ಫಿಲಮೆಂಟ್‌ ಬಲ್ಬ್ ರಹಿತ ಸೌರವಿದ್ಯುತ್‌ ಪಂಚಾಯಿತಿ

ಕಾಸರಗೋಡು: ಭಾರತದ ಮೊದಲ ಫಿಲಮೆಂಟ್‌ ಬಲ್ಬ್ ರಹಿತ ಪಂಚಾಯಿತಿಯಾಗಿ ಘೋಷಿಸಿದ ಪಿಲಿಕ್ಕೋಡು ಪಂಚಾಯಿತಿನಲ್ಲಿ ವಿದ್ಯುತ್‌ಗಾಗಿ ಸೌರವಿದ್ಯುತ್‌ ಯೋಜನೆ ಜಾರಿಗೊಳಿಸಲಾಗುವುದು.

ಅನರ್ಟ್‌ನ ನೇತೃತ್ವದಲ್ಲಿ ವಿದ್ಯುತ್‌ ಸಂರಕ್ಷಣೆಗಾಗಿ ರಾಜ್ಯದ 4 ಒಂಚಾಯಿತಿಗಳಳ್ಲಿ ಸೌರವಿದ್ಯುತ್‌ ಯೋಜನೆ ಜಾರಿಗೊಳಿಸಲು ಸರಕಾರಕ್ಕೆ ಶಿಫಾರಸು ಮಾಡಲಾಗಿದೆ. ನೆಡುಂಕಡಂ, ಆರ‍್ಯನಾಡ್‌, ಪಿಣರಾಯಿ ಇವು ಇತರ ಮೂರು ಪಂಚಾಯಿತಿಗಳಾಗಿವೆ. ಯೋಜನೆಯ ಪ್ರಕಾರ, ಸೌರವಿದ್ಯುತ್‌ ಮೂಲಕ ಪಂಚಾಯಿತಿನಲ್ಲಿ ಮೊದಲ ಹಂತದಲ್ಲಿ 295 ಮೆ.ವ್ಯಾ. ವಿದ್ಯುತ್‌ ಉತ್ಪಾದಿಸಲು ಸಮಾಲೋಚಿಸಲಾಗಿದೆ. ಪಂಚಾಯಿತಿನ ಸರಕಾರಿ-ಅರೆಸರಕಾರಿ ಸಂಸ್ಥೆಗಳನ್ನು ಕೇಂದ್ರೀಕರಿಸಿ ಮೊದಲ ಹಂತ ಎಂಬ ನೆಲೆಯಲ್ಲಿ ಯೋಜನೆ ಜಾರಿಗೊಳಿಸಲಾಗುವುದು.

ಪಂಚಾಯಿತಿನಲ್ಲಿ ಸೌರವಿದ್ಯುತ್‌ ವಿಸ್ತರಿಸುವ ಉದ್ದೇಶದೊಂದಿಗೆ ಇಂತಹದೊಂದು ಯೋಜನೆ ಜಾರಿಗೊಳಿಸುತ್ತಿರುವುದಾಗಿ ಅನರ್ಟ್‌ ಹೇಳಿದೆ. ಮನೆಗಳಿಗೆ 2 ಕಿ.ವ್ಯಾ.ವರೆಗೆ ವಿದ್ಯುತ್‌ ಉತ್ಪಾದಿಸಲಿರುವ ಸಹಾಯಗಳನ್ನು ಈ ಮೂಲಕ ಮಾಡಿ ಕೊಡಲಾಗುವುದು. ಒಂದು ಕಿ.ವ್ಯಾ.ವಿದ್ಯುತ್‌ ಉತ್ಪಾದಿಸಲಿರುವ ವ್ಯವಸ್ಥೆಗಳನ್ನು ಸಜ್ಜುಗೊಳಿಸಲು 70 ಸಾವಿರ ರೂ. ಖರ್ಚು ಅಂದಾಜಿಸಲಾಗಿದೆ. ಇದರಲ್ಲಿ ಶೇ. 30 ರಷ್ಟು ಸಬ್ಸಿಡಿ ಲಭಿಸಲಿದೆ. ಪ್ರದೇಶದಲ್ಲಿ ಸೌರವಿದ್ಯುತ್‌ ಯೋಜನೆಗಳನ್ನು ವಿಸ್ತರಿಸುವುದು ಪ್ರಸ್ತುತ ದೂರದಿಂದ ತರುವ ವಿದ್ಯುತ್‌ನ ಲೈನ್‌ಲೋಡ್‌ ಇಲ್ಲವಾಗಿಸಲು ಸಾಧ್ಯವಾಗುವುದು ಯೋಜನೆಯ ಪ್ರಮುಖ ಪ್ರಯೋಜನವಾಗಿದೆ. ಇದಲ್ಲದೆ ವೋಲ್ಟೇಜ್‌ ಹೆಚ್ಚಲಿದೆ.

ಪ್ರತಿಯೊಂದು ಮನೆಗಳಲ್ಲಿ ಉತ್ಪಾದಿಸುವ ವಿದ್ಯುತ್‌ ಉಪಯೋಗಿಸಿ ಉಳಿದರೆ ಅದನ್ನು ಕೆಎಸ್‌ಇಬಿ ಸಂಗ್ರಹಿಸಿ ವಿತರಿಸಲು ಸಾಧ್ಯವಿದೆ ಎಂಬುದು ಯೋಜನೆಯ ವಿಶೇಷತೆಯಾಗಿದೆ. ಕಳೆದ ಕೆಲ ದಿನಗಳ ಹಿಂದೆ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್‌ ಪಿಲಿಕ್ಕೋಡು ಪಂಚಾಯಿತಿಯನ್ನು ಫಿಲಮೆಂಟ್‌ ಬಲ್ಬ್ರಹಿತ ಪಂಚಾಯಿತಿಯಾಗಿ ಘೋಷಿಸಿದ್ದರು.

ಭಾರತಕ್ಕೆ ಮಾದರಿಯಾದ ಈ ಯೋಜನೆಯ ದ್ವಿತೀಯ ಹಂತ ಎಂಬ ನೆಲೆಯಲ್ಲಿ ಪಂಚಾಯಿತಿಯನ್ನು ಸಂಪೂರ್ಣವಾಗಿ ಸೌರವಿದ್ಯುತ್‌ ಯೋಜನೆಯ ಅಧೀನಕ್ಕೆ ತರಲು ಪ್ರಯತ್ನಿಸಬೇಕು ಎಂದು ಮುಖ್ಯಮಂತ್ರಿ ಅಂದು ಮಾಡಿದ ಭಾಷಣದಲ್ಲಿ ಸೂಚಿಸಿದ್ದರು.