ಅನಂತಕುಮಾರ ಹೆಗಡೆಗೆ ಮಾತೇ ಮಂತ್ರಿ ಪದವಿ ತಪ್ಪಿಸಿತೇ?

ಬೆಂಗಳೂರು: ಅನಗತ್ಯ ಮಾತು ಮತ್ತು ಅಗತ್ಯಕ್ಕೆ ತಕ್ಕಂತೆ ಕೆಲಸ ಮಾಡದೆ ಪಕ್ಷವನ್ನು ಮೇಲಿಂದ ಮೇಲೆ ಮುಜುಗರಕ್ಕೆ ಒಳಪಡಿಸಿದ್ದೇ ಅನಂತಕುಮಾರ ಹೆಗಡೆ ಅವರಿಗೆ ಸಚಿವ ಸ್ಥಾನ ಕೈ ತಪ್ಪಲು ಕಾರಣ ಎನ್ನಲಾಗುತ್ತಿದೆ.

ಈ ಹಿಂದಿನ ಅವಧಿಯ ಕೊನೆಯಲ್ಲಿ ಬಲು ಮಹತ್ವದ ಕೌಶಲಾಭಿವೃದ್ಧಿ ಖಾತೆ ನೀಡಿದರೂ, ಆ ಖಾತೆ ‘ನೀರಿಲ್ಲದ ಬಾವಿ’ಎಂದು ಆರಂಭದಲ್ಲೇ ಹೇಳಿ ಅವಾಂತರ ಮಾಡಿಕೊಂಡ ಅನಂತಕುಮಾರ್‌ ಹೆಗಡೆ ನಿರೀಕ್ಷೆಗೆ ತಕ್ಕಂತೆ ಕೆಲಸ ಮಾಡಲಿಲ್ಲ ಎಂದು ಪ್ರಧಾನಿ ಬೇಸರ ಗೊಂಡಿದ್ದರು.

ಕಳೆದ ವಿಧಾನ ಸಭಾ ಚುನಾವಣೆಯಲ್ಲಿ ಅನಂತ ಹೆಗಡೆ ಪಕ್ಷಕ್ಕೆ ಹೆಚ್ಚು ಮತ ತರಬಹುದೆಂದು ನಿರೀಕ್ಷೆ ಮಾಡಿದ್ದರೆ, ತಾವು ಅಧಿಕಾರಕ್ಕೆ ಬಂದಿರುವುದೇ ಸಂವಿಧಾನ ಬದಲಾವಣೆ ಮಾಡುವುದಕ್ಕಾಗಿ ಎಂದು ಹೇಳಿ ಪಕ್ಷವನ್ನು ಪೇಚಿಗೆ ಸಿಲುಕಿಸಿದ್ದು ಅಮಿತ್‌ ಶಾ ಅವರಿಗೆ ಸಿಟ್ಟು ತರಿಸಿತ್ತು.

ಆ ಹೇಳಿಕೆಯಿಂದ ವಿಧಾನಸಭಾ ಚುನಾವಣೆಯಲ್ಲಿ ನಷ್ಟವಾಯಿತೆಂಬ ಅಭಿಪ್ರಾಯವೂ ಇದೆ. ಅಷ್ಟು ಸಾಲದ್ದಕ್ಕೆ ಈ ಚುನಾವಣೆ ಯಲ್ಲಿ ಗಾಂಧೀಜಿ ಹಂತಕ ಗೋಡ್ಸೆ ದೇಶಭಕ್ತ ಎಂಬುದನ್ನು ಸಮರ್ಥಿಸಿ ವಿವಾದಾಸ್ಪದ ಟ್ವೀಟ್‌ ಕೂಡ ದುಬಾರಿಯಾಗಿ ಪರಿಣಮಿಸಿದೆ.

ಈ ಎಲ್ಲ ಕಾರಣದಿಂದ ಮೋದಿ ಅವರು ಈ ಬಾರಿ ಸಚಿವ ಸ್ಥಾನ ನೀಡುವ ಮನಸ್ಸು ಮಾಡಿಲ್ಲ ಎಂದು ಹಿರಿಯ ಬಿಜೆಪಿ ಮುಖಂಡರೊಬ್ಬರು ಅಭಿಪ್ರಾಯಪಟ್ಟರು.