ಹೊಸದಿಲ್ಲಿಯಲ್ಲಿ ವೈದಿಕ ರಿಸರ್ಚ್ ಇನ್ಸ್ಟಿಟ್ಯೂಟ್

ಉಡುಪಿ: ರಾಷ್ಟ್ರರಾಜಧಾನಿಯಲ್ಲಿ ವೈದಿಕ ರಿಸರ್ಚ್ ಇನ್ಸ್ಟಿಟ್ಯೂಟ್‌ ನಿರ್ಮಾಣವಾಗುತ್ತಿದ್ದು, ಜೂನ್‌ನಲ್ಲಿ ಉದ್ಘಾಟನೆಯಾಗಲಿದೆ ಎಂದು ಪೇಜಾವರ ಶ್ರೀ ವಿಶ್ವೇಶತೀರ್ಥ ಶ್ರೀಗಳು ತಿಳಿಸಿದ್ದಾರೆ.

ಪಿ. ವಿ. ನರಸಿಂಹ ರಾವ್, ಎಚ್. ಡಿ. ದೇವೇಗೌಡ ಪ್ರಧಾನಿಯಾಗಿದ್ದಾಗ ಕೊಟ್ಟ ಒಂದೂವರೆ ಎಕರೆ ಭೂಮಿಯಲ್ಲಿ ವೈದಿಕ ರಿಸರ್ಚ್ ಇನ್‍ಸ್ಟಿಟ್ಯೂಟ್ 6 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣವಾಗುತ್ತಿದ್ದು ಜೂನ್ ಅಂತ್ಯಕ್ಕೆ ಉದ್ಘಾಟನೆ ನಡೆಯಲಿದೆ. ಉತ್ತರ ಭಾರತದಲ್ಲಿ ಮಧ್ವ ವೇದಾಂತದ ಜತೆಗೆ ವೇದ, ಪುರಾಣ, ಭಗವದ್ಗೀತೆ, ಉಪನಿಷತ್ತನ್ನು ಹಿಂದಿಯಲ್ಲಿ ಪ್ರಚಾರ ಮಾಡಲು ಸಂಶೋಧನೆ, ಪ್ರಕಾಶನ ನಡೆಯಲಿದೆ ಎಂದು ಸ್ವಾಮೀಜಿ ಹೇಳಿದ್ದಾರೆ.

ವೃಂದಾವನದಲ್ಲಿ ಅತಿಕ್ರಮಣ: ಉತ್ತರ ಪ್ರದೇಶದ ಮಥುರಾ ಬಳಿಯ ವೃಂದಾವನದಲ್ಲಿ ಗುರು ಶ್ರೀವಿದ್ಯಾಮಾನ್ಯತೀರ್ಥರಿಗೆ ದಾನವಾಗಿ ಸಿಕ್ಕ ಒಂದೂವರೆ ಎಕರೆ ಜಾಗವನ್ನು ಪುರೋಹಿತರೊಬ್ಬರು ಟ್ರಸ್ಟೊಂದರ ಹೆಸರಲ್ಲಿ ಅತಿಕ್ರಮಣ ಮಾಡಿದ್ದಾರೆ. ನ್ಯಾಯಾಲಯದ ತೀರ್ಪಿನ ಹೊರತಾಗಿಯೂ ತೆರವಾಗಿಲ್ಲ. ಈ ವಿಚಾರವನ್ನು ಸಿಎಂ ಯೋಗಿ ಆದಿತ್ಯನಾಥ ಗಮನಕ್ಕೆ ತರಲಾಗಿದೆ. ಅಲ್ಲಿ ಆಶ್ರಮ, ಶಾಖಾ ಮಠ, ಗುರು ಶ್ರೀವಿದ್ಯಾಮಾನ್ಯತೀರ್ಥರ ಸ್ಮಾರಕ ನಿರ್ಮಾಣ ಉದ್ದೇಶವಿದೆ.

ಹಿಂದಿನ ಪೇಜಾವರ ಸ್ವಾಮೀಜಿಯಲ್ಲ!: ಸುದ್ದಿಗೋಷ್ಠಿಗೂ ಮೊದಲು ಇದು ಹಿಂದಿನ ಪೇಜಾವರ ಸ್ವಾಮೀಜಿಯಲ್ಲ, ಕೋಲು ಹಿಡಿದು ನಡೆವ ಮುದುಕ ಎಂದ ಶ್ರೀಪಾದರು ಕೊನೆಗೆ ನಾವು ಹೇಳಿದ್ದನ್ನೇ ಬರೆಯಿರಿ ಎಂದು ನಕ್ಕರು. ಬೆನ್ನು ಬಾಗುವ ಸಮಸ್ಯೆ ಹಿಂದಿನಿಂದಲೂ ಇತ್ತು ಎಂದರು.