ನೆರೆಸಂತ್ರಸ್ತರಿಗೆ ಹಣ ಸಂಗ್ರಹಿಸಿದ ಪುಟಾಣಿಗಳು

ಕಾಸರಗೋಡು: ಓಣಂ ರಜೆಯನ್ನು ಉಪಯೋಗಿಸಿ ಮೇಲಾಂಗೋಡು ಎ. ಸಿ. ಕಣ್ಣನ್‌ ಸ್ಮಾರಕ ಸರಕಾರಿ ಯುಪಿ ಶಾಲೆಯ ದುರಂತ ಪರಿಹಾರ ನಿಧಿಗೆ ವಿದ್ಯಾರ್ಥಿಗಳು 3 ದಿನಗಳಲ್ಲಿ 1, 31, 010ರೂ. ಸಂಗ್ರಹಿಸಿದ್ದಾರೆ.

ಶಾಲೆಯ ಅಧ್ಯಾಪಕರು. ವಿದ್ಯಾರ್ಥಿಗಳು, ರಕ್ಷಕರು ದುರಂತ ಪರಿಹಾರ ನಿಧಿಗೆ ಹಣ ಸಂಗ್ರಹಿಸಿದ್ದಾರೆ. ಶಾಲೆಯಲ್ಲಿ ನಡೆದ ಕಾರ‍್ಯಕ್ರಮದಲ್ಲಿ ಕಾಞಂಗಾಡು ನಗರಸಭಾಧ್ಯಕ್ಷ ವಿ. ವಿ. ರಮೇಶನ್‌ ಹಣ ಸ್ವೀಕರಿಸಿದರು. ಶಾಲೆ ಮುಖ್ಯ ಶಿಕ್ಷಕ ಕೂಡಕ್ಕಾಡು ನಾರಾಯಣನ್‌ ಅವರು 1 ತಿಂಗಳ ವೇತನವನ್ನು ಸಂಪೂರ್ಣವಾಗಿಯೂ, ಸೇವಾ ಕಾಲಾವಧಿ ಕೊನೆಗೊಳ್ಳುವವರೆಗಿನ ತಿಂಗಳ ಎರಡು ದಿನದ ವೇತನವನ್ನು ಮುಖ್ಯಮಂತ್ರಿಯವರ ದುರಂತ ಪರಿಹಾರ ನಿಧಿಗೆ ನೀಡಿ ಮಾದರಿಯಾಗಿದ್ದರು.

ವೈಎಂಸಿಎ ಹೊಸದುರ್ಗ ಅಧ್ಯಕ್ಷ ಕುರ‍್ಯನ್‌ ಚಕ್ಕಾಲ ಕುನ್ನೇಲ್‌ 50 ಸಾವಿರ ರೂ. ಮೌಲ್ಯದ ಚೆಕ್‌ ಹಸ್ತಾಂತರಿಸಿದರು. ಸಿ ಒ ಸಿ ಬಿಜು ಮುಖ್ಯ ಅತಿಥಿಯಾಗಿದ್ದರು. ಚಹಾ ಮಾರಾಟ ಮಾಡಿ ಲಭಿಸಿದ ಎಲ್ಲ ಹಣವನ್ನು ಮುಖ್ಯಮಂತ್ರಿಯವರ ದುರಂತ ಪರಿಹಾರ ನಿಧಿಗೆ ದೇಣಿಗೆಯಾಗಿ ನೀಡಿದ ಮಹೇಶ್‌ನನ್ನು ಅಭಿನಂದಿಸಲಾಯಿತು.

ರಕ್ಷಕ-ಶಿಕ್ಷಕ ಸಂಘದ ಅಧ್ಯಕ್ಷ ಕೆ. ವಿ. ಸುಗತನ್‌ ಅಧ್ಯಕ್ಷತೆ ವಹಿಸಿದ್ದರು. ಉಪ ಜಿಲ್ಲಾ ಶಿಕ್ಷಣಾಧಿಕಾರಿ ಪಿ. ವಿ. ಜಯರಾಜನ್‌, ಬಿಪಿಒ ವಿ. ಮಧು, ಪಿ. ಮುರಳಿ, ರತೀಶ ಕಾಲಿಕ್ಕಡವ್‌, ಟಿ. ವಿ. ಸೀನ, ಪಿ. ಕುಂಞಿಕಣ್ಣನ್‌ ಮಾತನಾಡಿದರು.