ಲಿಂಗತ್ವ ಅಲ್ಪಸಂಖ್ಯಾತೆ ಇಶಾ ಕಿಶೋರ್‌ ಈಗ ನ್ಯೂಸ್‌ ರೀಡರ್‌

ಕಾಸರಗೋಡು: ಮಲಯಾಳ ದೃಶ್ಯ ಮಾಧ್ಯಮದಲ್ಲಿ ಇತಿಹಾಸದಲ್ಲಿಯೇ ಮೊದಲ ಬಾರಿಗೆ ನ್ಯೂಸ್‌ ರೀಡರ್‌ ಆಗಿ ಟ್ರಾನ್ಸ್‌ಜೆಂಡರ್‌ ಒಬ್ಬರು ಕಾಣಿಸಿಕೊಂಡಿದ್ದಾರೆ.

ಲಿಂಗತ್ವ ಅಲ್ಪಸಂಖ್ಯಾತರ ಸಮುದಾಯದ ಸಂಘಟನೆಯಾದ ಕ್ಷೇಮ ಇದರ ಜಿಲ್ಲಾಧ್ಯಕ್ಷ ರಾಗಿರುವ ಇಶಾ ಕಿಶೋರ್‌ ಕಾಞಂಗಾಡು ಖಾಸಗಿ ಚಾನೆಲ್‌ನಲ್ಲಿ ನ್ಯೂಸ್‌ ರೀಡರ್‌ ಆಗಿ ಕಾಣಿಸಿಕೊಂಡಿದ್ದಾರೆ. ಇದೇ ಮೊದಲ ಬಾರಿಗೆ ಟ್ರಾನ್ಸ್‌ಜೆಂಡರ್‌ ಒಬ್ಬರು ನ್ಯೂಸ್‌ ರೀಡರ್‌ ಆಗಿ ಕಾಣಿಸಿಕೊಂಡಿರುವುದು ವಿಶೇಷ.

ಇವರು ಡಿವೈಎಫ್‌ಐ ಹೊಸದುರ್ಗ ಈಸ್ಟ್‌ ಸಮಿತಿ ಸಹ ಕಾರ್ಯದರ್ಶಿ, ಕಾಞಂಗಾಡು ಬ್ಲಾಕ್‌ ಸಮಿತಿ ಸದಸ್ಯರಾಗಿದ್ದಾರೆ . ಅಲ್ಲದೆ ಸಾಮಾಜಿಕ ನ್ಯಾಯ ಇಲಾಖೆಯ ಸಂಪನ್ಮೂಲ ವ್ಯಕ್ತಿಯಾಗಿ ಕಾರಾರ‍ಯಚರಿಸುತ್ತಿದ್ದಾರೆ.

ಮೊದಲ ಟ್ರಾನ್ಸ್‌ಜೆಂಡರ್‌ ನ್ಯೂಸ್‌ ರೀಡರ್‌ ಅಲ್ಲದೆ ಇನ್ನೊಂದು ದಾಖಲೆಯನ್ನೂ ಇವರು ಮಾಡಿದ್ದಾರೆ. ಜತೆಗೆ ಜಿಲ್ಲೆಯ ಮೊದಲ ಏಕೈಕ ಮಂಗಳಮುಖಿ ಮತದಾರರೂ ಆಗಿದ್ದ್ದಾರೆ. ಕಾಞಂಗಾಡು ದುರ್ಗಾ ಹೈಯರ್‌ಸೆಕೆಂಡರಿ ಶಾಲಾ ಪರಿಸರದಲ್ಲಿರುವ ಇಶಾ ಕಿಶೋರ್‌ ಜಿಲ್ಲೆಯಲ್ಲಿ ಏಳು ವಿಧಾನಸಭಾ ಕ್ಷೇತ್ರಗಳು ಇದ್ದರೂ ಮಂಗಳಮುಖಿ ಎಂದು ದಾಖಲಿಸಿದ ಗುರುತು ಚೀಟಿಹೊಂದಿರುವ ಏಕೈಕ ಟ್ರಾನ್ಸ್‌ಜೆಂಡರ್‌ ಆಗಿದ್ದಾರೆ.

ಕಳೆದ ವಿಧಾನಸಭಾ ಚುನಾವಣೆಯಲ್ಲಿ ಮತ ಚಲಾಯಿಸಿದರೂ 'ಪುರುಷ' ಎಂಬ ಲಿಂಗವನ್ನು ಗುರುತು ಚೀಟಿಯಲ್ಲಿ ದಾಖಲಿಸಲಾಗಿತ್ತು . 2014ರಲ್ಲಿ ರಾಜ್ಯ ಸರಕಾರ ದೇಶದಲ್ಲೇ ಮೊದಲ ಬಾರಿಗೆ ಟ್ರಾನ್ಸ್‌ಜೆಂಡರ್‌ ಬಿಲ್‌ ಜಾರಿಗೆ ತಂದಿತ್ತು. ಬಳಿಕ 2019ರಲ್ಲಿ ಗುರುತು ಚೀಟಿ ತನ್ನದಾಗಿದ್ದಾರೆ. ಇದಲ್ಲದೇ ನೃತ್ಯ ಹಾಗೂ ಮಾಡೆಲಿಂಗ್‌ನಲ್ಲಿ ಇಶಾ ತನ್ನದೇ ಛಾಪು ಮೂಡಿಸಿದ್ದಾರೆ.