ಸೈನುಲ್‌ ಆಬಿದ್‌ಗೆ ಜಿಲ್ಲಾ ಪೊಲೀಸರ ಅಭಿನಂದನೆ

ಕಾಸರಗೋಡು: ಚೆಂಡಾಟ ಆಡುತ್ತಿದ್ದಾಗ 20 ಅಡಿ ಆಳದ ಕೊಳಕ್ಕೆ ಬಿದ್ದ ಇಬ್ಬರು ಸ್ನೇಹಿತರನ್ನು ರಕ್ಷಿಸಿದ ಯುಕೆಜಿ ವಿದ್ಯಾರ್ಥಿಯನ್ನು ಕಾಸರಗೋಡು ಜಿಲ್ಲಾ ಪೊಲೀಸರು ಅಭಿನಂದಿಸಿದರು.

ಮುಳಿಯಾರು ಅಮ್ಮಂಗೋಡಿನ ಸೈನುದ್ದೀನ್‌-ಅಸ್ಮ ದಂಪತಿಯ ಪುತ್ರ ಸೈನುಲ್‌ ಆಬಿದ್‌ನ ಸಾಂದರ್ಭಿಕ ಜ್ಞಾನ, ಶೌರ್ಯವನ್ನು ಅಭಿನಂದಿಸಿ ಕಾಸರಗೋಡು ಜಿಲ್ಲಾ ಪೊಲೀಸರು ಚೆರ್ಕಳ ಸರಕಾರಿ ಹೈಯರ್‌ ಸೆಕೆಂಡರಿ ಶಾಲೆಯಲ್ಲಿ ನಡೆದ ಕಾರ‍್ಯಕ್ರಮದಲ್ಲಿ ಅಭಿನಂದನ ಪತ್ರ ಸಲ್ಲಿಸಿದರು.

ಸೈನುಲ್‌ ಆಬಿದ್‌ ಹಾಗೂ ಮಕ್ಕಳು ಮನೆ ಸಮೀಪದಲ್ಲಿ ಆಟ ಆಡುತ್ತಿದ್ದರು. ಈ ವೇಳೆ, ಕೊಳಕ್ಕೆ ಬಿದ್ದ ಚೆಂಡು ತೆಗೆಯಲು ಹೋದ ಇಬ್ಬರು ಮಕ್ಕಳು ಕಾಲು ಜಾರಿ ಸುಮಾರು 20 ಅಡಿಯಷ್ಟು ಆಳದ ಕೊಳಕ್ಕೆ ಬಿದ್ದರು. ತಕ್ಷಣ ಸಮಯಪ್ರಜ್ಞೆ ಮೆರೆದ ಸನುಲ್‌ ಆಬಿದ್‌, ಮರದ ರೆಂಬೆ ತಂದು ಅದನ್ನು ಕೊಳದಲ್ಲಿ ಇಟ್ಟು ಹಿಡಿದು ನಿಲ್ಲುವಂತೆ ಹೇಳಿದ್ದ. ರೆಂಬೆಯನ್ನು ಹಿಡಿದು ಮೇಲಕ್ಕೆ ಬರುವಂತೆ ಹೇಳಿದ್ದ ಮಾತ್ರವಲ್ಲ; ಕೈ ಹಿಡಿದು ಮೇಲಕ್ಕೂ ಎತ್ತಿದ್ದ.

ಮುಳಿಯಾರು ಪಂಚಾಯಿತಿನ ಮಲ್ಲಂ ಸಸಿಹಿತ್ಲುವಿನ ಮುನೀರ್‌-ಸಾಜಿದ ದಂಪತಿಯ ಪುತ್ರ ಬಾಸಿಂ ಸಮಾನ್‌(5), ಸಾಜಿದಳ ಸಹೋದರ ಆರಿಫ್‌ ನಿಸಾನ್‌ರ ಪುತ್ರ ಅಬ್ದುಲ್‌ ಶಾಮಿಲ್‌(5) ಕೊಳಕ್ಕೆ ಬಿದ್ದ ಬಾಲಕರು. ಈ ಇಬ್ಬರು ಬಾಲಕರು ಪೊವ್ವಲ್‌ ಮುಳಿಯಾರು ಮಾಪಿಳ ಎಲ್‌ಪಿ ಶಾಲೆಯ ಯುಕೆಜಿ ವಿದ್ಯಾರ್ಥಿಗಳಾಗಿದ್ದಾರೆ.