ನಾಪೋಕ್ಲು: ಮುಂದುವರೆದ ಮಳೆ

ನಾಪೋಕ್ಲು : ಮಳೆ ಮುಂದುವರೆದಿದ್ದು ಸ್ಥಳೀಯ ಚೆರಿಯಪರಂಬು ಪೈಸಾರಿಯಲ್ಲಿ ಪ್ರವಾಹ ಕಾಣಿಸಿಕೊಂಡಿದುದ, ನಿವಾಸಿಗಳನ್ನು ಗಂಜಿಕೇಂದ್ರಕ್ಕೆ ಕರೆದೊಯ್ಯಲಾಗಿದೆ.

ಚೆರಿಯಪರಂಬು ಬಳಿಯ ಕಲ್ಲುಮೊಟ್ಟೆಯ ಅಂಬೇಡ್ಕರ್‌ ಭವನದಲ್ಲಿ ನಿರಾಶ್ರಿತರಿಗೆ ಗಂಜಿ ಕೇಂದ್ರವನ್ನು ತೆರೆಯಲಾಗಿದೆ. ನಿರಂತರ ಮಳೆ ಜತೆಗೆ ಶೀತಗಾಳಿ ಹಾಗೂ ಚಳಿಯಿಂದ ಜನರು ಹೈರಾಣಾಗಿದ್ದಾರೆ.

ಕಾವೇರಿ ನದಿ ನೀರು ಕೊಟ್ಟಮುಡಿ ಬಳಿ ರಸ್ತೆಯ ಮೇಲೆ 3 ಅಡಿಗೂ ಹೆಚ್ಚು ಎತ್ತರದಲ್ಲಿ ಹರಿಯುತ್ತಿದ್ದು ನಾಪೋಕ್ಲುವಿಗೆ ಕಕ್ಕಬ್ಬೆ, ವಿರಾಜಪೇಟೆ ಮಾರ್ಗ ಬಿಟ್ಟರೆ, ಉಳಿದ ನಾಪೋಕ್ಲು- ಮಡಿಕೇರಿ ಸಂಪರ್ಕಿಸುವ ಕೊಟ್ಟಮುಡಿ,ನಾಪೋಕ್ಲು - ಮೂರ್ನಾಡು ಸಂಪರ್ಕಿಸುವ ಬೊಳಿಬಾಣೆ, ನಾಪೋಕ್ಲು- ಪಾರಾಣೆಗೆ ಸಂಪರ್ಕ ಕಲ್ಪಿಸುವ ಏತ್ತಕಡವು, ನಾಪೋಕ್ಲು - ಭಾಗಮಂಡಲ ಸಂಪರ್ಕ ರಸ್ತೆಯು ಸಂಪೂರ್ಣ ಕಡಿತಗೊಂಡಿದೆ.

ಇದರಿಂದ ಜನಜೀವನ ಅಸ್ತವ್ಯಸ್ತಗೊಂಡಿದ್ದು ಕೆಲವೆಡೆ ರಸ್ತೆ ಕುಸಿತ, ಬರೆ ಕುಸಿತ, ತೆರೆದ ಬಾವಿ ಕುಸಿತದ ಘಟನೆಗಳು ನಡೆದಿವೆ. ಮಳೆ ಮುಂದುವರೆದಿದ್ದು, ಆತಂಕ ಎದುರಾಗಿದೆ.