ಧರಣಿ ಸ್ಥಳದಲ್ಲೇ ಯೋಗಾಸನ, ಪ್ರಾಣಾಯಾಮ ಮಾಡಿದ ಬಿಜೆಪಿ ನಾಯಕರು

ಬೆಂಗಳೂರು : ಜಿಂದಾಲ್‌ಗೆ ಭೂಮಿ ಹಂಚಿಕೆ ಮಾಡಿರುವುದನ್ನು ವಿರೋಧಿಸಿ ಅಹೋರಾತ್ರಿ ಧರಣಿ ನಡೆಸುತ್ತಿರುವ ಬಿಜೆಪಿ ನಾಯಕರು ಶನಿವಾರ ಮುಂಜಾನೆ ಎದ್ದು ರೇಸ್‌ಕೋರ್ಸ್‌ ರಸ್ತೆಯಲ್ಲೇ ವಾಕಿಂಗ್‌ ಮಾಡಿದರು. ನಂತರ ಧರಣಿ ನಡೆಸುತ್ತಿರುವ ಪೆಂಡಾಲ್‌ನಲ್ಲೇ ಯೋಗಾಸನ, ಸೂರ್ಯ ನಮಸ್ಕಾರ ಹಾಗೂ ಪ್ರಾಣಾಯಾಮ ಮಾಡಿ ಗಮನಸೆಳೆದರು.

ಧರಣಿ ಸ್ಥಳದಲ್ಲಿ ಮಲಗಿದ್ದ ಯಡಿಯೂರಪ್ಪ ಅವರು ಮುಂಜಾನೆ 5ಕ್ಕೆ ಎದ್ದು ಮನೆಗೆ ಹೋಗಿ ಸ್ನಾನ ಪೂಜೆ ಮುಗಿಸಿ ಮರಳಿ ಬಂದು ರೇಸ್‌ಕೋರ್ಸ್‌ ರಸ್ತೆಯಲ್ಲಿ ವಾಕಿಂಗ್‌ ಮಾಡಿದರು. ಮಾಜಿ ಡಿಸಿಎಂ ಆರ್‌.ಅಶೋಕ್‌, ಶಾಸಕರಾದ ಎಂ.ಪಿ.ರೇಣುಕಾಚಾರ್ಯ, ಪ್ರಭು ಚೌಹಾಣ್‌ ಮೊದಲಾದವರು ರೇಸ್‌ಕೋಸ್‌ ರಸ್ತೆ ಹಾಗೂ ಶೇಷಾದ್ರಿರಸ್ತೆಯಲ್ಲಿ ವಾಕಿಂಗ್‌ ಮಾಡಿದರು. ಲಘು ವ್ಯಾಯಾಮ ಮಾಡಿದರು. ಬಳಿಕ ರೇಣುಕಾಚಾರ್ಯ, ಪ್ರಭುಚೌಹಾಣ್‌ ಹಾಗೂ ಇತರ ಕಾರ್ಯಕರ್ತರು ಪೆಂಡಾಲ್‌ನಲ್ಲಿ ಕುಳಿತು ಯೋಗಾಸನ ಹಾಗೂ ಪ್ರಾಣಾಯಾಮ ಮಾಡಿದರು.