ನಕಲಿ ಮತದಾನ: ಮತ್ತೆ ಮೂರು ಬೂತ್‌ಗಳಲ್ಲಿ ಮರು ಮತದಾನ

ಕಾಸರಗೋಡು: ನಕಲಿ ಮತದಾನ ನಡೆದ ಹಿನ್ನೆಲೆಯಲ್ಲಿ ಕಾಸರಗೋಡು ಹಾಗೂ ಕಣ್ಣೂರು ಲೋಕಸಭೆ ಕ್ಷೇತ್ರ ವ್ಯಾಪ್ತಿಯಲ್ಲಿ ಮತ್ತೆ ಮೂರು ಬೂತ್‌ಗಳಲ್ಲಿ ಮರು ಮತದಾನ ನಡೆಸಲು ಚುನಾವಣೆ ಆಯೋಗ ಶುಕ್ರವಾರ ಆದೇಶ ಹೊರಡಿಸಿದೆ. ಇದರೊಂದಿಗೆ ಒಟ್ಟು ಏಳು ಬೂತ್‌ಗಳಲ್ಲಿ ಭಾನುವಾರ ಮರು ಮತದಾನ ನಡೆಯಲಿದೆ.

ನಕಲಿ ಮತದಾನ ನಡೆದ ಕಾಸರಗೋಡು ಲೋಕಸಭೆ ಕ್ಷೇತ್ರದ ತೃಕರಿಪುರದ 48ನೇ ಬೂತ್‌ನಲ್ಲೂ, ಕಣ್ಣೂರು ಲೋಕಸಭೆ ಕ್ಷೇತ್ರದ ಧರ್ಮಡದ ಬೂತ್‌ ನಂಬರ್‌ 52, 53ರಲ್ಲಿ ಮರು ಮತದಾನ ನಡೆಯಲಿದೆ.

ಕಾಸರಗೋಡು, ಕಣ್ಣೂರು ಲೋಕಸಭೆ ಕ್ಷೇತ್ರಗಳ ನಾಲ್ಕು ಬೂತ್‌ಗಳಲ್ಲಿ ಮರು ಮತದಾನಕ್ಕೆ ಗುರುವಾರ ಚುನಾವಣಾ ಆಯೋಗ ಆದೇಶ ಹೊರಡಿಸಿತ್ತು. ಇದರೊಂದಿಗೆ ಇದೀಗ ಎರಡು ಲೋಕಸಭೆ ಕ್ಷೇತ್ರಗಳ ಏಳು ಬೂತ್‌ಗಳಲ್ಲಿ ಭಾನುವಾರ ಮರು ಮತದಾನ ನಡೆಯಲಿದೆ.

ನಕಲಿ ಮತದಾನ ನಡೆದ ಕಲ್ಯಾಶ್ಯೇರಿಯ ಪಿಲಾತ್ತರ ಎಯುಪಿ ಶಾಲೆಯ 19ನೇ ಬೂತ್‌, ಪುದಿಯಂಗಡಿ ಜುಮಾಅತ್‌ ಹೈಯರ್‌ಸೆಕೆಂಡರಿ ಶಾಲೆಯ 69, 79, ತಳಿಪರಂಬ ಎಯುಪಿ ಶಾಲೆಯ 166ನೇ ಬೂತ್‌ಗಳಲ್ಲಿ ಮರು ಮತದಾನಕ್ಕೆ ಗುರುವಾರ ತೀರ್ಮಾನಿಸಲಾಗಿದೆ.

ಭಾನುವಾರ ಮತದಾನ ನಡೆಯುವುದರಿಂದ ಶುಕ್ರವಾರ ಸಂಜೆ ಆರು ಗಂಟೆಗೆ ಬಹಿರಂಗ ಪ್ರಚಾರ ಅಂತಿಮಗೊಂಡಿದೆ. ಲೋಕಸಭೆ ಚುನಾವಣೆಯ ಕೊನೆಯ ಹಂತದವಾದ ಭಾನುವಾರ ದೇಶದ 59 ಕ್ಷೇತ್ರಗಳಲ್ಲಿ ಚುನಾವಣೆ ನಡೆಯಲಿದೆ.