ಮ್ಯಾನ್‌ಹಂಟ್‌ ಮಿಸ್ಟರ್‌ ಇಂಡಿಯಾ ಸ್ಪರ್ಧೆ: ಪ್ರಸಾದ್‌ ಕಾರ್ಯಪ್ಪ ಫಸ್ಟ್‌ ರನ್ನರ್‌ ಅಪ್‌

ಮಡಿಕೇರಿ: ಹೊಸದಿಲ್ಲಿಯಲ್ಲಿ ನಡೆದ ಮ್ಯಾನ್‌ಹಂಟ್‌ ಮಿಸ್ಟರ್‌ ಇಂಡಿಯಾ ಸ್ಪರ್ಧೆಯಲ್ಲಿ ಕೊಡಗಿನ ಯುವಕ ಪರದಂಡ ಪ್ರಸಾದ್‌ ಕಾರ್ಯಪ್ಪ ಮಿಂಚು ಹರಿಸಿದ್ದು, ಬೆಸ್ಟ್‌ ಮಾಡೆಲ್‌ ಪ್ರಶಸ್ತಿಯೊಂದಿಗೆ ಫಸ್ಟ್‌ ರನ್ನರ್‌ ಅಪ್‌ ಕಿರೀಟ ಗಳಿಸಿದ್ದಾರೆ.

ಫೆಮಿನಾ ಮಿಸ್‌ ಇಂಡಿಯಾ ಫೈನಲಿಸ್ಟ್‌, ಮಿಸ್‌ ಕ್ಯಾಟ್‌ ವಾಕ್‌ ಹಾಗೂ ಮಿಸ್‌ ಬ್ಯೂಟಿಫುಲ್‌ ಸ್ಮೈಲ್‌ ಕಿರೀಟ ಪಡೆದಿರುವ ಪರದಂಡ ಪ್ರಾರ್ಥನಾ ಸುಬ್ರಹ್ಮಣಿ ಅವರ ಸಹೋದರನಾಗಿರುವ ಪ್ರಸಾದ್‌ ಕಾರ್ಯಪ್ಪ ಸಹೋದರಿಯಂತೆ ಉತ್ತಮ ಭವಿಷ್ಯದ ಭರವಸೆ ನೀಡಿದ್ದಾರೆ.

ದೇಶದ ಪ್ರತಿಷ್ಠಿತ ಮ್ಯಾನ್‌ಹಂಟ್‌ ಮಿಸ್ಟರ್‌ ಇಂಡಿಯಾ ಸ್ಪರ್ಧೆಗೆ ದೇಶದ ವಿವಿಧ ಭಾಗಗಳಿಂದ ಸಾಕಷ್ಟು ಮಂದಿ ಆಗಮಿಸಿದ್ದರು. ರಾಜ್ಯದಿಂದಲೇ ಮೊದಲ ಹಂತದ ಸ್ಪರ್ಧೆಯಲ್ಲಿ 70 ಮಂದಿ ಯುವಕರಿದ್ದರು. ಅವರಲ್ಲಿ ದೆಹಲಿಗೆ ರಾಜ್ಯದ ಏಕೈಕ ಸ್ಪರ್ಧಿಯಾಗಿ ಪ್ರಸಾದ್‌ ಕಾರ್ಯಪ್ಪ ಆಯ್ಕೆಯಾಗಿದ್ದರು.

ರಾಷ್ಟ್ರಮಟ್ಟದಲ್ಲಿ ಮೂರು ವಿಭಾಗದಲ್ಲಿ ನಡೆದ ಸ್ಪರ್ಧೆಯ ಅಂತಿಮ ಸುತ್ತಿನಲ್ಲಿ 13 ಮಂದಿ ಇದ್ದರು. ಇವರಲ್ಲಿ ಪ್ರಸಾದ್‌ ಕಾರ್ಯಪ್ಪ ಫಸ್ಟ್‌ ರನ್ನರ್‌ ಅಪ್‌ನೊಂದಿಗೆ ಬೆಸ್ಟ್‌ ಮಾಡೆಲಿಂಗ್‌ ಕಿರೀಟ ಧರಿಸಿದ್ದಾರೆ.

ಕೊಡಗಿನ ಮಡಿಕೇರಿ ತಾಲೂಕಿನ ಕಕ್ಕಬ್ಬೆಯ ಪರದಂಡ ಸುಬ್ರಹ್ಮಣಿ ಹಾಗೂ ಭವಾನಿ ದಂಪತಿಯ ಪುತ್ರನಾಗಿರುವ ಪ್ರಸಾದ್‌ ದಕ್ಷಿಣ ಕನ್ನಡ ಜಿಲ್ಲೆಯ ಮೂಡಬಿದಿರೆ ಆಳ್ವಾಸ್‌ ಕಾಲೇಜಿನಲ್ಲಿ ಬಿಸಿಎ ಪದವಿ ಪಡೆದಿದ್ದಾರೆ. ಉತ್ತಮ ಕ್ರೀಡಾಪಟುವಾಗಿ ಕೂಡಿಗೆ ಹಾಗೂ ಬೆಂಗಳೂರಿನ ಸಾಯಿಯಲ್ಲಿ ತರಬೇತಿ ಪಡೆದಿದ್ದಾರೆ.