ಕಾರಡ್ಕ ಗ್ರಾಪಂ ಅಧ್ಯಕ್ಷೆಯಾಗಿ ಅನಸೂಯ ರೈ ಆಯ್ಕೆ

ಕಾಸರಗೋಡು: ಬಿಜೆಪಿಯನ್ನು ಆಡಳಿತದಿಂದ ದೂರ ಉಳಿಸಲು ಕಾರಡ್ಕ ಗ್ರಾಪಂ ಪಂಚಾಯಿತಿಯಲ್ಲಿ ಎಲ್‌ಡಿಎಫ್‌-ಯುಡಿಎಫ್‌ ಆಡಳಿತ ಚುಕ್ಕಾಣಿ ಹಿಡಿದಿದೆ. ಸಿಪಿಎಂನ ಸ್ವತಂತ್ರ ಸದಸ್ಯೆ ಎ.ಅನಸೂಯ ರೈ ನೂತನ ಅಧ್ಯಕ್ಷೆಯಾಗಿ ಗುರುವಾರ ನಡೆದ ಚುನಾವಣೆಯಲ್ಲಿ ಎಂಟು ಮತಗಳನ್ನು ಪಡೆದುಕೊಂಡು ಆಯ್ಕೆಯಾಗಿದ್ದಾರೆ.

ಬಿಜೆಪಿಯ ಅಧ್ಯಕ್ಷೆ ಅಭ್ಯರ್ಥಿಯಾಗಿದ್ದ ಮಾಜಿ ಅಧ್ಯಕ್ಷೆ ಜಿ. ಸ್ವಪ್ನಾ ಅವರಿಗೆ ಏಳು ಮತಗಳು ಲಭಿಸಿದೆ. ಚುನಾವಣಾಧಿಕಾರಿಯಾಗಿ ಕಾಸರಗೋಡು ಪ್ರಾಥಮಿಕ ಕೃಷಿ ಗ್ರಾಮಾಭಿವೃದ್ಧಿ ಬ್ಯಾಂಕ್‌ ಆಡಿಟರ್‌ ಸಿ.ಪಿ.ಆಶ್ರಫ್‌ ಚುನಾವಣಾ ಪ್ರಕ್ರಿಯೆ ನಡೆಸಿಕೊಟ್ಟರು.

15 ಸದಸ್ಯರನ್ನು ಒಳಗೊಂಡ ಕಾರಡ್ಕ ಗ್ರಾಪಂನಲ್ಲಿ ಬಿಜೆಪಿಗೆ ಏಳು, ಸಿಪಿಎಂಗೆ ಐದು, ಕಾಂಗ್ರೆಸ್‌ ಮೂರು ಸದಸ್ಯರಿದ್ದಾರೆ.

ಅತೀ ಹೆಚ್ಚು ಸದಸ್ಯರನ್ನು ಒಳಗೊಂಡಿರುವ ಬಿಜೆಪಿ ಕಳೆದರಡು ವರ್ಷಗಳಿಂದ ಆಡಳಿತ ನಡೆಸುತ್ತಿತ್ತು. ಅವರನ್ನು ಅವಿಸ್ವಾಸ ಗೊತ್ತುವಳಿಯ ಮೂಲಕ ಸೋಲಿಸಿ ಸಿಪಿಎಂ-ಲೀಗ್‌-ಕಾಂಗ್ರೆಸ್‌ ಸೇರಿಕೊಂಡು ಆಡಳಿತ ಪಡೆದುಕೊಂಡಿದೆ.

ಪಂ. ಉಪಾಧ್ಯಕ್ಷ ರ ಆಯ್ಕೆಯಾಗಿ ನಡೆದ ಚುನಾವಣೆಯಲ್ಲಿ ಕಾಂಗ್ರೆಸ್‌ನ ಸ್ವತಂತ್ರ ಸದಸ್ಯ ಬಿ.ಕೆ.ವಿನೋದನ್‌ ನಂಬ್ಯಾರ್‌ ಎಂಟು ಮತಗಳಿಂದ ಜಯಗಳಿಸಿದ್ದಾರೆ. ಬಿಜೆಪಿ ಉಪಾಧ್ಯಕ್ಷ ಸ್ಥಾನಕ್ಕಾಗಿ ಸ್ಪರ್ಧಾ ಕಣದಲ್ಲಿದ್ದ ಮಾಜಿ ಉಪಾಧ್ಯಕ್ಷ ಎಂ.ಗೋಪಾಲಕೃಷ್ಣ ಅವರಿಗೆ ಏಳು ಮತಗಳು ಲಭಿಸಿದೆ. ಕಾರಡ್ಕ ಗ್ರಾಪಂಗೆ ನಡೆದ ಅಧ್ಯಕ್ಷ ರ, ಉಪಾಧ್ಯಕ್ಷ ರ ಚುನಾವಣೆಯ ಹಿನ್ನೆಲೆಯಲ್ಲಿ ಪೊಲೀಸರ ಬಿಗಿ ಬಂದೋಸ್ತು ಏರ್ಪಡಿಸಲಾಗಿತ್ತು.