ಮಡಿಕೇರಿ: 22ನೇ ವರ್ಷದ ಕೊಡವ ಹಾಕಿ ಹಬ್ಬ ಕುಲ್ಲೇಟಿರ ಕಪ್ ಪಂದ್ಯದ ಟೈಸ್ ಬಿಡುಗಡೆಯಾಗಿದ್ದು, ಒಟ್ಟು 229 ತಂಡಗಳು ಈ ಬಾರಿ ಸೆಣಸಲಿವೆ.
ಇಲ್ಲಿ ತನಕ ನಡೆದ ಕೊಡವ ಹಾಕಿ ಹಬ್ಬದಲ್ಲಿ ಅತೀ ಹೆಚ್ಚು ತಂಡಗಳು ಭಾಗವಹಿಸಿದ ಹೆಗ್ಗಳಿಕೆಗೆ ಕುಲ್ಲೇಟಿರ ಕಪ್ ಪಾತ್ರವಾಗಲಿದೆ. ಕುಲ್ಲೇಟಿರ ಕುಟುಂಬ 333 ತಂಡಗಳ ನೋಂದಣಿಗೆ ಪ್ರಯತ್ನ ನಡೆಸಿದರೂ ಕೊನೆ ಗಳಿಗೆಯಲ್ಲಿ ಕೆಲವು ತಂಡಗಳನ್ನು ಸೇರಿಸಲು ಸಾಧ್ಯವಾಗದ ಹಿನ್ನೆಲೆಯಲ್ಲಿ 329ಕ್ಕೆ ತೃಪ್ತಿ ಪಟ್ಟುಕೊಂಡಿದೆ. ಕಳೆದ ವರ್ಷ ನಾಪೋಕ್ಲುವಿನಲ್ಲಿ ನಡೆದ ಬಿದ್ದಾಟಂಡ ಕಪ್ನಲ್ಲಿ 310 ತಂಡಗಳು ಹೆಸರು ನೋಂದಾಯಿಸಿಕೊಂಡಿದ್ದು, 304 ತಂಡಗಳು ಭಾಗವಹಿಸಿದ್ದವು. ಇದೀಗ ಬಿದ್ದಾಟಂಡ ಕಪ್ ನಡೆದ ನಾಪೋಕ್ಲು ಚೆರಿಯಪರಂಬುವಿನ ಜನರಲ್ ತಿಮ್ಮಯ್ಯ ಕ್ರೀಡಾಂಗಣದಲ್ಲಿಯೇ ಕುಲ್ಲೇಟಿರ ಕಪ್ ನಡೆಯಲಿದೆ.
ಏ.15ರಂದು ಕುಲ್ಲೇಟಿರ ಕಪ್ ಉದ್ಘಾಟನೆಯಾಗಲಿದೆ. ನಂತರ ಮೂರು ಮೈದಾನದಲ್ಲಿ ಪಂದ್ಯ ನಡೆಯಲಿದೆ. ಮೇ 17 ರಂದು ಕ್ವಾರ್ಟರ್ ಫೈನಲ್ಸ್, ಮೇ 18ರಂದು ಸೆಮಿಫೈನಲ್ಸ್ ನಡೆಯಲಿದೆ. ಮೇ 19ರಂದು ಯಾವುದೇ ಪಂದ್ಯ ಇರುವುದಿಲ್ಲ. ಮೇ 20ರಂದು ಮಧ್ಯಾಹ್ನ 12.30ಕ್ಕೆ ಫೈನಲ್ಸ್ ನಡೆಯಲಿದೆ.