ಕಾಸರಗೋಡಲ್ಲಿ ಚರಂಡಿ ನಿರ್ಮಿಸುವಾಗ ಗೋಚರಿಸಿತು ಬೃಹತ್‌ ಗುಹೆ!

ಬದಿಯಡ್ಕ: ರಸ್ತೆ ಬದಿಯಲ್ಲಿ ಬೃಹತ್‌ ಗುಹೆಯೊಂದು ಕಂಡುಬಂದಿದ್ದು ಕುತೂಹಲ ಹಾಗೂ ಆತಂಕ ಸೃಷ್ಟಿಸಿದೆ. ಬದಿಯಡ್ಕ-ಕುಂಬಳೆ ರಸ್ತೆಯ ಪೆರಡಾಲದಲ್ಲಿ ರಸ್ತೆ ಬದಿಯಲ್ಲಿ ಚರಂಡಿ ನಿರ್ಮಿಸುತ್ತಿದ್ದಾಗ ಈ ಗುಹೆ ಕಂಡುಬಂದಿದೆ.

ಎರಡು ದಿನಗಳ ಹಿಂದೆ ಕೆಲಸಗಾರರು ರಸ್ತೆಯ ಬದಿಯ ಕಾಡುಗಳನ್ನು ಕಡಿದು ತೆಗೆದು, ಬುಧವಾರದಂದು ಜೆಸಿಬಿ ಯಂತ್ರದ ಮೂಲಕ ಅಗೆಯುತ್ತಿದ್ದಾಗ ಬೃಹತ್‌ ಗುಹೆ ಕಾಣಸಿಕ್ಕಿದೆ. ಮೇಲ್ಭಾಗವು ಸುಮಾರು ಎರಡು ಮೀಟರ್‌ ಅಗಲದಷ್ಟಿರುವ ಗುಹೆಯ ಅಡಿ ಭಾಗ ವಿಶಾಲವಾಗಿದೆ.

ಅಡಿ ಭಾಗವು ಕಣ್ಣಿಗೆ ಗೋಚರವಾಗದಿದ್ದರೂ, ಸುಮಾರು 10 ಮೀಟರ್‌ಗಳಷ್ಟು ಅಗಲವಾಗಿದ್ದು, ರಸ್ತೆ ಅಡಿಭಾಗಕ್ಕೂ ವಿಸ್ತರಿಸಿದೆ. ರಸ್ತೆ ಅಪಾಯದ ಭೀತಿಯಲ್ಲಿದೆ ಎಂದು ತಿಳಿದುಬಂದಿದ್ದು, ಗುಹೆಯ ಮೇಲಿನ ರಸ್ತೆಯ ಭಾಗದಲ್ಲಿ ಅಧಿಕಾರಿಗಳು ತಡೆ ಸೃಷ್ಟಿಸಿದ್ದಾರೆ. ಗುಹೆ ಕುರಿತು ತಜ್ಞರು ಪರಿಶೀಲನೆ ನಡೆಸಲಿದ್ದಾರೆ ಎಂದು ತಿಳಿದುಬಂದಿದೆ.

ಬಣ್ಣ ಬೆರೆಸಿದ ಏಲಕ್ಕಿ ಹಾಗೂ ಕಳಪೆ ಎಣ್ಣೆಯಿಂದ ಮಾರುಕಟ್ಟೆಯಲ್ಲಿಆತಂಕ!

ಸಾಮಾಜಿಕ ಜಾಲತಾಣದಲ್ಲಿ ಗುಹೆಯು ವ್ಯಾಪಕ ಪ್ರಚಾರವನ್ನು ಪಡೆದಿದ್ದು, ರಸ್ತೆಯ ವಾಹನ ಚಾಲಕರು ಕುತೂಹಲದಿಂದ ವೀಕ್ಷಿಸುತ್ತಿದ್ದಾರೆ. ಪ್ರಸ್ತುತ ವಾಹನ ಸಂಚಾರ ಸುಗಮವಾಗಿ ಸಾಗುತ್ತಿದ್ದು, ಗುಹೆಯ ಮೇಲ್ಭಾಗ ಜರಿದು ಬೃಹತ್‌ ಹೊಂಡ ಸೃಷ್ಟಿಯಾದಲ್ಲಿ ವಾಹನ ಸಂಚಾರಕ್ಕೂ ಅಡಚಣೆಯುಂಟಾಗಲಿದೆ ಎಂದು ಹೇಳಲಾಗುತ್ತಿದೆ. ಕೆಲವು ವರ್ಷಗಳ ಹಿಂದೆ ಇಂತಹುದೇ ಗುಹೆಯೊಂದು ನೀರ್ಚಾಲು ಕುಂಟಿಕಾನ ಸಮೀಪ ಬಾವಿಯೊಂದರಲ್ಲಿ ಕಂಡುಬಂದಿದೆ.

ಕೋವಿಡ್‌ ವ್ಯಾಕ್ಸಿನ್‌ಗಾಗಿ ಕೇರಳ ರಾಜ್ಯದ 8389 ಸಂಸ್ಥೆಗಳಿಂದ ನೋಂದಣಿ