ಭೀಕರ ಮಳೆ: ಜಿಲ್ಲೆಯಲ್ಲಿ ಅಪಾರ ನಾಶನಷ್ಟ

ಕಾಸರಗೋಡು: ಭೀಕರ ಮಳೆಗೆ ಕಾಸರಗೋಡು ಜಿಲ್ಲೆಯಲ್ಲಿ ಅಪಾರ ನಾಶನಷ್ಟ ಉಂಟಾಗಿದೆ. ಹಲವಾರು ಪ್ರದೇಶಗಳಲ್ಲಿ ಗುಡ್ಡ ಜರಿತ ಭೀತಿ ನೆಲೆನಿಂತಿದೆ.

ಹೊಳೆಗಳು, ತೋಡುಗಳು ಮಿತಿಮೀರಿ ಹರಿಯುತ್ತಿದ್ದು ನೀರು ಸಮೀಪ ಪ್ರದೇಶಗಳಿಗೆ ವಿಸ್ತರಿಸಿದೆ. ಇದರಿಂದ ಪ್ರವಾಹ ಭೀತಿ ಎದುರಾಗಿದೆ. ಭೀಕರ ಮಳೆ ಕಾರಣ ಕಿನಾನೂರು-ಕರಿಂದಳ ಕುಂಬಳಪಳ್ಳಿ ಪೆರಿಯಂಗಾನದಲ್ಲಿ ಗುಡ್ಡ ಜರಿದಿದೆ. ಸಮೀಪದ ಗುಡ್ಡ ಜರಿದು ಮಣ್ಣು ಕೆಳಗೆ ಬಿದ್ದಿದೆ. ಯಾರಿಗೂ ಗಾಯಗಳಾಗಿಲ್ಲ. ಮಲೆನಾಡು ಪ್ರದೇಶಗಳಲ್ಲಿ ಗುಡ್ಡ ಜರಿತ ಭೀತಿ ಎದುರಿಸುತ್ತಿರುವ ಪ್ರದೇಶಗಳು ಹೆಚ್ಚಿನ ಸಂಖ್ಯೆಯಲ್ಲಿವೆ. ಈ ಬಾರಿ ಪ್ರದೇಶದ ಜನರು ಅತೀವ ಜಾಗ್ರತೆಯಲ್ಲಿದ್ದಾರೆ. ಬೋವಿಕ್ಕಾನದಲ್ಲಿ ಹಾಗೂ ಚೆರುವತ್ತೂರಿನಲ್ಲಿ ಸಣ್ಣ ಪ್ರಮಾಣದಲ್ಲಿ ಗುಡ್ಡ ಜರಿತ ಉಂಟಾಗಿದೆ. ಜಿಲ್ಲೆಯ 24 ಗ್ರಾಮಗಳಲ್ಲಿ ಮಳೆಹಾನಿಗಳು ತೀವ್ರವಾಗಿವೆ. 163 ವಿದ್ಯುತ್‌ ಕಂಬಗಳು, ಎರಡು ವಿದ್ಯುತ್‌ ಸ್ಥಾವರಗಳು ಹಾನಿಗೀಡಾಗಿವೆ. ಮಿಕ್ಕ ಪ್ರದೇಶಗಳಲ್ಲಿ ವಿದ್ಯುತ್‌ ಸಂಪರ್ಕ ಅಲ್ಲೋಲ ಕಲ್ಲೋಲಗೊಂಡಿದೆ.

ಬಂದ್ಯೋಡಿನಲ್ಲಿ ಬಾವಿ ಕುಸಿದು ಭೀತಿ ಸೃಷ್ಟಿಸಿದೆ. ಬಂದ್ಯೋಡು ಕೊಕ್ಕೆಚ್ಚಾಲಿನ ಶಂಸುದ್ದೀನ್‌ ಅವರ ಮನೆಯ ಬಾವಿ ಸಂಪೂರ್ಣವಾಗಿ ಕುಸಿದು ಭೂಮಿಯಡಿ ಸೇರಿದೆ.

ಬದಿಯಡ್ಕ ಚೆನ್ನರ್‌ಕಟ್ಟೆಯ ವಿಶ್ವನಾಥ ರೈಯವರ ಮನೆಗೆ ಗುಡ್ಡ ಕುಸಿದು ಬಿದ್ದು ಹಾನಿಯುಂಟಾಗಿದೆ. ಶನಿವಾರ ರಾತ್ರಿ 7.30ಕ್ಕೆ ಘಟನೆ ನಡೆದಿದೆ. ಅಡುಗೆಕೋಣೆಯಲ್ಲಿದ್ದ ಪತ್ನಿ ಹೊರಗೆ ಓಡಿ ಹೋಗಿ ಪಾರಾಗಿದ್ದಾರೆ. ಬದಿಯಡ್ಕ-ಪೆರ್ಲ ರಸ್ತೆಯಲ್ಲಿ ಕರಿಂಬಿಲದಲ್ಲಿ ಭಾನುವಾರ ಬೆಳಿಗ್ಗೆ ಮರ ಮುರಿದು ಬಿದ್ದು ಒಂದು ಗಂಟೆ ಕಾಲ ಸಂಚಾರ ಸ್ಥಗಿತಗೊಂಡಿದೆ. ನಾಗರಿಕರು ಮರ ಮುರಿದು ತೆರವುಗೊಳಿಸಿರುವುದರಿಂದ ತಾತ್ಕಾಲಿಕ ಸಂಚಾರ ಆರಂಭಿಸಲಾಯಿತು. ಬಳಿಕ ಅಗ್ನಿಶಾಮಕದಳ ತಲುಪಿ ಮರ ಸಂಪೂರ್ಣವಾಗಿ ತೆರವುಗೊಳಿಸಿತು. ಶನಿವಾರ ಸಂಜೆ ಉಕ್ಕಿನಡ್ಕದಲ್ಲೂ ರಸ್ತೆಗೆ ಮರ ಬಿದ್ದ ಘಟನೆ ನಡೆದಿದೆ.