ಮಾಹಿಯಿಂದ ಮಂಜೇಶ್ವರವರೆಗೆ ಜಲಸಾರಿಗೆ

ಕಾಸರಗೋಡು: ಮಾಹಿಯಿಂದ ಮಂಜೇಶ್ವರ ವರೆಗಿನ ಹೊಳೆಗಳನ್ನು ಪರಸ್ಪರ ಸಂಪರ್ಕಿಸುವ ಮೂಲಕ ಜಲಸಾರಿಗೆ ಯೋಜನೆ ಜಾರಿಯಾಗಲಿದೆ.

ಕೇಂದ್ರ ಪ್ರವಾಸೋದ್ಯಮ ಸಚಿವಾಲಯ ಮತ್ತು ರಾಜ್ಯ ಪ್ರವಾಸೋದಮ್ಯ ಇಲಾಖೆ ಸಹಾಯದೊಂದಿಗೆ ಮಲೆನಾಡು ಕ್ರೂಸ್‌ ಟೂರಿಸಂ ಯೋಜನೆ ಇದನ್ನು ಜಾರಿಗೊಳಿಸಲಿದೆ.

ಚಂದ್ರಗಿರಿ ಹೊಳೆಯಲ್ಲಿ ಬೋಟು ಜೆಟ್ಟಿ ನಿರ್ಮಿಸುವ ಸ್ಥಳಗಳ ಮಣ್ಣು ತಪಾಸಣೆ ಆರಂಭಿಸಲಾಗಿದೆ. ಮೊದಲ ಹಂತದಲ್ಲಿ ಪ್ರವಾಸಿಗರನ್ನು ಆಕರ್ಷಿಸಲು ಹೌಸ್‌ಬೊಟ್‌ಗಳ ಬೆನ್ನಲ್ಲೆ ಪ್ರಯಾಣ ದೋಣಿಗಳ ಸಂಚಾರಕ್ಕೆ ಯೋಜನೆ ಇರಿಸಲಾಗಿದೆ. ಪ್ರಸ್ತುತ ಕೋಟ್ಟಪ್ಪುರದಿಂದ ವಲಿಯಪರಂಬ ಕೇಂದ್ರೀಕರಿಸಿ ಹೌಸ್‌ಬೋಟುಗಳು ಸಂಚರಿಸುತ್ತವೆ. ಇದನ್ನು ನೀಲೇಶ್ವರ ತೇಜಸ್ವಿನಿ ಹೊಳೆಯ ಮೂಲಕ ಕಾಸರಗೋಡು ಚಂದ್ರಗಿರಿ ಹೊಳೆಯನ್ನು ಜೋಡಿಸಲು ಯೋಜನೆ ಇರಿಸಲಾಗಿದೆ.

ತೇಜಸ್ವಿನಿ ಹೊಳೆಯಲ್ಲಿ ಮಣ್ಣು ತಪಾಸಣೆ ಪೂರ್ತಿಗೊಳಿಸಲಾಗಿದೆ. ಚಂದ್ರಗಿರಿ ಹೊಳೆಯಲ್ಲಿ ತಳಂಗರೆ ಕಡವತ್‌, ಪಿಲಿಕುಂಜೆ(ಚಂದ್ರಗಿರಿ ಸೇತುವೆ ಸಮೀಪ), ಚೇರೂರು, ತೆಕ್ಕಿಲ್‌ ಎಂಬೆಡೆಗಳಲ್ಲಿ ಬೋಟು ಜೆಟ್ಟಿಗಳನ್ನು ನಿರ್ಮಿಸಲಾಗುತ್ತಿದೆ. ಇಲ್ಲಿ ಮಣ್ಣು ತಪಾಸಣೆಯೊಂದಿಗೆ ಹೊಳೆಯ ಪಾರೆ ಪ್ರದೇಶಗಳು, ಅಳಿವೆಬಾಗಿಲುಗಳ ತಪಾಸಣೆ ನಡೆಯುತ್ತಿದೆ. ಮಣ್ಣು ತಪಾಸಣೆ ಪೂರ್ತಿಗೊಳ್ಳುವುದರೊಂದಿಗೆ ಜಲಸಾರಿಗೆಯ ರೂಟ್‌ ಸಂಬಂಧಿಸಿದ ಸರ್ವೆ ಪ್ರಕ್ರಿಯೆಗಳು ಆರಂಭವಾಗಲಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ರಾಜ್ಯ ಪ್ರವಾಸೋದ್ಯಮ ಇಲಾಖೆಯು ಈ ಯೋಜನೆ ಜಾರಿಗೊಳಿಸುತ್ತಿದ್ದರೂ ಇದರ ನಿರ್ಮಾಣ ಹೊಣೆಗಾರಿಕೆ ಒಳನಾಡ ಜಲಸಾರಿಗೆ ಇಲಾಖೆಗಾಗಿದೆ. ತಳಂಗರೆ ಕಡವತ್‌ನಲ್ಲಿ ಆಧುನಿಕ ವಿಧಾನದಲ್ಲಿರುವ ಟೆರ್ಮಿನಲ್‌ನ್ನೊಳಗೊಂಡ ಸೌಕರ್ಯಗಳೊಂದಿಗೆ ಬೋಟು ಜೆಟ್ಟಿ ನಿರ್ಮಿಸಲಾಗುವುದು.

ಬೋಟು ಜೆಟ್ಟಿಗಳ ನಿರ್ಮಾಣ : ಬೋಟು ಜೆಟ್ಟಿ ಟೆರ್ಮಿನಲ್‌ ಳಗೊಂಡ ಜಿಲ್ಲೆಯಲ್ಲಿ ಮೂರು ಬೋಟು ಜೆಟ್ಟಿಗಳನ್ನು ನಿರ್ಮಿಸುವುದಕ್ಕಾಗಿ 12.25ಕೋಟಿ ರೂ. ಯೋಜನೆಗೆ ಆಡಳಿತಾನುಮತಿ ಲಭಿಸಿದೆ. ಕೋಟ್ಟಪ್ಪುರ, ಮಾಡಕ್ಕಲ್‌, ಮಾವಿಲಾಕಡಪ್ಪುರ ಎಂಬೆಡೆಗಳಲ್ಲಿ ಜಲಸಾರಿಗೆಯ ಅಂಗವಾಗಿ ಬೋಟು ಜೆಟ್ಟಿಗಳನ್ನು ನಿರ್ಮಿಸಲಾಗುತ್ತದೆ. ತಾಂತ್ರಿಕ ಅನುಮತಿ ಕೂಡಾ ಲಭಿಸಿದರೆ ಟೆಂಡರ್‌ ಪ್ರಕ್ರಿಯೆ ಪೂರ್ತಿಗೊಳಿಸಿ ನಿರ್ಮಾಣ ಕಾಮಗಾರಿ ಆರಂಭಿಸಲು ಅಧಿಕಾರಿಗಳು ಸಿದ್ಧತೆ ನಡೆಸುತ್ತಿದ್ದಾರೆ. ರಾಜ್ಯ ಪ್ರವಾಸೋದ್ಯಮ ಇಲಾಖೆಯ ಅನುದಾನ ಉಪಯೋಗಿಸಿ ಒಳನಾಡ ಜಲಸಾರಿಗೆ ಇಲಾಖೆ 'ಮಲೆನಾಡು ಕ್ರೂಸ್‌ ಟೂರಿಸಂ' ಯೋಜನೆಯಲ್ಲಿ ಒಳಪಡಿಸಿ ಕಾಮಗಾರಿ ನಡೆಸುತ್ತಿದೆ.

ನೀಲೇಶ್ವರ ನಗರಸಭೆಯ ಕೋಟ್ಟಪ್ಪುರದಲ್ಲಿ ಆಧುನಿಕ ವಿಧಾನದಲ್ಲಿರುವ ಟೆರ್ಮಿನಲ್‌ ಮೊದಲಾದ ಸೌಕರ್ಯಗಳೊಂದಿಗೆ ಬೋಟು ಜೆಟ್ಟಿ ನಿರ್ಮಿಸಲಾಗುವುದು. ಇದಕ್ಕಾಗಿ 8 ಕೋಟಿ ರೂ. ಮಂಜೂರಾಗಿದೆ. 3 ಹೌಸ್‌ಬೋಟುಗಳನ್ನು ನಿಲುಗಡೆಗೊಳಿಸಲಿರುವ ವ್ಯವಸ್ಥೆ ಕಲ್ಪಿಸಲಾಗುವುದು. 4 ಮೀ.ಅಗಲದಲ್ಲಿ, 150 ಮೀ.ಉದ್ದದಲ್ಲಿ ಫುಟ್‌ಪಾತ್‌, ಸೋಲಾರ್‌ ಲೈಟ್‌ಗಳು, ಜಲಶುದ್ದೀಕರಣ ವ್ಯವಸ್ಥೆಯನ್ನು ಕೋಟ್ಟಪ್ಪುರದಲ್ಲಿ ಜಾರಿಗೊಳಿಸಲಾಗುವುದು.

ಮಾವಿಲ ಕಡಪ್ಪುರದಲ್ಲಿ ಬೋಟು ಜೆಟ್ಟಿಗಳ ನಿರ್ಮಾಣಕ್ಕೆ 3.25ಕೋಟಿ ರೂ. ವೆಚ್ಚದ ಯೋಜನಾನುಮತಿ ಲಭಿಸಿದೆ. ತಾಂತ್ರಿಕ ಅನುಮತಿ ಲಭಿಸಿದ ಬಳಿಕ ನಿರ್ಮಾಣ ಆರಂಭವಾಗಲಿದೆ. ಮಾಡಕ್ಕಲ್‌ನಲ್ಲಿ 98 ಲಕ್ಷ ರೂ. ವೆಚ್ಚದಲ್ಲಿ ಬೋಟು ಜೆಟ್ಟಿ ನಿರ್ಮಿಸಲಾಗುವುದು. ಅಂದಾಜು ಪಟ್ಟಿಯನ್ನು ತಾಂತ್ರಿಕ ಅನುಮತಿಗಾಗಿ ಎಕ್ಸಿಕ್ಯೂಟಿವ್‌ ಎಂಜಿನಿಯರ್‌ಗೆ ಹಸ್ತಾಂತರಿಸಲಾಗಿದೆ. ಎಲ್ಲ ರೀತಿಯ ಸೌಕರ್ಯಗಳನ್ನು ಮಾಡಕ್ಕಲ್‌ನಲ್ಲಿ ವ್ಯವಸ್ಥೆಗೊಳಿಸಲಾಗುವುದು.