ಮಡಿಕೇರಿ: ಶನಿವಾರ ನಿಧನ ಹೊಂದಿದ ಉತ್ತರ ಪ್ರದೇಶದ ಉದ್ಯಮಿ, ರಾಜಕೀಯ ಮುಖಂಡ ಅಮರ್ ‌ಸಿಂಗ್‌ ಕರ್ನಾಟಕದ ಕೊಡಗಿನಲ್ಲೂ ಉದ್ಯಮ ಹೊಂದಿದ್ದರು.

ಕಾವೇರಿ ಕಣಿವೆಯ ಪ್ರಮುಖ ಜಲಾಶಯಗಳಲ್ಲಿ ಒಂದಾದ ಹಾರಂಗಿಯಲ್ಲಿರುವ ‘ಹಾರಂಗಿ ಜಲ ವಿದ್ಯುತ್‌ ಯೋಜನೆ’ಯ ಮಾಲೀಕತ್ವ ಹೊಂದಿರುವ ಎನರ್ಜಿ ಡೆವಲಪ್‌ಮೆಂಟ್‌ ಕಾಪೊರೇಷನ್‌ ಲಿಮಿಟೆಡ್‌ (ಇಡಿಸಿಎಲ್‌) ಸಂಸ್ಥೆಗೆ ಅಮರ್‌ಸಿಂಗ್‌ ಅವರೇ ಚೇರ್‌ಮನ್‌. ಇಡಿಸಿಎಲ್‌ನ ಮೊದಲ ಘಟಕ 1999ನೇ ಇಸವಿಯಲ್ಲಿಆರಂಭವಾಯಿತು. ಉದ್ಘಾಟನೆಗೆ ಅಂದು ಸಂಸ್ಥೆಯ ಪಾಲುದಾರರಲ್ಲಿಒಬ್ಬರಾಗಿದ್ದ ಬಾಲಿವುಡ್‌ನ ಬಿಗ್‌ ಬಿ ಅಮಿತಾಭ್‌ ಬಚ್ಚನ್‌ ಕೂಡ ಆಗಮಿಸಿದ್ದರು.

ನಂತರದ ಕೆಲವು ವರ್ಷ ಸಂಸ್ಥೆಯ ವಾರ್ಷಿಕ ಸಭೆ ಇಲ್ಲಿ ಆಯೋಜಿಸಲಾಗುತ್ತಿತ್ತು. ಇತ್ತೀಚಿನ ವರ್ಷಗಳಲ್ಲಿ ಈ ಪರಿಪಾಟ ನಿಂತುಹೋಗಿದ್ದು, ಅಮರ್‌ ಸಿಂಗ್‌ ನಾಲ್ಕು ವರ್ಷಗಳ ಹಿಂದೆ ಬಂದಿದ್ದೇ ಕೊನೆ ಭೇಟಿ ಎಂದು ಇಲ್ಲಿಯ ಸಿಬ್ಬಂದಿ ನೆನಪಿಸಿಕೊಳ್ಳುತ್ತಾರೆ.

ಪ್ರಭಾವಿ ಆಗಿದ್ದರೂ ಮರೆಯಾಗಿದ್ದ ನಾಯಕ, ಜನಮಾನಸದಲ್ಲಿ 'ಅಮರ'ರಾಗಿದ್ದ ಸಿಂಗ್‌



ಕೊಡಗು ಜಿಲ್ಲೆಯಲ್ಲಿ ಈ ಮಾದರಿಯ ಏಕೈಕ ವಿದ್ಯುತ್‌ ಉತ್ಪಾದನಾ ಕೇಂದ್ರ ಇದಾಗಿದ್ದು, ತಲಾ 4.5 ಮೆಗಾವ್ಯಾಟ್‌ ಸಾಮರ್ಥ್ಯ‌ದ ಎರಡು ಜನರೇಟರ್‌ಗಳು ಇಲ್ಲಿವೆ. 6 ಮೆಗಾ ವ್ಯಾಟ್‌ ಸಾಮರ್ಥ್ಯ‌ದ 2ನೇ ಘಟಕವೂ ಇಲ್ಲಿ ಕಾರ್ಯ ನಿರ್ವಹಿಸುತ್ತಿದೆ. ವಾರ್ಷಿಕ ಸುಮಾರು 30 ಮಿಲಿಯನ್‌ ಯೂನಿಟ್‌ಗಳಷ್ಟು ವಿದ್ಯುತ್‌ ಉತ್ಪಾದಿಸಿ ಕೆಪಿಟಿಸಿಎಲ್‌ಗೆ ಮಾರಾಟ ಮಾಡಲಾಗುತ್ತದೆ. ಮಳೆಗಾಲದ ಅವಧಿಯಲ್ಲಿ ಕಾಲುವೆಗೆ ಬಿಡುವ ನೀರನ್ನು ಅವಲಂಬಿಸಿ ವಿದ್ಯುತ್‌ ಘಟಕಗಳು ಕಾರ್ಯನಿರ್ವಹಿಸುತ್ತವೆ.