ಗೌಡರಿಗೆ ವಾಲ್ಮೀಕಿ ಪ್ರಶಸ್ತಿ-ಬಿಜೆಪಿ ವಿರೋಧ

ಬೆಂಗಳೂರು: ವಾಲ್ಮೀಕಿ ಪ್ರಶಸ್ತಿಗೆ ಸಾಹಿತಿಗಳನ್ನು ಆಯ್ಕೆ ಮಾಡದೆ ಮಾಜಿ ಪ್ರಧಾನಿ ದೇವೇಗೌಡರನ್ನು ಆಯ್ಕೆ ಮಾಡಿದ್ದಾರೆ. ಸಮಾಜಕ್ಕೆ ಅವರ ಕೊಡುಗೆ ಏನು? ಎಂದು ಬಿಜೆಪಿ ವಕ್ತಾರ ಗೋ.ಮಧುಸೂದನ್‌ ಪ್ರಶ್ನಿಸಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ''ಅಯೋಧ್ಯೆಯಲ್ಲಿ ರಾಮ ಮಂದಿರ ಬೇಡ ಎಂದು ದೇವೇಗೌಡರು ಹೇಳಿದ್ದರು. ಇಂತಹ ವ್ಯಕ್ತಿಗೆ ವಾಲ್ಮೀಕಿ ಪ್ರಶಸ್ತಿ ನೀಡಿದರೆ ವಾಲ್ಮೀಕಿ ಸಮುದಾಯ ಒಪ್ಪುವುದಿಲ್ಲ. ಮಗ (ಎಚ್‌.ಡಿ.ಕುಮಾರಸ್ವಾಮಿ) ಅಪ್ಪನಿಗೆ (ಎಚ್‌.ಡಿ.ದೇವೇಗೌಡ) ಪ್ರಶಸ್ತಿ ಕೊಟ್ಟಿದ್ದಾರೆ. ದೇವೇಗೌಡರು ಪ್ರಶಸ್ತಿ ಸ್ವೀಕರಿಸದೇ ಇದ್ದರೂ ಬೆಂಗಳೂರಿಗೆ ಬಂದ ಮೇಲೆ ಸ್ವೀಕರಿಸುತ್ತಾರೆ. ಸಮಾಜ ಒಡೆದು ಆಳುವ ಅವರಿಗೆ ಸಾಮಾಜಿಕ ಬದ್ಧತೆ ಇಲ್ಲ ,'' ಎಂದು ವ್ಯಂಗ್ಯವಾಡಿದರು.