ಬೀದಿ ಬದಿಯಲ್ಲಿ ಸಂತ್ರಸ್ತರ ಬಟ್ಟೆ: ತನಿಖೆಗೆ ಆದೇಶ

ಮಡಿಕೇರಿ : ಇಂದಿರಾನಗರಕ್ಕೆ ತೆರಳುವ ರಸ್ತೆ ಬದಿಯಲ್ಲಿ ರಾಶಿ ರಾಶಿ ಬಟ್ಟೆ ಪತ್ತೆಯಾದ ಪ್ರಕರಣಕ್ಕೆ ಸಂಬಂಧಿಸಿದಂತೆ ತನಿಖೆ ನಡೆಸುವಂತೆ ಜಿಲ್ಲಾಧಿಕಾರಿ ಶ್ರೀವಿದ್ಯಾ ಪೊಲೀಸರಿಗೆ ಸೂಚನೆ ನೀಡಿದ್ದಾರೆ.

ದಾನಿಗಳಿಂದ ಸಂಗ್ರಹಿಸಿ ನಿರಾಶ್ರಿತರಿಗೆ ವಿತರಿಸಲು ಇಟ್ಟಿದ್ದ ಬಟ್ಟೆಗಳನ್ನು ಜಿಲ್ಲಾಡಳಿತ ಇಂದಿರಾನಗರದ ಮುಖ್ಯ ರಸ್ತೆಯಲ್ಲಿ ಸುರಿದಿದೆ ಎಂದು ಆರೋಪಿಸಿ ಅಲ್ಲಿನ ನಿವಾಸಿಗಳು ಪ್ರತಿಭಟನೆ ನಡೆಸಿರುವ ಬಗ್ಗೆ ವಿವಿಧ ಪತ್ರಿಕೆಗಳಲ್ಲಿ ಪ್ರಕಟವಾಗಿದೆ.

ಈ ಸಂಬಂಧ ಜಿಲ್ಲಾಡಳಿತ ಪರಿಶೀಲಿಸಿದ್ದು, ಇಂದಿರಾನಗರದ ನಿವಾಸಿ ರಾಜು ಮತ್ತು ಇತರೆ ಇಪ್ಪತ್ತು ಜನರು ತಮಗೆ ಬಟ್ಟೆ ಅವಶ್ಯಕತೆ ಇದ್ದು, ಬಟ್ಟೆ ನೀಡುವಂತೆ ವಿನಂತಿಸಿದ್ದರು. ಆ ನಿಟ್ಟಿನಲ್ಲಿ ಜಿಲ್ಲಾಡಳಿತ ಭವನದಲ್ಲಿರುವ ಪರಿಹಾರ ಸಾಮಗ್ರಿಗಳ ದಾಸ್ತಾನು ಕೇಂದ್ರದಿಂದ 5 ಬಂಡಲ್‌ ಹಳೇ ಬಟ್ಟೆಗಳನ್ನು ಪಡೆದುಕೊಂಡು ಸಿಟಿಎಂ 4505 ಸಂಖ್ಯೆಯ ವಾಹನದಲ್ಲಿ ಹೋಗಿರುವುದಾಗಿ ದಾಸ್ತಾನು ಕೇಂದ್ರದ ನೋಡಲ್‌ ಅಧಿಕಾರಿ ತಿಳಿಸಿದ್ದಾರೆ.

ಬಟ್ಟೆಯ ಅವಶ್ಯಕತೆ ಇದೆ ಎಂದು ವಿನಂತಿಸಿ ಪಡೆದುಕೊಂಡು ಉಪಯೋಗಿಸದೆ ಬಿಸಾಡುವುದರ ಮೂಲಕ ಜಿಲ್ಲಾಡಳಿತಕ್ಕೆ ಮುಜುಗರ ಉಂಟು ಮಾಡಿದ್ದಾರೆ. ಆದ್ದರಿಂದ ಈ ಬಗ್ಗೆ ತನಿಖೆ ನಡೆಸಿ ಸಂಬಂಧಪಟ್ಟವರ ವಿರುದ್ಧ ಸೂಕ್ತ ಕಾನೂನು ಕ್ರಮವಹಿಸಲು ಹಾಗೂ ತೆಗೆದುಕೊಂಡ ಕ್ರಮದ ಬಗ್ಗೆ ವರದಿ ನೀಡುವಂತೆ ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿಯವರಿಗೆ ಜಿಲ್ಲಾಧಿಕಾರಿ ಪಿ.ಐ.ಶ್ರೀವಿದ್ಯಾ ಅವರು ಪತ್ರ ಬರೆದಿದ್ದಾರೆ.