ಗಗನಕ್ಕೇರಿದ ಎಳನೀರು ಬೆಲೆ

ಕಾಸರಗೋಡು: ಎಳನೀರಿನ ಬೆಲೆ ಗಗನಕ್ಕೇರಿದೆ. ಸುಡುವ ಬಿಸಿಲು ಹಾಗೂ ರಮ್ಜಾನ್‌ ವ್ರತಾಚಾರಣೆ ಹಿನ್ನೆಲೆಯಲ್ಲಿ ಎಳನೀರು ಬೆಲೆಯಲ್ಲಿ ಭಾರಿ ಏರಿಕೆ ಉಂಟಾಗಿದೆ. ವ್ಯಾಪಾರಿಗಳು ಒಂದು ಸಿಯಾಳಕ್ಕೆ 40 ರೂ. ವಸೂಲಿ ಮಾಡುತ್ತಿದ್ದಾರೆ.

ಇನ್ನೂರೈವತ್ತು ಎಂಎಲ್‌ ಎಳನೀರು ಜ್ಯೂಸ್‌ಗೆ 50 ರೂ. ವಸೂಲಿ ಮಾಡುತ್ತಾರೆ. ಎಳನೀರು ಕೆಳಗಿಳಿಸಲು ಕಾರ್ಮಿಕರು ಸಿಗದಿರುವುದು, ಹಗ್ಗ ಬಳಸಿ ಎಳನೀರು ಕೆಳಗಿಳಿಸಬೇಕು ಎಂಬುದು ಬೆಲೆ ಏರಿಕೆಗೆ ಕಾರಣ ಎಂದು ವ್ಯಾಪಾರಿಗಳು ಹೇಳುತ್ತಿದ್ದಾರೆ. ತರಕಾರಿ ಬೆಲೆ ಕೂಡ ಇದೇ ರೀತಿ ಇದೆ. ಟೊಮೇಟೋಗೆ ಕಿಲೋಗೆ 40 ರೂ.ಗೇರಿದೆ.

ಅಲಸಂಡೆ, ಬೆಂಡೆಕಾಯಿ, ಬೀನ್ಸ್‌, ಕ್ಯಾರಟ್‌, ಬೀಟ್‌ರೂಟ್‌, ಪಪ್ಪಾಯ ಮೊದಲಾದುವುಗಳಿಗೆಲ್ಲ ಒಂದೇ ವಾರದಲ್ಲಿ ಗಣನೀಯ ಬೆಲೆ ಏರಿಕೆ ಉಂಟಾಗಿದೆ. ಕಳೆದ ವಾರ ಟೊಮೇಟೋ ಬೆಲೆ 20 ರೂ. ಆಗಿತ್ತು. ಕಾಯಿಮೆಣಸಿನ ಬೆಲೆ ಕೂಡ ಗಣನೀಯವಾಗಿ ಏರಿಕೆಯಾಗಿದೆ. ಹಣ್ಣುಹಂಪಲುಗಳ ಬೆಲೆ ಕೂಡ ಏರಿಕೆಯಾಗಿದೆ. ಗಂಟೆಗಳೊಳಗೆ ಬೆಲೆ ಏರಿಕೆಯಾಗುತ್ತಿದೆ. ನೇಂದ್ರ ಬಾಳೆಹಣ್ಣಿಗೆ ಹಾಗೂ ಕಲ್ಲಂಗಡಿಗೆ ದಿನಂಪ್ರತಿ ಬೆಲೆ ಏರಿಕೆಯಾಗುತ್ತಿದೆ.