ಸಚಿವ ಸಾರಾ ಹೆಸರಿನಲ್ಲಿ ಹಣ ವಂಚನೆ: ಇಬ್ಬರ ಸೆರೆ

ಮಡಿಕೇರಿ: ಜಿಲ್ಲಾ ಉಸ್ತುವಾರಿ ಸಚಿವ ಸಾ.ರಾ. ಮಹೇಶ್‌ ಹೆಸರಿನಲ್ಲಿ ವ್ಯಕ್ತಿಯೊಬ್ಬರಿಗೆ 1.01 ಲಕ್ಷ ರೂ. ವಂಚಿಸಿದ ಇಬ್ಬರು ಆರೋಪಿಗಳನ್ನು ಮಡಿಕೇರಿ ನಗರ ಪೊಲೀಸರು ಬಂಧಿಸಿದ್ದಾರೆ.

ಬೆಂಗಳೂರು ಗ್ರಾಮಾಂತರ ಜಿಲ್ಲೆ ಆನೇಕಲ್‌ ತಾಲೂಕಿನ ಬ್ಯಾಡರಪೇಟೆ ನಿವಾಸಿ ಸಯ್ಯದ್‌ ಮುಬಾರಕ್‌ ಮತ್ತು ಅದೇ ಊರಿನ ಸಯ್ಯದ್‌ ಖಲೀಲ್‌ ಬಂಧಿತ ಆರೋಪಿಗಳು. ಇವರನ್ನು ತಮಿಳುನಾಡಿನ ಊಟಿಯಲ್ಲಿ ಬಂಧಿಸಿ ಕರೆತರಲಾಗಿದ್ದು, ನ್ಯಾಯಾಂಗ ವಶಕ್ಕೆ ಒಪ್ಪಿಸಲಾಗಿದೆ.

ಏನಿದು ಪ್ರಕರಣ?: ಬೆಂಗಳೂರಿನ ಶಿವಲಿಂಗಯ್ಯ ಎಂಬವರು 2018ರ ನ. 3ರಂದು ಕುಶಾಲನಗರದ ಕೂಡ್ಲೂರು ಗ್ರಾಮದಲ್ಲಿ ಹೊಂದಿರುವ ಜಮೀನಿಗೆ ದಾಖಲೆ ಮಾಡಿಸಲು ಮಡಿಕೇರಿಯಲ್ಲಿರುವ ಕೊಡಗು ಜಿಲ್ಲಾಧಿಕಾರಿ ಕಚೇರಿಗೆ ಬಂದಿದ್ದರು. ಈ ವೇಳೆ ಆರೋಪಿ ಸಯ್ಯದ್‌ ಮುಬಾರಕ್‌ ತಾನು ದಾಖಲಾತಿ ಮಾಡಿಸಿಕೊಡುವುದಾಗಿ ಹೇಳಿ ಸಚಿವ ಸಾ.ರಾ. ಮಹೇಶ್‌ ಗೆ ಕರೆ ಮಾಡುವಂತೆ ಇನ್ನೊಬ್ಬ ಆರೋಪಿ ಫೋನ್‌ ಮಾಡಿ ನಂಬಿಸಿ 1 ಲಕ್ಷ ದ 1 ಸಾವಿರ ರೂಪಾಯಿ ಪಡೆದುಕೊಂಡು ವಂಚಿಸಿದ್ದ. ಈ ಸಂಬಂಧ ದಾಖಲಾಗಿದ್ದ ದೂರಿನ ಹಿನ್ನೆಲೆಯಲ್ಲಿ ಕಾರ್ಯಾಚರಣೆ ನಡೆಸಿದ ಪೊಲೀಸರು ಇಬ್ಬರನ್ನು ಬಂಧಿಸಿದ್ದಾರೆ. ಬೆಂಗಳೂರಿನ ಕೆ.ಆರ್‌. ಪುರಂ, ಕೆಂಗೇರಿ, ಕೋರಮಂಗಲ, ಮಡಿವಾಳ, ಜಯನಗರ, ಜಿಗಣಿ, ಮಾಲೂರು ಠಾಣೆಗಳಲ್ಲೂ ಈ ಇಬ್ಬರ ವಿರುದ್ಧ 10ಕ್ಕೂ ಹೆಚ್ಚು ಪ್ರಕರಣಗಳು ದಾಖಲಾಗಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಎಸ್‌ಪಿ ಡಾ. ಸುಮನ ಡಿ. ಪನ್ನೇಕರ್‌ ಮಾರ್ಗದರ್ಶನದಲ್ಲಿ ನಡೆದ ಕಾರ್ಯಾಚರಣೆಯಲ್ಲಿ ಡಿವೈಎಸ್ಪಿ ಕೆ. ಸುಂದರ್‌ರಾಜ್‌, ವೃತ್ತ ನಿರೀಕ್ಷ ಕ ಅನೂಪ್‌ ಮಾದಪ್ಪ, ಠಾಣಾಧಿಕಾರಿ ಷಣ್ಮುಗಂ, ಕೆ.ಕೆ. ದಿನೇಶ್‌, ಸಿಬ್ಬಂದಿ ಮಧುಸೂದನ್‌, ನಾಗರಾಜ್‌, ಕಡಗಣ್ಣವರ್‌ ಪಾಲ್ಗೊಂಡಿದ್ದರು.