1.86 ಲಕ್ಷ ಮೀನು ಕಾರ್ಮಿಕರಿಗೆ 4500 ಭತ್ಯೆ

ಕೆ. ಗಂಗಾಧರ್‌ ಯಾದವ್‌, ಕಾಸರಗೋಡು
ಮತ್ಸ್ಯ ಸಂಪತ್ತನ್ನು ಸಂರಕ್ಷಿಸುವ ಸಲುವಾಗಿ ಕೇರಳ ರಾಜ್ಯದಲ್ಲಿ ಟ್ರೋಲಿಂಗ್‌ ನಿಷೇಧ ಜಾರಿಗೊಂಡಿದ್ದು, 52 ದಿನಗಳ ಟ್ರೋಲಿಂಗ್‌ ನಿಷೇಧ ಜು. 31ರಂದು ಕೊನೆಗೊಳ್ಳಲಿದೆ. ಎಂಜಿನ್‌ ಅಳವಡಿಸಿದ ಸುಮಾರು 4200 ಬೋಟ್‌ಗಳಿಗೆ ನಿಷೇಧ ಬಾಧಕವಾಗಲಿದೆ.

ನಿಷೇಧದ ಹಿನ್ನೆಲೆಯಲ್ಲಿ ಕೇರಳ ರಾಜ್ಯದಲ್ಲಿ ನೋಂದಾವಣೆಯಾದ ಎಂಜಿನ್‌ ಅಳವಡಿಸಿದ ಬೋಟ್‌ಗಳು ದಡ ಸೇರಿದ್ದು, ಹೊರ ರಾಜ್ಯಗಳಿಂದ ಆಗಮಿಸಿದ ಬೋಟ್‌ಗಳು ರಾಜ್ಯ ಬಿಟ್ಟು ತೆರಳಿವೆ. ಮೀನುಗಾರಿಕೆ, ಮೆರೈನ್‌ ಎನ್ಫೋರ್ಸ್‌ಮೆಂಟ್‌ ನೇತೃತ್ವದಲ್ಲಿ ಸಮುದ್ರ ಹಾಗೂ ಬಂದರುಗಳಲ್ಲಿ ಕಣ್ಗಾವಲು ಆರಂಭಿಸಲಾಗಿದೆ. ಕರಾವಳಿ ತೀರದಲ್ಲಿ ರಕ್ಷ ಣಾ ಕಾರ್ಯಾಚರಣೆ ಹಾಗೂ ಮೀನುಗಾರಿಕೆ ನಿಷೇಧ ಹಿನ್ನೆಲೆ ಯಲ್ಲಿ ಈ ಅವಧಿಯಲ್ಲಿ ಮೀನು ಕಾರ್ಮಿಕರಿಗೆ ಸಹಾಯ ನೀಡಲು ಸರಕಾರ ಕ್ರಮ ಕೈಗೊಳ್ಳಲಾಗಿದೆ.

ಸರಕಾರದ ಉಳಿತಾಯ ಯೋಜನೆಯಲ್ಲಿ ನೋಂದಣಿ ಮಾಡಿದ ಎಲ್ಲ ಮೀನು ಕಾರ್ಮಿಕರಿಗೆ ಸಹಾಯ ನೀಡಲಾಗುವುದು. ಪ್ರತಿ ತಿಂಗಳು 4500 ರೂ.ನಂತೆ ಭತ್ಯೆ ನೀಡಲಾಗುವುದು. ರಾಜ್ಯದ 1.86 ಲಕ್ಷ ಮೀನು ಕಾರ್ಮಿಕರಿಗೆ ಇದರ ಪ್ರಯೋಜನ ಲಭಿಸಲಿದೆ. ಅಲ್ಲದೆ ಕರಾವಳಿ ತೀರ ಪ್ರದೇಶದ ಜಿಲ್ಲೆಯಲ್ಲಿ 24 ಗಂಟೆಗಳ ಕಾಲ ಕಾರ್ಯಾಚರಿಸುವ ನಿಯಂತ್ರಣ ಕೊಠಡಿಯನ್ನು ತೆರೆಯಲಾಗಿದೆ. ಅನಾಹುತಗಳು ಉಂಟಾದಲ್ಲಿ ಈ ನಿಯಂತ್ರಣ ಕೊಠಡಿಗೆ ಮಾಹಿತಿ ನೀಡುವಂತೆ ತಿಳಿಸಲಾಗಿದೆ.

ತರಬೇತಿ ಪೂರ್ತಿಯಾದ 80ರಷ್ಟು ಮೀನು ಕಾರ್ಮಿಕರನ್ನು ಸಮುದ್ರ ಸುರಕ್ಷಾ ಸೇನೆಯ ಸದಸ್ಯರನ್ನಾಗಿ ನೇಮಿಸಲಾಗಿದೆ. ಎಲ್ಲ ಮೀನು ಕಾರ್ಮಿಕರು ಬಯೋಮೆಟ್ರಿಕ್‌ ಐಡಿ ಕಾರ್ಡ್‌ಗಳನ್ನು ಹೊಂದಿರಬೇಕು. ಟ್ರೋಲಿಂಗ್‌ ನಿಷೇಧ ಸಮಯದಲ್ಲಿ ಜೀವ ಸುರಕ್ಷಾ ಉಪಕರಣಗಳನ್ನು ಹೊಂದಿರುವ ಒಂದು ಬೋಟ್‌, ಎಂಜಿನ್‌ ಅಳವಡಿಸಿದ ದೋಣಿ ಪೂರ್ಣ ಸಮಯದಲ್ಲಿ ಸಮುದ್ರದಲ್ಲಿ ಗಸ್ತು ತಿರುಗಲಾಗುವುದು.

ಮುಂಗಾರು ಸಮಯದಲ್ಲಿ ಸಮುದ್ರ ತೀರ ಪ್ರದೇಶಗಳಲ್ಲಿ ಲೈಟ್‌ ಫಿಶಿಂಗ್‌ ನಿಷೇಧಿಸಲಾಗಿದೆ. ರಾತ್ರಿ ಸಮಯದಲ್ಲಿ ಲೈಟ್‌ ಉಪಯೋಗಿಸಿ ಸಣ್ಣ ಬಲೆ ಉಪಯೋಗಿಸಿ ಬೂತಾಯಿ, ಬಂಗುಡೆ ಮುಂತಾದುವುಗಳ ಮರಿ ಮೀನುಗಳನ್ನು ಹಿಡಿದು ಮಾರಾಟ ಮಾಡುವುದನ್ನು ನಿಷೇಧಿಸಲಾಗಿದೆ. ಇಂತಹ ಮಾರಾಟ ಮಾಡುವವರು ಪತ್ತೆಯಾದರೆ ಎರಡೂವರೆ ಲಕ್ಷ ದಂಡ ವಿಧಿಸಲಾಗುವುದು. ನಿಷೇಧಿತ ಬಲೆಗಳನ್ನು ಉಪಯೋಗಿಸಬಾರದು. ಸಮುದ್ರಕ್ಕೆ ತೆರಳುವ ಸಂದರ್ಭದಲ್ಲಿ ಲೈಪ್‌ ಜಾಕೆಟ್‌, ಕೋಬಾಸ್‌, ವಯರ್‌ಲೆಸ್‌ ಮತ್ತಿತರ ಉಪಕರಣಗಳನ್ನು ಹೊಂದಿರಬೇಕು. ಸಮುದ್ರಕ್ಕೆ ತೆರಳುವ ದೋಣಿಯಲ್ಲಿ ಹಳದಿ ಸಮತಲದಲ್ಲಿ ಕಪ್ಪು ಅಕ್ಷ ರದಲ್ಲಿ ನೋಂದಣಿ ಸಂಖ್ಯೆಯನ್ನು ಬರೆಯಬೇಕು. ಅಪಘಾತ ಸಂಭವಿಸಿದರೆ ಕರಾವಳಿ ಪೊಲೀಸ್‌ ಟ್ರೋಲ್‌ ಫ್ರೀ ನಂಬರ್‌ 1092, ಕೋಸ್ಟಲ್‌ ಗಾರ್ಡ್‌ 1554ಕ್ಕೆ ಸಂಪರ್ಕಿಸಬೇಕು.