6 ತಿಂಗಳಿನಿಂದ ವೇತನವಿಲ್ಲದೇ ಪರದಾಟ

ಜಗದೀಶ್‌ ಜೋಡುಬೀಟಿ ಗೋಣಿಕೊಪ್ಪಲು
ತಿತಿಮತಿ ಪ್ರಾಥಮಿಕ ಆರೋಗ್ಯ ಕೇಂದ್ರದ ವೈದ್ಯರು ಒಳಗೊಂಡಂತೆ 19 ಸಿಬ್ಬಂದಿ ವೇತನವಿಲ್ಲದೇ ಪರದಾಡುವ ಸ್ಥಿತಿ ಉದ್ಬವಿಸಿದೆ.

ತಿಂಗಳ ಸಂಬಳವನ್ನೇ ನಂಬಿರುವ ಸಿಬ್ಬಂದಿ ಅತಂತ್ರ ಸ್ಥಿತಿಯಲ್ಲಿದ್ದು ಆರ್ಥಿಕ ಸಂಕಷ್ಟ ಎದುರಿಸುತ್ತಿದ್ದಾರೆ. ಮನೆ ಬಾಡಿಗೆ, ಮಕ್ಕಳ ಫೀಸು, ಇತರ ಖರ್ಚುಗಳಿಗೆ ಬೇರೆಯವರ ಮುಂದೆ ಕೈಒಡ್ಡಿ ನಿಲ್ಲುವ ಪರಿಸ್ಥಿತಿ ತಲೆದೂರಿದೆ. 6 ತಿಂಗಳಿನಿಂದ ವೇತನವಿಲ್ಲದೆ ಇಲ್ಲಿನ ಸಿಬ್ಬಂದಿ ಸಂಕಷ್ಟದಲ್ಲೇ ಕರ್ತವ್ಯ ನಿರತರಾಗಿದ್ದಾರೆ.

ಆರೋಗ್ಯ ಕೇಂದ್ರ ಹಿಂದೆ ಜಿ.ಪಂ. ಅಧೀನದಲ್ಲಿತ್ತು. ನಂತರದಲ್ಲಿ ಮೈಸೂರಿನ ಫೌಂಡೇಷನ್‌ವೊಂದು ನಿರ್ವಹಣೆ ಜವಾಬ್ದಾರಿಯನ್ನು ಹೊತ್ತಿದೆ. ಈಗ ಇಲ್ಲಿನ ಸಿಬ್ಬಂದಿ ತಿಂಗಳ ವೇತನಕ್ಕೆ ಕಾಯುವ ಸ್ಥಿತಿ ನಿರ್ಮಾಣವಾಗಿದೆ. ಇದರಿಂದ ಕುಟುಂಬ ನಿರ್ವಹಣೆ ಅಸಾಧ್ಯವಾಗಿದ್ದು, ಸಾಲ ಹೊರೆ ಹೆಗಲೇರಿದೆ ಎಂದು ಹೆಸರು ಹೇಳಲು ಇಚ್ಛಿಸದ ಆರೋಗ್ಯ ಕೇಂದ್ರ ಸಿಬ್ಬಂದಿ ನೋವು ತೋಡಿಕೊಂಡಿದ್ದಾರೆ.

ಆರೋಗ್ಯ ಕೇಂದ್ರದಲ್ಲಿ ಒಬ್ಬರು ವೈದ್ಯ ಮತ್ತು 6 ಮಂದಿ ಕಿರಿಯ ಆರೋಗ್ಯ ಸಹಾಯಕರು, ತಲಾ ಒಬ್ಬರು ಶುಶ್ರೂಷಕಿ, ಶುಶ್ರೂಷಕ ಮತ್ತು ಪ್ರಯೋಗ ತಜ್ಞರು, ಫಾರ್ಮಸಿಸ್ಟ್‌, 4 ಡಿ ಗ್ರೂಪ್‌ ನೌಕರರು ಸೇರಿ 19 ಜನ ಸಿಬ್ಬಂದಿ ಇಲ್ಲಿಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ನಿತ್ಯ ನೂರಾರು ರೋಗಿಗಳು ಇಲ್ಲಿಗೆ ಬಂದು ಚಿಕಿತ್ಸೆ ಪಡೆಯುತ್ತಿದ್ದಾರೆ.

ತಕ್ಷಣ ವೇತನ ಸಮಸ್ಯೆ ಪರಿಹರಿಸುವಂತೆ ಕೇಂದ್ರ ಸಿಬ್ಬಂದಿ ಒತ್ತಾಯಿಸಿದ್ದಾರೆ.

ಹೆಸರಿಗಷ್ಟೇ ಫೌಂಡೇಶನ್‌ವೊಂದು ತಿತಿಮತಿ ಪ್ರಾಥಮಿಕ ಆರೋಗ್ಯ ಕೇಂದ್ರವನ್ನು ನಿರ್ವಹಿಸುತ್ತಿದೆ. ಆದರೆ ಸೌಲಭ್ಯಗಳು ಜಿಲ್ಲಾಪಂಚಾಯಿತಿ ವ್ಯವಸ್ಥೆಯಲ್ಲೇ ನಡೆಯುತ್ತಿದೆ. ಖಾಸಗಿ ಸಂಸ್ಥೆಗಳಿಗೆ ನಿರ್ವಹಣೆ ಮಾಡಲು ಆರೋಗ್ಯ ಕೇಂದ್ರಗಳನ್ನು ನೀಡದಿರುವುದೇ ಒಳಿತು. ಸಿಬ್ಬಂದಿಗೆ ಸಮರ್ಪಕ ವೇತನ ಸಿಗದಿದ್ದರೆ ಅವರ ಕುಟುಂಬ ನಿರ್ವಹಣೆ ಹೇಗೆ?
-ಅನೂಪ್‌ಕುಮಾರ್‌, ಸದಸ್ಯರು, ಗ್ರಾಮ ಪಂಚಾಯಿತಿ, ತಿತಿಮತಿ.