ಬೆಂಗಳೂರು: ರಾಜ್ಯದಲ್ಲಿ ಕೋವಿಡ್‌-19 ರೋಗಿಗಳಿಗೆ ಮತ್ತು ಸೋಂಕಿತರಿಗೆ ಅಗತ್ಯ ಔಷಧಗಳನ್ನು ಪೂರೈಸಲು ಯಾವುದೇ ಅಡೆತಡೆ ಇಲ್ಲದಂತೆ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಹೈಕೋರ್ಟ್‌ ಆರೋಗ್ಯ ಇಲಾಖೆಗೆ ನಿರ್ದೇಶನ ನೀಡಿದೆ.

ಸಾರ್ವಜನಿಕರೊಬ್ಬರು ಅರ್ಜಿ ಹೂಡಿ ಹೈಡ್ರಾಕ್ಸಿಕ್ಲೋರೋಕ್ವಿನ್‌ (ಎಚ್‌‍ಸಿಕ್ಯೂಎಸ್‌), ಅಲ್ಟ್ರಾಸೆಟ್‌ ಮತ್ತು ಪ್ಯಾನ್‌ ಮಾತ್ರೆಗಳು ಔಷಧಿ ಅಂಗಡಿಗಳು ಹಾಗೂ ಫಾರ್ಮಾಸೆಟಿಕಲ್‌ ಸೆಂಟರ್‌‍ಗಳಲ್ಲಿ ಸಿಗುತ್ತಿಲ್ಲ ಎಂದು ದೂರಿದ್ದರು. ಆ ಬಗ್ಗೆ ವಿಚಾರಣೆ ನಡೆಸಿದ ಮುಖ್ಯ ನ್ಯಾಯಮೂರ್ತಿ ಎ.ಎಸ್‌. ಓಕಾ‌ ಹಾಗೂ ನ್ಯಾ. ವಿ. ಶ್ರೀಶಾನಂದ ಅವರಿದ್ದ ವಿಭಾಗೀಯ ಪೀಠ ಈ ಆದೇಶ ನೀಡಿದೆ.

"ಈಗಾಗಲೇ ಕೋವಿಡ್‌-19ಗೆ ಸಂಬಂಧಿಸಿದ ಅರ್ಜಿಗಳ ವಿಚಾರಣೆಯಲ್ಲಿ ರಾಜ್ಯದಲ್ಲಿ ಔಷಧಿಗಳ ಲಭ್ಯತೆ ಮತ್ತು ಪೂರೈಕೆ ವಿಚಾರವನ್ನು ನ್ಯಾಯಾಲಯ ಗಮನಿಸುತ್ತಿದೆ. ಅದರೆ, ಎಲ್ಲೂ ಔಷಧಗಳ ಕೊರತೆ ಕಂಡು ಬಂದಿಲ್ಲ. ಇದು ಅರ್ಜಿದಾರರ ವೈಯುಕ್ತಿಕ ವಿಚಾರವಾಗಿದ್ದು, ಒಂದು ವೇಳೆ ಅರ್ಜಿದಾರರು ಆರೋಗ್ಯ ಇಲಾಖೆಗೆ ಮನವಿ ಸಲ್ಲಿಸಿದರೆ ಇಲಾಖೆ ಅದನ್ನು ಪರಿಗಣಿಸಬೇಕು," ಎಂದು ನ್ಯಾಯಪೀಠ ಹೇಳಿತು.

ಅಲ್ಲದೆ, ಔಷಧಗಳ ನಿರಂತರ ಪೂರೈಕೆಗೆ ಸಂಬಂಧಪಟ್ಟ ಪ್ರಾಧಿಕಾರ, ಸಂಸ್ಥೆಗಳಿಗೆ ಆರೋಗ್ಯ ಇಲಾಖೆ ಸೂಕ್ತ ನಿರ್ದೇಶನ ನೀಡಲಿದೆ ಎಂದು ಹೈಕೋರ್ಟ್‌ ನಂಬಿದೆ ಎಂದು ನ್ಯಾಯಪೀಠ ಅರ್ಜಿಯನ್ನು ವಿಲೇವಾರಿ ಮಾಡಿತು.

ರಾಜ್ಯದಲ್ಲಿ ಕೊರೊನಾ ಮಿಂಚಿನ ಓಟ: ಒಂದೇ ದಿನ 149 ಹೊಸ ಸೋಂಕು! ಮಂಡ್ಯ 71‌!

ಅರ್ಜಿದಾರರು, ತಮ್ಮ ತಾಯಿಗೆ ಹೈಡ್ರಾಕ್ಸಿಕ್ಲೋರೋಕ್ವಿನ್‌ (ಎಚ್‌‍ಸಿಕ್ಯೂಎಸ್‌), ಅಲ್ಟ್ರಾಸೆಟ್‌ ಮತ್ತು ಪ್ಯಾನ್‌ ಮಾತ್ರೆಗಳು ಬೇಕು. ಆದರೆ, ಎಲ್ಲಿಯೂ ಈ ಮೂರು ಮಾತ್ರೆಗಳ ಸಿಗುತ್ತಿಲ್ಲ. ಹಾಗಾಗಿ, ಈ ವಿಚಾರವಾಗಿ ಸಂಬಂಧಪಟ್ಟವರಿಗೆ ಸೂಕ್ತ ನಿರ್ದೇಶನ ನೀಡಬೇಕು ಎಂದು ನ್ಯಾಯಾಲಯವನ್ನು ಕೋರಿದ್ದರು.