ಕಾಸರಗೋಡು: ಮಲೆಯಾಳ ಮ್ಯಾಗಜಿನ್ ಒಂದರ ಮಾರ್ಚ್ ಸಂಚಿಕೆಯ ಮುಖಪುಟದಲ್ಲಿ ಯಾವುದೇ ಮರೆಯಿಲ್ಲದೆ ಮಗುವಿಗೆ ಹಾಲುಣಿಸುವ ಮಹಿಳೆಯ ಚಿತ್ರವು ಸಾಮಾಜಿಕ ತಾಣಗಳಲ್ಲಿ ವೈರಲ್ ಆಗುವುದರೊಂದಿಗೆ ವ್ಯಾಪಕ ಚರ್ಚೆಗೆ ಕಾರಣವಾಗಿದೆ.
ಭಾರತದಲ್ಲಿ ತೆರೆದ ಸ್ತನ್ಯಪಾನಕ್ಕೆ ನಿರ್ಬಂಧ ಇರುವುದರಿಂದ ಮತ್ತು ಕೇರಳ ಅತ್ಯಂತ ಪ್ರಗತಿಶೀಲ ರಾಜ್ಯವಲ್ಲದರಿಂದ ಅನೇಕ ಸಾಮಾಜಿಕ ತಾಣಗಳ ಬಳಕೆದಾರರು ಸಾರ್ವಜನಿಕವಾಗಿ ಸ್ತನ್ಯಪಾನ ಮಾಡಿಸುವ ಮಹಿಳೆಯ ಹಕ್ಕುಗಳ ಕುರಿತಾದ ಕವರ್ ಪೇಜ್ನ್ನು ಸ್ವಾಗತಿಸಿದ್ದಾರೆ. ಇನ್ನು ಕೆಲವರು ತೆರೆದ ಸ್ಥಳದಲ್ಲಿ ಸ್ತನ್ಯಪಾನ ನಡೆಸುವುದನ್ನು ಆಕ್ಷೇಪಿಸಿದ್ದಾರೆ.
ನಿಯತಕಾಲಿಕದ ಕವರ್ ಪೇಜ್ನಲ್ಲಿ ತಾಯಂದಿರು, ದಯವಿಟ್ಟು ನೋಡಬೇಡಿ, ನಮಗೆ ಹಾಲುಣಿಸಬೇಕು- ಎಂಬ ತಲೆ ಬರಹ ನೀಡಲಾಗಿದೆ. ಇದು ಕೇರಳದಲ್ಲಿ ತೆರೆದ ಜಾಗದಲ್ಲಿ ಹೆಂಗಸರು ಹಾಲುಣಿಸುವುದನ್ನು ನೋಡುವ ಪುರುಷರು ಮತ್ತು ಮಹಿಳೆಯರಿಗೆ ನೀಡಿದ ಸ್ಪಷ್ಟ ಸಂದೇಶ ಎಂಬಂತೆಯೂ ಅರ್ಥ ಮಾಡಿಕೊಳ್ಳುತ್ತಿದ್ದಾರೆ.
ಗಗನಸಖಿ, ಲೇಖಕಿ, ನಟಿ , ಮೋಡೆಲ್ ಸಹ ಆಗಿರುವ ಜಿಲು ಜೋಸೆಫ್ ಈ ಬಾರಿ ಮ್ಯಾಗಜಿನ್ನ ಕವರ್ ಪೇಜ್ನ ಚಿತ್ರದ ಮೋಡೆಲ್ ಆಗಿ ಕಾಣಿಸಿಕೊಂಡಿದ್ದಾರೆ. ಯಾವುದೇ ಮರೆಯಿಲ್ಲದೇ ಮಗುವಿಗೆ ಹಾಲುಣಿಸುವ ಚಿತ್ರವಾಗಿದೆ. ಈ ಚಿತ್ರವೇ ಸಾಮಾಜಿಕ ತಾಣಗಳಲ್ಲಿ ವ್ಯಾಪಕ ವಿಮರ್ಶೆಗೆ ಕಾರಣವಾಗಿರುವುದು. ವಿಶೇಷæ ಏನೆಂದರೆ ವಿವಾಹ ಮಾಡಿಕೊಳ್ಳದ, ತಾಯಿಯಾಗದ ಓರ್ವ ಮೋಡೆಲ್ ಮ್ಯಾಗಜಿನ್ನಲ್ಲಿ ಕಾಣಿಸಿಕೊಂಡಿರುವುದು ಎಂಬುದು ಚರ್ಚೆಗೆ ಎಡೆಮಾಡಿಕೊಟ್ಟಿದೆ. ಚಿತ್ರದಲ್ಲಿ ಮೋಡೆಲ್ ಜಿಲು ಜೋಸೆಫ್ ಸಿಂಧೂರ ಹಾಕಿಕೊಂಡಿರುವುದು ಏಕೆ ಎಂಬುದನ್ನು ಸಹ ಸಾಮಾಜಿಕ ತಾಣಗಳಲ್ಲಿ ಪ್ರಶ್ನಿಸುವವರೂ ಇದ್ದಾರೆ.
ಒಟ್ಟಾರೆಯಾಗಿ ಮಲಯಾಳ ಮ್ಯಾಗಜಿನ್ ಸ್ತನ್ಯಪಾನವು ಪ್ರಸ್ತುತ ಸ್ತನ್ಯಪಾನದ ಮಹತ್ವದ ಕುರಿತು ಆರೋಗ್ಯ ಇಲಾಖೆಯು ನಡೆಸುತ್ತಿರುವ ಪ್ರಚಾರಕ್ಕೆ ಸರಿ ಹೊಂದುವುದಾದರೂ, ತೆರೆ ಮಾಚದೆ ಹಾಲುಣಿಸುವ ಚಿತ್ರಕ್ಕೆ ಪರ ವಿರೋಧ ಅಭಿಪ್ರಾಯಗಳು, ವಿಮರ್ಶೆ, ಚರ್ಚೆಗಳಿಗೆ ಎಡೆಮಾಡಿಕೊಟ್ಟಿದೆ.