ಅರಿಬೈಲು ಶ್ರೀನಾಗಬ್ರಹ್ಮ ಕಂಬಳ ಸಮಾಪ್ತಿ

ಉಪ್ಪಳ : ಗಡಿನಾಡಿನ ಏಕೈಕ ದೇವರ ಕಂಬಳವೆಂದೇ ಪ್ರಸಿದ್ಧಿ ಪಡೆದಿರುವ ಅರಿಬೈಲು ಶ್ರೀನಾಗಬ್ರಹ್ಮ ಕಂಬಳ ಮಂಗಳವಾರ ಸಾಂಪ್ರದಾಯಿಕ ಶ್ರದ್ಧಾ ಭಕ್ತಿಗಳೊಂದಿಗೆ ನಡೆಯಿತು.

ಶ್ರೀ ನಾಗಬ್ರಹ್ಮ ಹುತ್ತದ ರೂಪದಲ್ಲಿ ಇಲ್ಲಿ ಪೂಜಿಸಲ್ಪಡುತ್ತಿದ್ದು, ಶ್ರೀನಾಗಬ್ರಹ್ಮ ಕ್ಷೇತ್ರ ಹಾಗೂ ಇಲ್ಲಿ ನಡೆಯುವ ಕಂಬಳ ಚಾರಿತ್ರಿಕ ಮಹತ್ವವನ್ನು ಹೊಂದಿದೆ.

ಅರಿಬೈಲು ಶ್ರೀ ನಾಗಬ್ರಹ್ಮ ಕ್ಷೇತ್ರದ ವಾರ್ಷಿಕೋತ್ಸವದ ಅಂಗವಾಗಿ ಪರಂಪರಾಗತವಾಗಿ ನಡೆದು ಬರುವ ಕಂಬಳಕ್ಕೆ ಕ್ಷೇತ್ರದ ಆಡಳಿತ ಮೊಕ್ತೇಸರ ರಾಧಾಕೃಷ್ಣ ಅರಿನಾಯರು ಚಾಲನೆ ನೀಡಿದರು. ಅರಿಬೈಲು ನೆತ್ಯ ಗೋಪಾಲ ಶೆಟ್ಟಿ, ಪಕೀರ ಮೂಲ್ಯ, ರಮೆಶ, ಗೋಪಾಲ ಮೂಲ್ಯ ಸಹಕರಿಸಿದರು.

ಕುಂಬಳದಲ್ಲಿ ಕೌಡೂರು ಬೀಡು ಮಾರಪ್ಪ ಭಂಡಾರಿ, ರಕ್ಷಿತ್‌ ರವೀಂದ್ರ ಪಕ್ಕಳ ಇವರ ಎರಡು ಜೋಡಿ ಕೋಣಗಳು, ಕೃಷ್ಣ ಶೆಟ್ಟಿ ಪಟ್ಟತ್ತಮೊಗರು, ಶಾಂತಪ್ಪ ಶೆಟ್ಟಿ ಕುಂಜತ್ತೂರು, ಗೋಪಾಲ ಮಡಿವಾಳ ಕೂಟತ್ತಜೆ ನಿಡಂಬಿರಿ, ಆನಂದ ಪಜಿಂಗಾರು ಬೆಟ್ಟುಮನೆ, ಸಂಜೀವ ಮಡಿವಾಳ ಕಡಂಬಾರು, ಕಲ್ಲಾಜೆ ಜಗನ್ನಾಥ ಶೆಟ್ಟಿ ಅರಿಬೈಲು ಅವರ ಕೋಣಗಳು ಭಾಗವಹಿಸಿದ್ದವು. ಪಾವೂರು ಮೋನು ಬ್ಯಾರಿಯ ಕೋಣ ಈ ಬಾರಿ ಉಪವಾಸ ಕೋಣವಾಗಿ ಭಾಗವಹಿಸಿತ್ತು. ಬಳಿಕ ಕಂಬಳಗದ್ದೆಯಲ್ಲಿ ಪೂಕರೆ ಅಳವಡಿಸಲಾಯಿತು.