ಶಿಥಿಲಾವಸ್ಥೆಯಲ್ಲಿ ಸೇತುವೆ: ಅಪಾಯಕ್ಕೆ ಆಹ್ವಾನ

ಸೋಮವಾರಪೇಟೆ: ಗರ್ವಾಲೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಕಿಕ್ಕರಳ್ಳಿ ಸೇತುವೆ ಶಿಥಿಲಾವಸ್ಥೆ ತಲುಪಿದ್ದು, ಅನಾಹುತಕ್ಕೆ ಆಹ್ವಾನ ನೀಡುತ್ತಿದೆ.

ಮಾದಾಪುರ, ಗರ್ವಾಲೆ, ಸೂರ್ಲಬ್ಬಿ, ಕಿಕ್ಕರಳ್ಳಿ, ಬೆಟ್ಟದಕೊಪ್ಪ, ಶಾಂತಳ್ಳಿ ಸಂಪರ್ಕ ರಸ್ತೆಯಲ್ಲಿ ಈ ಸೇತುವೆ ಇದ್ದು, ಟಿಂಬರ್‌ ಲಾರಿಗಳು, ಮರಳು ಸಾಗಿಸುವ ಟಿಪ್ಪರ್‌ಗಳು, ಖಾಸಗಿ ಕಾರುಗಳು ಇದೇ ಹಳೆಯದಾದ ಸೇತುವೆ ಮೇಲೆ ಸಂಚರಿಸುತ್ತವೆ.

ವಾರ್ಷಿಕವಾಗಿ 400ರಿಂದ 500 ಇಂಚಿನಷ್ಟು ಮಳೆ ಕಿಕ್ಕರಳ್ಳಿಯ ಸುತ್ತಮುತ್ತಲ ಗ್ರಾಮದಲ್ಲಿ ಸುರಿಯುತ್ತದೆ. ಪ್ರತಿ ವರ್ಷ ಜೂನ್‌, ಜುಲೈ, ಆಗಸ್ಟ್‌ ತಿಂಗಳಲ್ಲಿ ಬೀಳುವ ಧಾರಾಕಾರ ಮಳೆಗೆ ಸೇತುವೆಯಲ್ಲಿ ನೀರು ರಭಸದಿಂದ ಹರಿಯುತ್ತದೆ. ಇಂತಹ ಸಂದರ್ಭದಲ್ಲಿ ವಾಹನಗಳು ತೆರಳುವಾಗ ಸೇತುವೆ ಕುಸಿದರೆ ಅನಾಹುತವಾಗಬಹುದು. ಅಲ್ಲದೇ, ಸೇತುವೆ ಸಮೀಪ ಇಳಿಜಾರು ಪ್ರದೇಶವಾಗಿದ್ದು, ಆತಂಕ ಎದುರಾಗಿದೆ. ಕೂಡಲೇ ಹೊಸ ಸೇತುವೆ ನಿರ್ಮಾಣವಾಗಬೇಕು ಎಂದು ಗ್ರಾಮಸ್ಥರು ಒತ್ತಾಯಿಸಿದ್ದಾರೆ.