ಗುಂಪೆ ಪರಿಸರದಲ್ಲಿ ಶಿಲಾಯುಗದ ವಸ್ತು ಪತ್ತೆ

ಉಪ್ಪಳ : ನವಶಿಲಾಯುಗದ ಕತ್ತರಿಸುವ ಚೂಪಾದ ಆಯುಧಗಳಂತೆ ಬಳಸುವ ವಸ್ತುವೊಂದು ಮಂಜೇಶ್ವರ ತಾಲೂಕಿನ ಪೈವಳಿಕೆ ಗ್ರಾಮ ಪಂ. ವ್ಯಾಪ್ತಿಯ ಕನಿಯಾಲದ ಕೆದುಕೋಡಿ ಎಂಬಲ್ಲಿ ಪತ್ತೆಯಾಗಿದೆ.

ಇತಿಹಾಸ ಪ್ರಸಿದ್ಧ ಪೊಸಡಿ ಗುಂಪೆ ತಪ್ಪಲಿನ ತಳಭಾಗದಲ್ಲಿರುವ ಬಾಲಕೃಷ್ಣ ಭಟ್ಟರ ಅಡಕೆ ತೋಟದಲ್ಲಿ ಶಿಲಾಯುಗದ ನುಣುಪಾದ ಸುಮಾರು 15 ಸೆ.ಮೀ. ಉದ್ದದ ಕಲ್ಲೊಂದು ಪತ್ತೆಯಾಗಿದ್ದು ಅಚ್ಚರಿ ಮೂಡಿಸಿದೆ.

ಆಯುಧಗಳನ್ನು ನಿರ್ಮಿಸುವ ಮೊದಲು ಮನುಷ್ಯ ದೀರ್ಘಕಾಲದವರೆಗೆ ನಾನಾ ಹಣ್ಣು, ಗೆಡ್ಡೆಗೆಣಸುಗಳನ್ನು, ಬೇರು ಮತ್ತು ಎಲೆಗಳನ್ನು ಹಾಗೂ ಬೇಟೆಯಾಡಿದ ಪ್ರಾಣಿಗಳನ್ನು ಕೊಲ್ಲಲು, ಅವುಗಳ ಮಾಂಸವನ್ನು ಬೇರ್ಪಡಿಸಲು ಈ ಕಲ್ಲುಗಳನ್ನು ಬಳಸಲಾಗಿದ್ದಿರಬೇಕು ಎಂದು ಅಂದಾಜಿಸಲಾಗಿದೆ.

ಸುಮಾರು 40 ಸಾವಿರ ವರ್ಷಕ್ಕಿಂತಲೂ ಹಳೆಯದಾಗಿರುವ ಇದೇ ರೀತಿಯ ಕಲ್ಲು ವರ್ಷಗಳ ಹಿಂದೆ ಕೇರಳದ ಎರ್ನಾಕುಳಂ ಜಿಲ್ಲೆಯ ಕೊಡನಾಡ್‌ ಎಂಬಲ್ಲಿ ಪತ್ತೆಯಾಗಿದ್ದು, ಬಳಿಕ ಇದೇ ಮೊದಲ ಬಾರಿಗೆ ಮಲಬಾರ್‌ ಪ್ರದೇಶವಾದ ಕನಿಯಾಲದಲ್ಲಿ ಪತ್ತೆಯಾಗಿದೆ ಎಂದು ತಿಳಿದುಬಂದಿದೆ.

ಪೊಸಡಿಗುಂಪೆ ಪ್ರದೇಶದಲ್ಲಿ ಈಗಾಗಲೇ ಅನೇಕ ಬಾಂಜಾರು ಗುಹೆಗಳು, ಪುರಾತನ ಸುರಂಗಗಳು ಪತ್ತೆಯಾಗಿದ್ದು, ಇದೀಗ ಶಿಲಾಯುಗದ ಕಲ್ಲೊಂದು ಕಂಡು ಬಂದಿರುವುದು ಸ್ಥಳೀಯರಲ್ಲಿ ಕೌತುಕ ಮೂಡಿಸಿದೆ. ಈ ಪ್ರದೇಶಕ್ಕೆ ಮಂಗಳವಾರ ಕಾಂಞಂಗಾಡ್‌ ನೆಹರೂ ಕಾಲೇಜಿನ ಇತಿಹಾಸ ಸಂಶೋಧಕ ಪ್ರೊ. ನಂದ ಕುಮಾರ್‌ ಕೋರೋತ್‌ ಭೇಟಿ ನೀಡಿ ಹೆಚ್ಚಿನ ಮಾಹಿತಿ ನೀಡುವರು.