ಕೇರಳದಲ್ಲಿ ಘೋಷಿಸಿದ್ದ ರೆಡ್‌ ಅಲರ್ಟ್‌ ಹಿಂತೆಗೆತ

ಕಾಸರಗೋಡು: ಕೇರಳದಲ್ಲಿ ಘೋಷಿಸಿದ್ದ ರೆಡ್‌ ಅಲರ್ಟ್‌ನ್ನು ಕೇಂದ್ರ ಹವಾಮಾನ ಇಲಾಖೆ ಹಿಂತೆಗೆದಿದೆ. ಆದರೆ ಜೂ.10, 11, 12ರಂದು ಕೇರಳದ ವಿವಿಧ ಜಿಲ್ಲೆಗಳಲ್ಲಿ ಆರೆಂಜ್‌ ಅಲರ್ಟ್‌ ಜಾರಿಯಲ್ಲಿರಲಿದೆ ಎಂದು ಕೇಂದ್ರ ಹವಾಮಾನ ನಿರೀಕ್ಷ ಣಾ ಇಲಾಖೆ ತಿಳಿಸಿದೆ.

ಜೂ.10ರಂದು ಎರ್ನಾಕುಳಂ, ಮಲಪ್ಪುರಂ ಜಿಲ್ಲೆ, ಜೂ.11ರಂದು ಎರ್ನಾಕುಳಂ, ತ್ರಿಶೂರು, ಮಲಪ್ಪುರ ಜಿಲ್ಲೆ, ಜೂ.12ರಂದು ಎರ್ನಾಕುಳಂ, ಕೋಝಿಕ್ಕೋಡು ಜಿಲ್ಲೆಗಳಲ್ಲಿ ಆರೆಂಜ್‌ ಅಲರ್ಟ್‌ ಜಾರಿಯಲ್ಲಿರಲಿದೆ. ಈ ಜಿಲ್ಲೆಗಳಲ್ಲಿ 115 ಮಿ.ಮೀ.ವರೆಗೆ ಮಳೆ ಅಥವಾ 115 ಮಿ.ಮೀ.ನಿಂದ 204.5 ಮಿ.ಮೀ.ವರೆಗೆ ಮಳೆ ಸುರಿಯುವ ಸಾಧ್ಯತೆ ಇದೆ. ಈ ಹಿನ್ನೆಲೆಯಲ್ಲಿ ಸಾರ್ವಜನಿಕರು ಜಾಗ್ರತೆ ವಹಿಸಬೇಕು ಎಂದು ತಿಳಿಸಲಾಗಿದೆ.

ಜೂ.10ರಂದು ಕೊಟ್ಟಾಯಂ, ತ್ರಿಶೂರು, ಕೋಝಿಕ್ಕೋಡು, ಕಣ್ಣೂರು, ವಯನಾಡು, ಕಾಸರಗೋಡು ಜಿಲ್ಲೆ, ಜೂ.11ರಂದು ಕೊಲ್ಲಂ, ಆಲಪ್ಪುಯ, ಕೋಝಿಕ್ಕೋಡು, ವಯನಾಡು ಜಿಲ್ಲೆ, ಜೂ.12ರಂದು ಆಲಪ್ಪುಯ, ಕಣ್ಣೂರು, ಕಾಸರಗೋಡು ಜಿಲ್ಲೆಗಳಲ್ಲಿ ಎಲ್ಲೋ ಅಲರ್ಟ್‌ ಘೋಷಿಸಲಾಗಿದೆ.

ಪ್ರತಿ ಬಾರಿಯೂ ಏಪ್ರಿಲ್‌ನಲ್ಲೇ ಆರಂಭಗೊಳ್ಳುವ ಮಳೆ ಈ ಬಾರಿ ತಡವಾಗಿದೆ. ಕಳೆದ ಡಿಸೆಂಬರ್‌ನಿಂದಲೇ ಹಲವೆಡೆ ಜನರು ಕುಡಿಯುವ ನೀರಿನ ಸಮಸ್ಯೆ ಅನುಭವಿಸುತ್ತಿದ್ದು, ಈಗಲೂ ಮುಂದುವರಿದಿದೆ. ಬತ್ತಿದ ಬಾವಿ, ಹೊಳೆ ಮೊದಲಾದ ಜಲಾಶಯಗಳು ಇನ್ನೂ ತುಂಬಿಲ್ಲ. ಮಳೆಯ ಸೂಚನೆ ಲಭಿಸದೆ ಭತ್ತ ಕೃಷಿಗೆ ಇಳಿಯಲು ಕೃಷಿಕರು ಹಿಂದೇಟು ಹಾಕುತ್ತಿದ್ದಾರೆ. ಪರಿಸ್ಥಿತಿ ಇದೇ ರೀತಿ ಮುಂದುವರಿದರೆ ಈ ಬಾರಿ ಭತ್ತ ಕೃಷಿ ಕಷ್ಟವಾಗಲಿದೆ. ತರಕಾರಿ, ಹಣ್ಣುಹಂಪಲು, ಅಕ್ಕಿ ಇನ್ನಿತರ ನಿತ್ಯೋಪಯೋಗಿ ಸಾಮಗ್ರಿಗಳಿಗೆ ಮಾರುಕಟ್ಟೆಯಲ್ಲಿ ದಿನೇ ದಿನೆ ಬೆಲೆ ಏರುತ್ತಿರುವಾಗ ಜನಸಾಮಾನ್ಯರು ಬಾಯಿಬಿಟ್ಟು ನೋಡುವಂತಾಗಿದೆ. ಮಳೆರಾಯ ದಯೆ ತೋರಿಸದಿದ್ದರೆ ಜನಜೀವನ ಸಂಕಷ್ಟಕ್ಕೀಡಾಗಲಿದೆ.

ಕರಾವಳಿ ಜಿಲ್ಲೆಗಳಲ್ಲಿ ಭಾರೀ ಗಾಳಿ: ದ.ಕ., ಉಡುಪಿ, ಕಾಸರಗೋಡು ಜಿಲ್ಲೆಯಾದ್ಯಂತ ಭಾನುವಾರ ಬೆಳಗ್ಗಿನಿಂದಲೇ ಭಾರೀ ಗಾಳಿ ಬೀಸುತ್ತಿದ್ದು, ಮಳೆಯ ಆಗಮನವನ್ನು ಸೂಚಿಸುತ್ತಿದೆ. ಭಾರೀ ಗಾಳಿ ಪರಿಣಾಮ ಹಲವೆಡೆ ವಿದ್ಯುತ್‌ ಕೈಕೊಟ್ಟಿದೆ. ಕರಾವಳಿಯ ಹಲವೆಡೆ ತುಂತುರು ಮಳೆ ಸುರಿದಿದೆ.