ಸಾಲಬಾಧೆ: ರೈತ ಆತ್ಮಹತ್ಯೆ

ಶನಿವಾರಸಂತೆ: ಆಲೂರು ಸಿದ್ದಾಪುರ ಸಮಿಪದ ದೊಡ್ಡಳ್ಳಿ ಗ್ರಾಮದಲ್ಲಿ ಸಾಲ ಬಾಧೆಯಿಂದ ರೈತರೊಬ್ಬರು ಆತ್ಮಹತ್ಯೆಗೆ ಶರಣಾಗಿದ್ದಾರೆ.

ದೊಡ್ಡಳ್ಳಿ ಡಿ.ಜಿ.ಷಣ್ಮುಖ (45) ಮೃತ. ''ಷಣ್ಮುಖ ಅನೇಕ ವರ್ಷಗಳಿಂದ ತನ್ನ ಹೊಲ ಗದ್ದೆಗಳಲ್ಲಿ ಶುಂಠಿ, ಜೋಳ ಮತ್ತಿತರ ಕೃಷಿ ಮಾಡುತ್ತಿದ್ದರು. ಇದಕ್ಕಾಗಿ 2002ರಲ್ಲಿ ಗೋಣಿಮರೂರು ಸ್ಟೇಟ್‌ ಬ್ಯಾಂಕ್‌ ಆಫ್‌ ಮೈಸೂರಿನಲ್ಲಿ 5 ಲಕ್ಷ ರೂ. ಸಾಲ ಮಾಡಿದ್ದರು. ಇದು ಅಸಲು, ಬಡ್ಡಿ ಸೇರಿ 10 ಲಕ್ಷಕ್ಕೆ ಏರಿತ್ತು. 15 ಲಕ್ಷ ರೂ.ಗಿಂತಲೂ ಹೆಚ್ಚು ಕೈಸಾಲ ಮಾಡಿಕೊಂಡಿದ್ದರು. ಇದನ್ನು ತೀರಿಸಲು ಸಾಧ್ಯವಾಗಿರಲಿಲ್ಲ.

ಬುಧವಾರ ಬೆಳಗ್ಗೆ ಮನೆಯ ಕೊಠಡಿಯಲ್ಲಿ ಪತಿ ಇಲ್ಲದಿರುವುದನ್ನು ಗಮನಿಸಿ ಮಕ್ಕಳಿಗೆ ವಿಷಯ ತಿಳಿಸಿದೆ. ಮಕ್ಕಳು ಮನೆಯ ಸುತ್ತಮುತ್ತ ಹುಡುಕಾಟ ನಡೆಸುತ್ತಿದ್ದಾಗ ಸಮೀಪದ ಹೊಲದಲ್ಲಿ ಮರವೊಂದರಲ್ಲಿ ಷಣ್ಮುಖ ನೇಣು ಬಿಗಿದುಕೊಂಡಿರುವುದು ಗಮನಕ್ಕೆ ಬಂತು,'' ಎಂದು ಪತ್ನಿ ಚಂದ್ರಾವತಿ ಶನಿವಾರಸಂತೆ ಠಾಣೆಗೆ ನೀಡಿರುವ ದೂರಿನಲ್ಲಿ ತಿಳಿಸಿದ್ದಾರೆ.

ಶನಿವಾರಸಂತೆ ಪೊಲೀಸ್‌ ಠಾಣಾಧಿಕಾರಿ ಮರಿಸ್ವಾಮಿ ಭೇಟಿ ನೀಡಿ, ಪರಿಶೀಲನೆ ನಡೆಸಿದರು. ಪ್ರಕರಣ ದಾಖಲಾಗಿದೆ.