ದಾನಿಗಳು ನೀಡಿದ ಬಟ್ಟೆ ಬೀದಿಪಾಲು

ಮಡಿಕೇರಿ: ದಾನಿಗಳಿಂದ ಸಂಗ್ರಹಿಸಿ ನಿರಾಶ್ರಿತರಿಗೆ ವಿತರಿಸಲು ಇಟ್ಟಿದ್ದ ಬಟ್ಟೆಗಳನ್ನು ಜಿಲ್ಲಾಡಳಿತ ಇಂದಿರಾನಗರದ ಮುಖ್ಯರಸ್ತೆಯಲ್ಲಿ ಸುರಿದಿದೆ ಎಂದು ಆರೋಪಿಸಿ ಅಲ್ಲಿನ ನಿವಾಸಿಗಳು ಪ್ರತಿಭಟನೆ ನಡೆಸಿದರು.

ಇಂದಿರಾನಗರದಲ್ಲಿ ಸಾಕಷ್ಟು ಮಂದಿ ಮನೆ, ಮಠ ಎಲ್ಲವನ್ನೂ ಕಳೆದುಕೊಂಡು ನಿರಾಶ್ರಿತರಾಗಿದ್ದಾರೆ. ಈಗಾಗಲೇ ಸಾಕಷ್ಟು ನೊಂದಿರೋ ಅವರಿಗೆ ಜಿಲ್ಲಾಡಳಿತ ನೋವಿನ ಮೇಲೆ ನೋವು ಕೊಡುತ್ತಿದೆ. ದಾನಿಗಳು ಸಂಗ್ರಹಿಸಿ ನೀಡಿರೋ ಬಟ್ಟೆಗಳನ್ನು ತಂದು ಇಂದಿರಾನಗರದ ಮುಖ್ಯರಸ್ತೆಯಲ್ಲಿ ಸುರಿದಿದ್ದಾರೆ ಎಂದು ಆರೋಪಿಸಿದ ನಿವಾಸಿಗಳು ಜಿಲ್ಲಾಡಳಿತದ ವಿರುದ್ಧ ವಾಗ್ದಾಳಿ ನಡೆಸಿ ಸ್ಥಳದಲ್ಲೇ ಪ್ರತಿಭಟಿಸಿದರು.

ಇನ್ನು ಈ ರೀತಿ ಬಟ್ಟೆಗಳನ್ನು ಸುರಿದಿರೋ ಕಡೆ ನಾಯಿಗಳು ಬಟ್ಟೆಯ ಮೇಲೆ ಬಂದು ಮಲಗಿಕೊಂಡಿದ್ದವು. ಜನರನ್ನು ನಾಯಿಗಳಂತೆ ನೋಡಬೇಡಿ. ನಿರಾಶ್ರಿತರಿಗಾಗಿ ನೀಡಿರೋ ವಸ್ತುಗಳನ್ನು ಅವರಿಗೆ ಸರಿಯಾಗಿ ತಲುಪಿಸಿ. ಈ ರೀತಿ ತಂದು ಸುರಿಯುವುದಕ್ಕಿಂತ ಅಗತ್ಯ ಇದ್ದವರಿಗೆ ನೀಡಿದರೆ ಉಪಕಾರವಾದರೂ ಆಗುತ್ತೆ ಎಂದು ಸ್ಥಳೀಯರು ಆಕ್ರೋಶ ವ್ಯಕ್ತಪಡಿಸಿದ್ದರು.

ಇಂದಿರಾನಗರ ಸ್ಲಂ ಏರಿಯಾ ನಿಜ. ಹಾಗಂತ ನಮಗೆ ಗತಿ ಇಲ್ಲ ಎಂದು ಹಳೆ ಬಟ್ಟೆಗಳನ್ನು ಎಸೆದು ಹೋಗಿದ್ದೀರ? ಈವರೆಗೆ ಇಂದಿರಾನಗರಕ್ಕೆ ಒಂದು ಬಾರಿಯಾದರೂ ಭೇಟಿ ನೀಡಿದ್ದೀರ? ನಮ್ಮನ್ನೇನು ಭಿಕ್ಷೆ ಬೇಡೋರು ಅನ್ಕೊಂಡಿದ್ದೀರ? ಮೊದಲು ಇದನ್ನು ತೆರವುಗೊಳಿಸಿ ಮೊದಲೇ ಇದು ಸ್ಲಂ. ಮತ್ತಷ್ಟು ಈ ಏರಿಯಾಗಳನ್ನು ಹೊಲಸು ಮಾಡಬೇಡಿ ಎಂದು ಇಂದಿರಾನಗರ ನಿವಾಸಿ ಸೋಮಶೇಖರ್‌ ಅಸಮಾಧಾನ ವ್ಯಕ್ತಪಡಿಸಿದರು.

ನಿವಾಸಿಗಳ ಪ್ರತಿಭಟನೆಯಿಂದ ಎಚ್ಚೆತ್ತುಕೊಂಡ ಜಿಲ್ಲಾಡಳಿತ, ಅಲ್ಲಿಂದ ಬಟ್ಟೆಗಳನ್ನು ಮತ್ತೆ ಜಿಲ್ಲಾಡಳಿತ ಭವನಕ್ಕೆ ಸಾಗಿಸಿತು.