ವಿದ್ಯುತ್‌ ಬೇಲಿ ಸ್ಪರ್ಶಿಸಿ ಯುವಕ ಸಾವು: ಆರೋಪಿ ಖುಲಾಸೆ

ಕಾಸರಗೋಡು: ಹೊಲಕ್ಕೆ ಬರುವ ಕಾಡುಪ್ರಾಣಿಗಳ ಉಪಟಳವನ್ನು ತಡೆಯುವುದಕ್ಕಾಗಿ ಅಳವಡಿಸಿದ ವಿದ್ಯುತ್‌ ಚಾಲಿತ ಬೇಲಿಯಿಂದ ಶಾಕ್‌ ತಗುಲಿ ಯುವಕ ಮೃತಪಟ್ಟ ಪ್ರಕರಣದ ಆರೋಪಿ ಕುಂಟಾರು ಹಸಂತ್ತಡ್ಕ ನಿವಾಸಿ ವೀರೋಜಿ ರಾವ್‌(82) ಎಂಬವರ ಮೇಲಿನ ಆರೋಪ ಕಾಸರಗೋಡು ಹೆಚ್ಚುವರಿ ಜಿಲ್ಲಾ ಸೆಶನ್ಸ್‌ ನ್ಯಾಯಾಲಯ(ದ್ವಿತೀಯ)ದಲ್ಲಿ ನಡೆದ ವಿಚಾರಣೆಯಲ್ಲಿ ಸಾಬೀತುಕೊಳ್ಳದ ಹಿನ್ನೆಲೆಯಲ್ಲಿ ಖುಲಾಸೆಗೊಳಿಸಿ ತೀರ್ಪು ನೀಡಿದೆ.

ಅದೂರು ಪೊಲೀಸ್‌ ಠಾಣಾ ವ್ಯಾಪ್ತಿಯ ಕುಂಟಾರು ಉಮಿತ್ತಡ್ಕದ ಎಲ್ಲೋಜಿ ರಾವ್‌ ಎಂಬವರ ಪುತ್ರ ಕಿಶೋರ್‌(28) ಎಂಬವರು 2014, ಅ.7ರಂದು ರಾತ್ರಿ ಕುಂಟಾರು ಹಂಸತ್ತಡ್ಕ ಎಂಬಲ್ಲಿನ ಹೊಲದ ಬಳಿ ಅಳವಡಿಸಿದ ವಿದ್ಯುತ್‌ ಚಾಲಿತ ಬೇಲಿ ಸ್ಪರ್ಶಗೊಂಡು ಶಾಕ್‌ ತಗುಲಿ ಸಾವನ್ನಪ್ಪಿದರು. ಕಾಡುಪ್ರಾಣಿಗಳು ಕೃಷಿ ನಾಶಗೊಳಿಸುವುದನ್ನು ತಡೆಯುವುದಕ್ಕಾಗಿ ಹೊಲಕ್ಕೆ ವಿದ್ಯುತ್‌ ಚಾಲಿತ ಬೇಲಿ ನಿರ್ಮಿಸಲಾಗಿತ್ತು. ಹೊಲದ ಮಾಲೀಕ ವೀರೋಜಿ ರಾವ್‌ ವಿರುದ್ಧ ಆದೂರು ಪೊಲೀಸರು ಉದ್ದೇಶ ಪೂರ್ವಕವಲ್ಲದ ನರಹತ್ಯೆ ಸೆಕ್ಷ ನ್‌ ಪ್ರಕಾರ ಕೇಸು ದಾಖಲಿಸಿಕೊಂಡಿದ್ದರು. ಆದರೆ ವಿಚಾರಣೆಯಲ್ಲಿ ಆರೋಪಿ ಮೇಲಿನ ಆರೋಪವನ್ನು ಸಾಬೀತುಪಡಿಸಲು ಸಾಧ್ಯವಾಗದ ಹಿನ್ನೆಲೆಯಲ್ಲಿ ಆರೋಪಿಯನ್ನು ನ್ಯಾಯಾಲಯ ಖುಲಾಸೆಗೊಳಿಸಿ ತೀರ್ಪು ನೀಡಿದೆ.