ಮಲ್ಲಳ್ಳಿ ಫಾಲ್ಸ್‌ ಬಳಿ ಬೆಟ್ಟ ಕುಸಿತ: ಆತಂಕ

ಸೋಮವಾರಪೇಟೆ: ಅತಿ ಹೆಚ್ಚು ಮಳೆ ಬೀಳುವ ಶಾಂತಳ್ಳಿ ಹೋಬಳಿಯ ಪ್ರವಾಸಿಗರ ಕೆಲವು ಮೆಚ್ಚಿನ ತಾಣಗಳಲ್ಲಿ ಭೂಕುಸಿತ ಸಂಭವಿಸುತ್ತಿದ್ದು, ಗ್ರಾಮೀಣ ಜನರು ಆತಂಕದಲ್ಲಿದ್ದಾರೆ.

ಮಲ್ಲಳ್ಳಿ ಜಲಪಾತದ ಸಮೀಪವಿರುವ ಎಡಭಾಗದ ಬೆಟ್ಟದಲ್ಲಿ ಭೂಕುಸಿತವಾಗುತ್ತಿದೆ. ಜಲಪಾತಕ್ಕೆ ಇಳಿಯುವ 25 ಮೆಟ್ಟಲುಗಳು ಹಾಗೂ ತಂತಿಬೇಲಿ ಕುಸಿದಿದೆ. ಮಲ್ಲಳ್ಳಿ ಗ್ರಾಮದಲ್ಲಿ ಹತ್ತು ಎಕರೆಯಷ್ಟು ಗದ್ದೆ ಜಲಾವೃತವಾಗಿದೆ.
ಬಾಚಳ್ಳಿ ಸಮೀಪವಿರುವ ಮೇರನಕೋಟೆ ಬೆಟ್ಟದ ಎರಡು ಬದಿಯಲ್ಲೂ ಕುಸಿತವಾಗುತ್ತಿದ್ದು, ಕೋಡಳ್ಳಿ, ಬಾಚಳ್ಳಿ, ಕುಮಾರಳ್ಳಿ, ಪಟ್ಲ, ಮಾಗೇರಿ ಗ್ರಾಮದಲ್ಲಿ ನೂರಾರು ಎಕರೆ ಕೃಷಿ ಭೂಮಿಗೆ ಹಾನಿಯಾಗಿದೆ. ಸಂಕಷ್ಟಕ್ಕೆ ಸಿಲುಕಿದವರು ಬಾಚಳ್ಳಿ ನಿರಾಶ್ರಿತರ ಕೇಂದ್ರದಲ್ಲಿ ಆಶ್ರಯ ಪಡೆದಿದ್ದಾರೆ.

ಶಾಂತಳ್ಳಿ ಹೋಬಳಿಯಲ್ಲಿ ಮಳೆಯಿಂದ ಭಾರಿ ಹಾನಿ ಸಂಭವಿಸಿದೆ. ಒಂದು ಕಡೆ ಭೂಕುಸಿತದಿಂದ ನಷ್ಟ ಸಂಭವಿಸಿದರೆ, ಇನ್ನೊಂದು ಭಾಗದಲ್ಲಿ ಭತ್ತ ನಾಟಿ ಮೇಲೆ ನೀರು ನಿಂತು ಹಾನಿ ಸಂಭವಿಸಿದೆ. ಕೃಷಿಕರು ಸುಧಾರಿಸಿಕೊಳ್ಳಲು ಸಾಧ್ಯವಾಗದಷ್ಟು ಸಂಕಷ್ಟದಲ್ಲಿದ್ದಾರೆ. ಕೂಡಲೇ, ರೈತರ ಸಂಪೂರ್ಣ ಸಾಲವನ್ನು ಮನ್ನಾ ಮಾಡಬೇಕು. ಕೃಷಿ ಚಟುವಟಿಕೆಗೆ ಸೌಲಭ್ಯ ಕಲ್ಪಿಸಬೇಕು ಎಂದು ಶಾಂತಳ್ಳಿ ಕೃಷಿ ಸಹಕಾರ ಸಂಘದ ಅಧ್ಯಕ್ಷ ಕುಂದಳ್ಳಿ ದಿನೇಶ್‌ ಒತ್ತಾಯಿಸಿದ್ದಾರೆ.