ರೈಲುಗಳಲ್ಲಿ ರಾರ‍ಯಗಿಂಗ್‌: ಆರ್‌ಪಿಎಫ್‌, ಪೊಲೀಸ್‌ ಕ್ರಮ

ಕಾಸರಗೋಡು: ರೈಲಿನಲ್ಲಿ ರಾರ‍ಯಗಿಂಗ್‌ ನಡೆಸುವವರನ್ನು ಸೆರೆ ಹಿಡಿಯಲು ಆರ್‌ಪಿಎಫ್‌ ಹಾಗೂ ಪೊಲೀಸ್‌ ರಂಗಕ್ಕೆ. ಮಂಗಳೂರಿನ ನಾನಾ ಕಾಲೇಜುಗಳಲ್ಲಿ ಕಲಿಯುವ ವಿದ್ಯಾರ್ಥಿಗಳನ್ನು ರಾರ‍ಯಗಿಂಗ್‌ಗೆ ಒಳಪಡಿಸಲಾಗುತ್ತಿದೆ ಎಂಬ ದೂರಿನ ಹಿನ್ನಲೆಯಲ್ಲಿ ಆರ್‌ಪಿಎಫ್‌ ಹಾಗೂ ಪೊಲೀಸರು ತಪಾಸಣೆಯನ್ನು ಕಟ್ಟುನಿಟ್ಟುಗೊಳಿಸಿದ್ದಾರೆ. ಇದಕ್ಕಾಗಿ ವಿದ್ಯಾರ್ಥಿಗಳು ಅತ್ಯಧಿಕ ಸಂಖ್ಯೆಯಲ್ಲಿ ಪ್ರಯಾಣ ನಡೆಸುವ ರೈಲುಗಳಲ್ಲಿ ಆರ್‌ಪಿಎಫ್‌ ಹಾಗೂ ಪೊಲೀಸ್‌ ಅಧಿಕಾರಿಗಳು ತಪಾಸಣೆ ನಡೆಸುವರು.

ಬೆಳಿಗ್ಗೆ ಚೆರುವತ್ತೂರಿನಿಂದ ಹೊರಡುವ ಚೆರುವತ್ತೂರು-ಮಂಗಳೂರು ಪ್ಯಾಸೆಂಜರ್‌, ಸಂಜೆ 4.30ಕ್ಕೆ ಮಂಗಳೂರಿನಿಂದ ಹೊರಡುವ ಮಂಗಳೂರು-ಕಣ್ಣೂರು ಪ್ಯಾಸೆಂಜರ್‌ಗಳಲ್ಲಿ ಮಂಗಳೂರಿನ ಕಾಲೇಜುಗಳಲ್ಲಿ ಕಲಿಯುವ ಕಾಸರಗೋಡು, ಕಣ್ಣೂರುಗಳ ಜ್ಯೂನಿಯರ್‌ ವಿದ್ಯಾರ್ಥಿಗಳನ್ನು ಸೀನಿಯರ್‌ ವಿದ್ಯಾರ್ಥಿಗಳು ಉಪದ್ರವಿಸುವುದು ಸಾಮಾನ್ಯವಾಗಿದೆ.

ಕಳೆದ ಶೈಕ್ಷ ಣಿಕ ವರ್ಷ ರಾರ‍ಯಗಿಂಗ್‌ಗೆ ಒಳಗಾದ ಹಿನ್ನಲೆಯಲ್ಲಿ ಹಲವಾರು ವಿದ್ಯಾರ್ಥಿಗಳು ಕಲಿಕೆಯನ್ನು ಅರ್ಧದಲ್ಲೇ ನಿಲ್ಲಿಸಿದ್ದರು. ಹಲವು ವಿದ್ಯಾರ್ಥಿಗಳು ಭಯದಿಂದ ಯಾರಲ್ಲೂ ದೂರು ನೀಡಿಲ್ಲ. ಉಪಟಳ ಸಹಿಸಲು ಸಾಧ್ಯವಾಗದೆ ಹಲವು ವಿದ್ಯಾರ್ಥಿಗಳು ರೈಲುನಿಲ್ದಾಣಗಳಲ್ಲಿ ಇಳಿದು ಬಸ್ಸುಗಳಲ್ಲಿ ಪ್ರಯಾಣಿಸುತ್ತಿದ್ದರು. ಈ ಬಾರಿ ವಿದ್ಯಾರ್ಥಿಗಳಿಗೆ ಉಪಟಳ ನೀಡುವ ತಂಡಗಳು ರೈಲುಗಳಲ್ಲಿ ಠಿಕಾಣಿ ಹೂಡಿವೆ.

ಮಂಗಳೂರಿನಿಂದ ಹೊರಡುವ ಪ್ಯಾಸೆಂಜರ್‌ನಲ್ಲಿ ಅಲ್ಲಿಂದ ಆರ್‌ಪಿಎಫ್‌ ಉದ್ಯೋಗಿಗಳು ರೈಲುಗಳಲ್ಲಿರುವರು. ವಿದ್ಯಾರ್ಥಿಗಳನ್ನು ಸೆರೆ ಹಿಡಿದು ಕ್ರಮ ಕೈಗೊಳ್ಳುವುದರೊಂದಿಗೆ ತಿಳುವಳಿಕೆ ನೀಡಲಾಗುವುದು ಎಂದು ಆರ್‌ಪಿಎಫ್‌ ಇನ್ಸ್‌ಪೆಕ್ಟರ್‌ ಪಿ. ವಿಜಯಕುಮಾರ್‌ ತಿಳಿಸಿದ್ದಾರೆ. ರೈಲುಗಳಲ್ಲಿ ವಿದ್ಯಾರ್ಥಿಗಳಿಗೆ ಉಪಟಳ ನೀಡುವುದಿದ್ದರೆ ಕಾಸರಗೋಡು, ಮಂಗಳೂರು ಎಂಬೆಡೆಗಳ ಆರ್‌ಪಿಎಫ್‌, ಪೊಲೀಸ್‌ ಠಾಣೆಗಳಲ್ಲಿ ಮಾಹಿತಿ ನೀಡಬೇಕಿದೆ. 182 ನಂಬ್ರಕ್ಕೆ ಕರೆ ಮಾಡಿ ತಿಳಿಸಬಹುದಾಗಿದೆ.