯ್ಕೆ ಮಾಡಿಕೊಳ್ಳಿ. ಅದರಿಂದ ನಿಮಗೆ ಮೇಲೆ ಹೇಳಲಾಗಿರುವ ಪ್ರಯೋಜನಗಳು ಸಿಗುತ್ತವೆ ಎಂದು ಹೇಳಿದ್ದಾನೆ.