ಕೇರಳ ತೀರದಲ್ಲಿ ಭಾರಿ ಕಡಲಬ್ಬರ ಸಾಧ್ಯತೆ

ಕಾಸರಗೋಡು: ಕೇರಳ ತೀರ ಪ್ರದೇಶದಲ್ಲಿ ಏ.25ರ ರಾತ್ರಿ 11.30ರ ತನಕ ಕಡಲಬ್ಬರ ಭಾರಿ ಪ್ರಮಾಣದಲ್ಲಿ ಹೆಚ್ಚಾಗುವ ಸಾಧ್ಯತೆ ಇದೆ ಎಂದು ಹವಾಮಾನ ಇಲಾಖೆ ಮುನ್ನೆಚ್ಚರಿಕೆ ನೀಡಿದೆ.

ಸುಮಾರು 1.5 ಮೀಟರ್‌ನಿಂದ 2.2 ಮೀಟರ್‌ ಎತ್ತರದಲ್ಲಿ ಅಲೆ ಬೀಸುವುದರಿಂದ ಸಮುದ್ರ ಪ್ರಕ್ಷುಬ್ಧಗೊಳ್ಳುವ ಸಾಧ್ಯತೆಯಿರುವುದಾಗಿ ಇಲಾಖೆ ತಿಳಿಸಿದೆ. ಮೀನು ಕಾರ್ಮಿಕರು ಏ.27ರಿಂದ ಆಳ ಸಮುದ್ರ ಮೀನುಗಾರಿಕೆಗೆ ತೆರಳಬಾರದೆಂದು ಇಲಾಖೆ ಎಚ್ಚರಿಕೆ ನೀಡಿದೆ.

ಕರಾವಳಿ ತೀರ ಪ್ರದೇಶದಲ್ಲಿ ಏ.25ರಂದು ಬೀಸುವ ಗಾಳಿಯ ವೇಗ ಗಂಟೆಗೆ 25 ರಿಂದ 30 ಕಿ. ಮೀ. ಇರುವುದು. ಮೇ 26ರಂದು ಅದರ ವೇಗ ಗಂಟೆಗೆ 40 ರಿಂದ 50 ಕಿ. ಮೀ.ಗೆ ಹೆಚ್ಚಲಿದೆ. ಅಲ್ಲದೆ ಏ. 27ರಂದು ಗಂಟೆಗೆ 60 ರಿಂದ 70 ಕಿ.ಮೀ.ಗೆ ಹೆಚ್ಚಾಗಲಿದೆ. ಏ.28ರಂದು ಅದು ಗಂಟೆಗೆ 80 ರಿಂದ 90 ಕಿ.ಮೀ. ವೇಗದಲ್ಲಿ ಬೀಸುವ ಸಾಧ್ಯತೆಯಿರುವುದಾಗಿ ಮುನ್ನೆಚ್ಚರಿಕೆ ನೀಡಲಾಗಿದೆ.