ಪುಷ್ಪಗಿರಿಯ ಕೋಟೆ ಬೆಟ್ಟದಲ್ಲಿ ನೀಲಿ ಕುರಿಂಜಿ ಪುಷ್ಟ: 7 ವರ್ಷದ ಬಳಿಕ ಅರಳಿ ಜನಾಕರ್ಷಿಸುತ್ತಿರುವ ವಿಶಿಷ್ಟ ಹೂವು

ತೇಲಪಂಡ ಕವನ್‌ ಕಾರ್ಯಪ್ಪ, ಸೋಮವಾರಪೇಟೆ

Vijaya Karnataka Web

ಪುಷ್ಪಗಿರಿ ವ್ಯಾಪ್ತಿಯ ಕೋಟೆಬೆಟ್ಟ ಈಗ ನೀಲಿ ಬಣ್ಣ ಬಳಿದ ದೊಡ್ಡ ಗೋಡೆಯಂತೆ ಕಂಡುಬರುತ್ತಿದೆ.

7 ವರ್ಷಗಳ ನಂತರ ಇಲ್ಲಿ ಅಪರೂಪದ ಕುರಿಂಜಿ ಹೂವು ಅರಳಿರುವುದೇ ಇದಕ್ಕೆ ಕಾರಣ. ನಿಸರ್ಗದ ಕೌತುಕವನ್ನು ಸವಿಯಲು ಪರಿಸರ ಪ್ರಿಯರು ಕೋಟೆ ಬೆಟ್ಟದ ಕಡೆಗೆ ಹೆಜ್ಜೆ ಹಾಕುತ್ತಿದ್ದಾರೆ.

ಪಶ್ಚಿಮಘಟ್ಟ ಅರಣ್ಯ ವ್ಯಾಪ್ತಿಯಲ್ಲಿ ಮಾತ್ರ ಕಾಣಸಿಗುವ ಅಪರೂಪದ ಕುರಿಂಜಿ ಹೂವು ಕೊಡಗಿನ ಸೋಮವಾರಪೇಟೆ ತಾಲೂಕು ವ್ಯಾಪ್ತಿಯ ಕೋಟೆ ಬೆಟ್ಟ, ಕುಮಾರ ಪರ್ವತದಲ್ಲಿ ಅರಳುತ್ತದೆ. ಗುರ್ಗಿ ಎಂದೂ ಇದನ್ನು ಕರೆಯುತ್ತಾರೆ. ತಿಂಗಳುಗಳ ಕಾಲ ಸೌಂದರ್ಯ ಸವಿಯಬಹುದಾಗಿದೆ. ಈ ಹೂವಿಗೆ ಧಾರ್ಮಿಕವಾಗಿಯೂ ಇತಿಹಾಸವಿದೆ. ಪ್ರೇಮದ ಸಂಕೇತವಾಗಿ 'ಪ್ರೇಮದ ಹೂ' ಎಂದೂ ಕರೆಯುತ್ತಾರೆ.


ಮಳೆ, ಗಾಳಿ, ನೀರು, ಬೆಳಕು ಹಾಗೂ ಪ್ರಕೃತಿ ಸಮತೋಲನವಾಗಿದ್ದಾಗ ಮಾತ್ರ ಈ ಹೂ ಅರಳುತ್ತದೆ ಎನ್ನುತ್ತಾರೆ ಹಿರಿಯರು. ಈ ಹೂವು ಅರಳಿ ನಿಂತಾಗ ಕಾಂಡಗಳಲ್ಲಿ ಔಷಧೀಯ ಗುಣಗಳಿರುವುದರಿಂದ ವಿವಿಧ ಕಾಯಿಲೆಗೂ ಬಳಸುತ್ತಾರೆ.

ಇದರ ವೈಜ್ಞಾನಿಕ ಹೆಸರು ಸ್ಟೋರಬಿಲಂಥೆಸ್‌ ಕುಂತಿಯಾನ. ನೀಲಗಿರಿ ಬೆಟ್ಟವನ್ನು ಆ ಹೆಸರಿನಲ್ಲಿ ಗುರುತಿಸಲು ಈ ಹೂವೇ ಕಾರಣ. ಕುರಿಂಜಿ ಹೂವು 250 ಜಾತಿಗಳಲ್ಲಿ ಕಂಡು ಬರುತ್ತದೆ. ಈ ಪೈಕಿ 46 ಜಾತಿಯ ಹೂವುಗಳು ಭಾರತದಲ್ಲಿ ಇದೆ. 5, 7, 12, 14, 16 ವರ್ಷಗಳಿಗೆ ಒಮ್ಮೆ ಅರಳುವ ಜಾತಿಗಳೂ ಇದರಲ್ಲಿದೆ.


ಕುರಿಂಜಿ ಹೂವಿನ ಗಿಡ ಮೂವತ್ತರಿಂದ 60 ಸೆಂಟಿ ಮೀಟರ್‌ ಉದ್ದ ಬೆಳೆಯುತ್ತದೆ. ಹೂವು ಅರಳಿದಾಗ ಇದರ ಸೌಂದರ್ಯ ಸವಿಯಲು ಪ್ರಪಂಚದ ನಾನಾ ಭಾಗಗಳಿಂದಲೂ ಪರಿಸರಾಸಕ್ತರು ಬರುತ್ತಾರೆ. ಈ ಹೂವು ಕೊನೆಯದಾಗಿ 2006ರಲ್ಲಿ ಕೇರಳ ಹಾಗೂ ತಮಿಳುನಾಡಿನಲ್ಲಿ ಅರಳಿತ್ತು. 2018ರಲ್ಲಿ ಕುಮಾರಪರ್ವತದಲ್ಲೂ ಅರಳಿ ಗಮನ ಸೆಳೆದಿತ್ತು.