17ರಂದು ಜಿಲ್ಲಾ ಮಟ್ಟದ ಮುಕ್ತ ಕಬಡ್ಡಿ

ಸಿದ್ದಾಪುರ: ವಿ ಸೆವೆನ್‌ ಯುವಕ ಸಂಘದ 21ನೇ ವಾರ್ಷಿಕೋತ್ಸವ ಅಂಗವಾಗಿ ಸಿದ್ದಾಪುರ ಚರ್ಚ್‌ ಮೈದಾನದಲ್ಲಿ ಹೊನಲು ಬೆಳಕಿನ ಜಿಲ್ಲಾ ಮಟ್ಟದ ಮುಕ್ತ ಕಬಡ್ಡಿ ಪಂದ್ಯಾಟ ಆಯೋಜಿಸಲಾಗಿದೆ ಎಂದು ಸಂಘದ ಅಧ್ಯಕ್ಷ ಎಂ.ಎಚ್‌ ಮೂಸ ತಿಳಿಸಿದ್ದಾರೆ.

ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, '' ಜಿಲ್ಲಾ ಕಬಡ್ಡಿ ಅಸೋಸಿಯೇಷನ್‌ ಸಹಕಾರದೊಂದಿಗೆ ಪಂದ್ಯಾವಳಿ ಮಾ.17ರಂದು ನಡೆಯಲಿದೆ. ಹಲವು ವರ್ಷಗಳಿಂದಲೂ ಗ್ರಾಮೀಣ ಕ್ರೀಡೆಯಾದ ಕಬಡ್ಡಿ ಪಂದ್ಯಾವಳಿ ಆಯೋಜಿಸಿ ಜಿಲ್ಲೆಯ ಯುವ ಕ್ರೀಡಾಪಟುಗಳಿಗೆ ಅವಕಾಶ ನೀಡಲಾಗುತ್ತಿದ್ದು, ಜಿಲ್ಲೆಯ 25ಕ್ಕೂ ಹೆಚ್ಚು ತಂಡಗಳು ಹೆಸರು ನೋಂದಾಯಿಸಿಕೊಂಡು ಪಂದ್ಯಾವಳಿಯಲ್ಲಿ ಭಾಗವಹಿಸಲಿವೆ. ಉದ್ಘಾಟನಾ ಕಾರ್ಯಕ್ರಮ ದಂದು ಸಾಧಕರಿಗೆ ಸನ್ಮಾನ ಮಾಡಲಾಗುತ್ತಿದೆ . ಜಿಲ್ಲೆಯ ಸಮಾಜ ಸೇವಕರು ಹಾಗೂ ದಾನಿಗಳು ಭಾಗವಹಿಸಲಿದ್ದಾರೆ,'' ಎಂದರು.

''ಪ್ರಥಮ ವಿಜೇತ ತಂಡಕ್ಕೆ 11,111ರೂ. ಮತ್ತು ಟ್ರೋಫಿ, ದ್ವಿತೀಯ ತಂಡಕ್ಕೆ 7,777 ರೂ. ಮತ್ತು ಟ್ರೋಫಿ ,ತೃತೀಯ ತಂಡಕ್ಕೆ 5,555 ರೂ ಮತ್ತು ಟ್ರೋಫಿ

ಹಾಗೂ ಚತುರ್ಥ ಬಹುಮಾನ 3,333 ರೂ. ಟ್ರೋಫಿ ನೀಡಲಾಗುವುದು.

ಇದರೊಂದಿಗೆ ಪಂದ್ಯ ಪುರುಷೋತ್ತಮ, ಉತ್ತಮ ದಾಳಿಗಾರ, ಉತ್ತಮ ಹಿಡಿತಗಾರ, ಉತ್ತಮ ತಂಡಗಳಿಗೆ ಬಹುಮಾನ ನೀಡಲಾಗುವುದು ,''ಎಂದರು.

ಉಪಾಧ್ಯಕ್ಷ ಅಯ್ಯ, ಪ್ರಧಾನ ಕಾರ್ಯದರ್ಶಿ ವಿ.ಕೆ.ಜಾಫರ್‌, ಸಹ ಕಾರ್ಯದರ್ಶಿ ಸಂತೋಷ , ಸಮಿತಿಯ ಪ್ರಮುಖರಾದ ಖಾದರ್‌, ಚಂದ್ರ , ವರ್ಗೀಸ್‌ , ನಾಸೀರ್‌, ಶೇಖರ್‌ ಹಾಜರಿದ್ದರು.