ಮೈಸೂರು-ಕುಶಾಲನಗರ ರೈಲ್ವೆ ಮಾರ್ಗ: 1854.62 ಕೋಟಿ ಬಿಡುಗಡೆ

ಮಡಿಕೇರಿ: ಕೊಡಗಿನ ಗಡಿಭಾಗದ ತನಕ ರೈಲ್ವೆ ಸಂಪರ್ಕ ಕಲ್ಪಿಸುವ ಮೈಸೂರು-ಕುಶಾಲನಗರ ಮಾರ್ಗದ ಪ್ರಾಥಮಿಕ ಕೆಲಸಗಳಿಗೆ ರೈಲ್ವೆ ಇಲಾಖೆ 1854.62 ಕೋಟಿ ಬಿಡುಗಡೆ ಮಾಡಿದೆ.

ಈ ಸಂಬಂಧ ಬುಧವಾರ ಆದೇಶ ಹೊರಡಿಸಿರುವ ರೈಲ್ವೆ ಮಂಡಳಿ ಮೈಸೂರಿನ ಬೆಳಗೊಳದಿಂದ ಕುಶಾಲನಗರ ತನಕದ 87 ಕಿಲೋಮೀಟರ್‌ ಮಾರ್ಗಕ್ಕೆ ಸಂಬಂಧಿಸಿದಂತೆ ವಿವಿಧ ಕಾಮಗಾರಿಗಳಿಗೆ ಈ ಹಣ ಹಂಚಿಕೆ ಮಾಡಿದೆ. ಸಿವಿಲ್‌ ಕಾಮಗಾರಿಗೆ 1723.78 ಕೋಟಿ, ಎಲೆಕ್ಟ್ರಿಕಲ್‌ ಕೆಲಸಗಳಿಗೆ 70.91 ಕೋಟಿ, ಎಸ್‌ ಮತ್ತು ಟಿ ಕೆಲಸಗಳಿಗೆ 59.93 ಕೋಟಿಗಳನ್ನು ಇಲಾಖೆ ಹಂಚಿಕೆ ಮಾಡಿದೆ.

ಈ ಸಂಬಂಧ ಈಗಾಗಲೇ ಸರ್ವೆ ಕಾರ್ಯ ನಡೆದಿದ್ದು, ಕುಶಾಲನಗರ ಪಕ್ಕದ ಕಾವೇರಿ ನದಿ ಅಂಚಿನಲ್ಲಿರುವ ಪಿರಿಯಾಪಟ್ಟಣ ತಾಲೂಕಿನ ಚಿಕ್ಕಹೊಸೂರು ಬಳಿಯ ಗಿರುಗೂರು ತನಕ ರೈಲ್ವೆ ಮಾರ್ಗ ಬರಲಿದೆ. ಕುಶಾಲನಗರ ರೈಲ್ವೆ ನಿಲ್ದಾಣ ಗಿರುಗುರುವಿನಲ್ಲೇ ನಿರ್ಮಾಣ ಆಗಲಿದೆ ಎನ್ನಲಾಗುತ್ತಿದೆ. ಕೊಡಗಿಗೆ ರೈಲು ಯೋಜನೆ ಬರಲು ಪರಿಸರವಾದಿಗಳ ವಿರೋಧ ಇರುವುದರಿಂದ ಈ ಮಾರ್ಗ ಆಗುವುದಿಲ್ಲ ಎಂದು ಸಾರ್ವಜನಿಕ ವಲಯದಲ್ಲಿ ಚರ್ಚೆ ನಡೆಯುತ್ತಿತ್ತು. ಈ ನಡುವೆ ರೈಲ್ವೆ ಇಲಾಖೆಯ ಈ ಕ್ರಮದಿಂದ ಯೋಜನೆ ಜೀವಂತವಾಗಿದೆ ಎನ್ನುವುದು ಸಾಬೀತಾದಂತಾಗಿದೆ.