ಕೇರಳದಲ್ಲಿ ಆರೋಗ್ಯ ಕಾರ್ಯಕರ್ತರಿಗೆ ಸಮವಸ್ತ್ರ ಕಡ್ಡಾಯ

ಕಾಸರಗೊಡು: ಕಾರ್ಪೊರೇಶನ್‌ನ ಹಾಗೂ ನಗರಸಭೆಗಳ ಆರೋಗ್ಯ ವಿಭಾಗ ಫೀಲ್ಡ್‌ ಅಧಿಕಾರಿಗಳು ನೌಕರಿ ಸಮಯಗಳಲ್ಲಿ ಕಡ್ಡಾಯವಾಗಿ ಸಮವಸ್ತ್ರ ಧರಿಸಬೇಕು ಎಂದು ಸರಕಾರದ ಆದೇಶವನ್ನು ಜಾರಿಗೊಳಿಸಲು ಆರಂಭಿಸಲಾಗಿದೆ.

ಸಮವಸ್ತ್ರ ಧರಿಸದ ನೌಕರರ ವಿರುದ್ಧ ಕಟ್ಟುನಿಟ್ಟಿನ ಶಿಸ್ತು ಕ್ರಮ ಕೈಗೊಳ್ಳಲಾಗುವುದು ಎಂದು ಸುತ್ತೋಲೆಯಲ್ಲಿ ಹೇಳಲಾಗಿದೆ. ಬ್ರಿಟೀಷರ ಕಾಲದಲ್ಲೇ ಆರೋಗ್ಯ ವಿಭಾಗ ಕಾರ್ಯಕರ್ತರಿಗೆ ನೌಕರಿ ಬಟ್ಟೆಯಿದೆ. ಖಾಕಿ ಬಣ್ಣವಿರುವ ಪ್ಯಾಂಟ್‌ ಹಾಗೂ ಖಾಕಿ ಬಣ್ಣವಿರುವ ಬುಷ್‌ಕೋಟು ಸಮವಸ್ತ್ರವಾಗಿತ್ತು. ಕಾಲಕ್ರಮೇಣ ಖಾಕಿ ಖಾಕಿ ಪ್ಯಾಂಟ್‌ ಹಾಗೂ ಬುಷ್‌ ಶರ್ಟ್‌ ಆಗಿ ಸಮವಸ್ತ್ರವನ್ನು ಪರಿಷ್ಕರಿಸಲಾಯಿತು. ನೂತನ ಪರಿಷ್ಕರಣೆ 2004ರಲ್ಲಿ ಬಂದಿತ್ತಾದರೂ ಕಡ್ಡಾಯವಿರಲಿಲ್ಲ.

ಆದರೆ ನೌಕರಿಯ ಕಾರ್ಯದಕ್ಷತೆಯನ್ನು ಪರೀಕ್ಷಿಸಲು ಹಾಗೂ ಸಾರ್ವಜನಿಕರಿಗೆ ಅರಿವು ಮೂಡಿಸಲು ಡ್ರೆಸ್‌ಕೋಡ್‌ ಅನಿವಾರ್ಯ ಎಂದು ಪತ್ತೆ ಹಚ್ಚಿದ ಹಿನ್ನಲೆಯಲ್ಲಿ ಸರಕಾರ ಇದನ್ನು ಕಡ್ಡಾಯಗೊಳಿಸಿದೆ.

ಜೂನಿಯರ್‌ ಹೆಲ್ತ್‌ ಇನ್ಸ್‌ಪೆಕ್ಟರ್‌ಗಳಿಗೆ (ಗ್ರೇಡ್‌ ಎರಡು) ಎರಡು ನಕ್ಷತ್ರ, ಚಿಹ್ನೆ ಹಾಗೂ ನೀಲಿ ಮತ್ತು ಬಿಳಿ ಬಣ್ಣದ ಬ್ಯಾಡ್ಜ್‌ ಸಮವಸ್ತ್ರವಾಗಿದೆ. ಜೂನಿಯರ್‌ ಹೆಲ್ತ್‌ ಇನ್ಸ್‌ಪೆಕ್ಟರ್‌ಗಳಿಗೆ (ಗ್ರೇಡ್‌1) ಭುಜದಲ್ಲಿ ಎರಡು ನಕ್ಷತ್ರವಿದ್ದರೂ ಬ್ಯಾಡ್ಜ್‌ ಇಲ್ಲ.

ಹೆಲ್ತ್‌ ಇನ್ಸ್‌ಪೆಕ್ಟರ್‌ (ಗ್ರೇಡ್‌ 2) ಮೂರು ನಕ್ಷತ್ರ ಚಿಹ್ನೆ, ನೀಲಿ ಹಾಗೂ ಬಿಳಿ ಬನ್ನದ ಬ್ಯಾಡ್ಜ್‌ ಧರಿಸಬೇಕಿದೆ. ಹೆಲ್ತ್‌ ಇನ್ಸ್‌ಪೆಕ್ಟರ್‌(ಗ್ರೇಡ್‌1) ಮೂರು ನಕ್ಷತ್ರ ಚಿಹ್ನೆಗಿರಬೇಕು. ಆದರೆ ಬ್ಯಾಡ್ಜ್‌ ಇಲ್ಲ. ಶಾಲ್ಡರ್‌ನಲ್ಲಿ ಕೆಎಂಎಸ್‌(ಕೇರಳ ಮುನ್ಸಿಪಲ್‌ ಸರ್ವೀಸ್‌) ಎಂದು ಇರಬೇಕಿದೆ. ಮಹಿಳೆಯರಿಗೆ ಸಾರಿ ಅಥವಾ ಪ್ಯಾಂಟ್‌ ಧರಿಸಬಹುದಾಗಿದೆ.

ಆದರೆ ಪೊಲೀಸ್‌ ಮೋಟಾರ್‌ ವಾಹನ ಇಲಾಖೆ, ಅಬಕಾರಿ ಹೈಯರ್‌ ಫೋರ್ಸ್‌, ಜೈಲು ಅಧಿಕಾರಿಗಳ ಸಮವಸ್ತ್ರದೊಂದಿಗೆ ಸಾಮ್ಯತೆ ಇರುವುದರಿಂದ ಆತಂಕ ಸೃಷ್ಟಿಸುವ ಸಾಧ್ಯತೆ ಇದೆ. ಈಗಾಗಲೇ ಕಣ್ಣೂರು ಮೊದಲಾದ ಜಿಲ್ಲೆಗಳಲ್ಲಿ ಆರೋಗ್ಯ ಕಾರ್ಯಕರ್ತರು ಸಮವಸ್ತ್ರ ಧರಿಸಲು ಆರಂಭಿಸಿದ್ದು, ಎಲ್ಲ ಜಿಲ್ಲೆಗಳಲ್ಲಿ ಶೀಘ್ರದಲ್ಲೇ ಆರೋಗ್ಯ ಕಾರ್ಯಕರ್ತರು ಸಮವಸ್ತ್ರ ಧರಿಸುವರು.