ಅಫ್ಘಾನಿಸ್ತಾನದ ಐಸಿಸ್‌ ಕೇಂದ್ರಕ್ಕೆ ದಾಳಿ: ಕೇರಳದ ಯುವಕ ಸಾವು

ಕಾಸರಗೋಡು: ಅಫ್ಘಾನಿಸ್ತಾನದ ಐಸಿಸ್‌ ಕೇಂದ್ರಕ್ಕೆ ಯುಎಸ್‌ ನಡೆಸಿದ ಡ್ರೋನ್‌ ದಾಳಿಯಲ್ಲಿ ಕೇರಳದ ಯುವಕನೊಬ್ಬ ಮೃತಪಟ್ಟ ಬಗ್ಗೆ ಸಂಬಂಧಿಕರಿಗೆ ಬುಧವಾರ ವಾಟ್ಸ್ಯಾಪ್‌ ಸಂದೇಶ ಲಭಿಸಿದೆ. ಕೇರಳದ ಮಲಪ್ಪುರ ಜಿಲ್ಲೆಯ ಎಡಪ್ಪಾಲ್‌ ನಿವಾಸಿ ಮೊಹಮ್ಮದ್‌ ಮುಹಸೀನ್‌ ಮೃತ ಯುವಕ.

ಈತ 2017ರ ಅಕ್ಟೋಬರ್‌ ತಿಂಗಳಿನಿಂದ ನಾಪತ್ತೆಯಾಗಿ, ಐಸಿಸ್‌ ಕೇಂದ್ರಕ್ಕೆ ತೆರಳಿದ್ದ. ೕತ ನಾಪತ್ತೆಯಾದ ಬಗ್ಗೆ ಪೊಲೀಸರಿಗೆ ದೂರು ನೀಡಿದರೂ ಪತ್ತೆ ಹಚ್ಚಲು ಸಾಧ್ಯವಾಗಲಿಲ್ಲ. ಕಾಸರಗೋಡಿನಿಂದ ನಾಪತ್ತೆಯಾದವರ ಪೈಕಿ ಈತನೂ ಐಸಿಸ್‌ ಕೇಂದ್ರಕ್ಕೆ ತೆರಳಿದ್ದ.

ಅಫ್ಘಾನಿಸ್ತಾನ ದೇಶದ ಮೊಬೈಲ್‌ ನಂಬರ್‌ನಿಂದ ಮೊಹಮ್ಮದ್‌ ಮುಹಸೀನ್‌ ಸಂಬಂಧಿಕರ ಮೊಬೈಲ್‌ಗೆ ಬುಧವಾರ ಸಂದೇಶ ಬಂದಿದೆ. ಮಲೆಯಾಳ ಭಾಷೆಯಲ್ಲಿ ಬಂದ ವಾಟ್ಸ್ಯಾಪ್‌ ಸಂದೇಶದಲ್ಲಿ 10 ದಿನಗಳ ಹಿಂದೆ ಡ್ರೋನ್‌ ದಾಳಿಯಿಂದ ಮುಹಸೀನ್‌ ಮೃತಪಟ್ಟ ಬಗ್ಗೆ ಮಾಹಿತಿ ಬಂದಿದೆ. ಅಲ್ಲದೇ ಈ ವಿಷಯವನ್ನು ಪೊಲೀಸರಿಗೆ ತಿಳಿಸಬಾರದೆಂಬ ಸಂದೇಶವೂ ಇದೆ.

ಕಾಸರಗೋಡು ಜಿಲ್ಲೆ ಸಹಿತ ಕೇರಳದಿಂದ ಸುಂಆರು 21 ಮಂದಿ ಅಫ್ಘಾನಿಸ್ತಾನದ ಐಸಿಸ್‌ ಕೇಂದ್ರಕ್ಕೆ ತೆರಳಿದ್ದರು. ಈ ಪೈಕಿ ಕಳೆದ ಬಾರಿ ಯುಎಸ್‌ ಡ್ರೋನ್‌ ದಾಳಿಯಲ್ಲಿ ಮೂವರು ಮೃತಪಟ್ಟಿದ್ದರು. ಇದೀಗ ಅಮೆರಿಕ ಸೈನಿಕ ಕಾರ್ಯಾಚರಣೆ ನಡೆಸುತ್ತಿರುವ ಹಿನ್ನೆಲೆಯಲ್ಲಿ ಅಫ್ಘಾನಿಸ್ತಾನದ ಐಸಿಸ್‌ ಕೇಂದ್ರದಲ್ಲಿ ತರಬೇತಿ ಪಡೆಯುತ್ತಿರುವ ಕೇರಳಿಗರ ಸಹಿತ ಆನೇಕರು ಮೃತಪಟ್ಟಿದ್ದಾರೆ.