ಪುಲ್ವಾಮಾ ದಾಳಿಗೆ ಸಂಭ್ರಮ: ವ್ಯಾಪಾರಿ ವಿರುದ್ಧ ಕೇಸು

ಸೋಮವಾರಪೇಟೆ (ಕೊಡಗು): ಜಮ್ಮು ಕಾಶ್ಮೀರದ ಪುಲ್ವಾಮಾದಲ್ಲಿ ಯೋಧರ ಮೇಲೆ ಉಗ್ರರು ನಡೆಸಿದ ದಾಳಿಯನ್ನು ಬೆಂಬಲಿಸಿ ಪಟಾಕಿ ಸಿಡಿಸಿ ಸಂಭ್ರಮಿಸಿದ ಆರೋಪದಲ್ಲಿ ಸ್ಥಳೀಯ ವ್ಯಾಪಾರಿಯೊಬ್ಬರ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ.

ರೇಂಜರ್‌ ಬ್ಲಾಕ್‌ ನಿವಾಸಿ, ಪಟ್ಟಣದಲ್ಲಿ ಮೊಬೈಲ್‌, ಸ್ಟೇಷನರಿ ಅಂಗಡಿ ಮಳಿಗೆ ಹೊಂದಿರುವ ಕೆ.ಯು.ಸಂಶುದ್ದೀನ್‌ ಆರೋಪಿ. ಹಿಂದೂ ಜಾಗರಣಾ ವೇದಿಕೆಯ ತಾಲೂಕು ಅಧ್ಯಕ್ಷ ಎಂ.ಬಿ.ಉಮೇಶ್‌ ಅವರು ದೂರು ನೀಡಿದ ಹಿನ್ನೆಲೆಯಲ್ಲಿ ಪಟ್ಟಣ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಉಗ್ರರ ದಾಳಿ ನಡೆದ ಮರುದಿನ ಫೆ.15ರಂದು ಸಂಜೆ 7ರ ಸುಮಾರಿಗೆ ರೇಂಜರ್‌ ಬ್ಲಾಕ್‌ನಲ್ಲಿ ಸಂಶುದ್ದೀನ್‌ ಎಂಬವರ ಮನೆಯ ಮುಂದೆ ಪಟಾಕಿ ಸಿಡಿಸಲಾಗಿದೆ ಎಂದು ಪ್ರತ್ಯಕ್ಷದರ್ಶಿಗಳಾದ ಅಜಯ್‌ ಮತ್ತು ಸುಧಾಕರ್‌ ಶೆಟ್ಟಿ ನೀಡಿದ ಹೇಳಿಕೆ ಮೇರೆಗೆ ಠಾಣಾಧಿಕಾರಿ ಶಿವಶಂಕರ್‌ ಮೊಕದ್ದಮೆ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ.

ಬುಧವಾರ ಮಧ್ಯಾಹ್ನ ಆರ್‌ಎಸ್‌ಎಸ್‌ನ ತಾಲೂಕು ಕಾರ್ಯವಾಹ ಪದ್ಮನಾಭ, ಸಹ ಕಾರ್ಯವಾಹ ರಾಘವೇಂದ್ರ, ಹಿಂದೂ ಜಾಗರಣಾ ವೇದಿಕೆಯ ದರ್ಶನ್‌ ಜೋಯಪ್ಪ, ಸುಭಾಷ್‌ ತಿಮ್ಮಯ್ಯ, ನಗರಳ್ಳಿ ರಮೇಶ್‌, ಯಡವನಾಡು ರಮೇಶ್‌, ಬಿಜೆಪಿಯ ಮನುಕುಮಾರ್‌ ರೈ, ಜಿ.ಪಂ. ಸದಸ್ಯ ಬಿ.ಜೆ.ದೀಪಕ್‌, ಪಟ್ಟಣ ಪಂಚಾಯಿತಿ ಸದಸ್ಯರಾದ ಬಿ.ಆರ್‌.ಮಹೇಶ್‌, ಪಿ.ಕೆ.ಚಂದ್ರು ನೇತೃತ್ವದಲ್ಲಿ ಹಿಂದೂಪರ ಸಂಘಟನೆಗಳ ಕಾರ್ಯಕರ್ತರು ಠಾಣೆ ಎದುರು ಜಮಾಯಿಸಿ, ಆರೋಪಿ ವಿರುದ್ಧ ಕ್ರಮಕ್ಕೆ ಒತ್ತಾಯಿಸಿದರು.

ರಾತ್ರಿ ಘಟನಾ ಸ್ಥಳಕ್ಕೆ ತೆರಳಿ ಮಹಜರು ನಡೆಸಿದ ಪೊಲೀಸರು, ಆರೋಪಿಯ ವಿರುದ್ಧ 124(ಎ) ದೇಶದ ವಿರುದ್ಧ ಶತ್ರುತ್ವ, 153(ಬಿ) ದೇಶದ ಐಕ್ಯತೆಗೆ ಧಕ್ಕೆ ತರುವ ಆರೋಪದಡಿ ಮೊಕದ್ದಮೆ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ. ಆರೋಪಿ ಪರಾರಿಯಾಗಿದ್ದು, ಪೊಲೀಸರು ಶೋಧ ನಡೆಸುತ್ತಿದ್ದಾರೆ.