ಸರಕಾರಿ ಕಚೇರಿಗಳಲ್ಲಿ ಹಿರಿಯ ನಾಗರಿಕರಿಗೆ ಗೌರವ ಸಿಗಲಿ

ಸೋಮವಾರಪೇಟೆ: ಸರಕಾರಿ ಕಚೇರಿ, ಸಾರ್ವಜನಿಕ ಆಸ್ಪತ್ರೆ ಹಾಗೂ ಸಂಘ ಸಂಸ್ಥೆಗಳಲ್ಲಿ ಹಿರಿಯ ನಾಗರಿಕರಿಗೆ ಗೌರವ ಸಿಗುವಂತಾಗಬೇಕು ಎಂದು ಬಿಬಿಎಂಪಿ ವಿರೋಧ ಪಕ್ಷ ದ ಮಾಜಿ ನಾಯಕ ಎಂ.ಎನ್‌.ನಾಗರಾಜು ಅಭಿಪ್ರಾಯಪಟ್ಟರು.

ಸೋಮವಾರಪೇಟೆ ತಾಲೂಕು ಹಿರಿಯ ನಾಗರಿಕರ ಸೇವಾ ಟ್ರಸ್ಟ್‌ನ ವಾರ್ಷಿಕೋತ್ಸವದ ಅಂಗವಾಗಿ ಭಾನುವಾರ ಮಹಿಳಾ ಸಮಾಜದ ಸಭಾಂಗಣದಲ್ಲಿ ನಡೆದ ಸಮಾರಂಭದಲ್ಲಿ ಮಾತನಾಡಿದರು.

ಹಿರಿಯ ನಾಗರಿಕ ಶ್ರೇಯೋಬಿವೃದ್ಧಿಗಾಗಿ ಅಸ್ತಿತ್ವಕ್ಕೆ ಬಂದಿರುವ ಟ್ರಸ್ಟ್‌ ಹಿರಿಯರಿಗೆ ದಾರಿದೀಪವಾಗಬೇಕು. ನೊಂದ ಜೀವಗಳ ಕಷ್ಟಕ್ಕೆ ಸ್ಪಂದಿಸಬೇಕು ಎಂದು ಕಿವಿಮಾತು ಹೇಳಿದರು.

ಕೃಷಿಯ ಮೂಲಕ ಪ್ರಾಮಾಣಿಕ ಬದುಕು ಕಟ್ಟಿಕೊಳ್ಳಲು ಸಾಧ್ಯ. ಕೃಷಿ ಹಿರಿಯ ಜೀವಗಳಿಗೆ ನೆಮ್ಮದಿ ಬದುಕನ್ನು ಕಟ್ಟಿಕೊಟ್ಟಿದೆ. ಆದರೆ, ಪ್ರಕೃತಿ ವಿಕೋಪದಿಂದ ರೈತರು ಸಂಕಷ್ಟದಲ್ಲಿದ್ದಾರೆ. ಅತಿವೃಷ್ಟಿ, ಅನಾವೃಷ್ಟಿಗೆ ಯಾರೂ ಆತಂಕ ಪಡದೆ ತಮ್ಮ ವೃತ್ತಿಯನ್ನು ಮುಂದುವರಿಸಿ ಎಂದು ನಿವೃತ್ತ ಪೋಲೀಸ್‌ ವರಿಷ್ಠಾಧಿಕಾರಿ ಎಂ.ಎಸ್‌.ಶಿವಮೂರ್ತಿ ಹಿರಿಯ ನಾಗರಿಕರಿಗೆ ಧೈರ್ಯ ತುಂಬಿದರು.

ಹಿರಿಯ ನಾಗರಿಕರು ಸ್ವಾಭಿಮಾನಿಗಳು, ಕೊನೆ ಕಾಲದಲ್ಲಿ ಸಾಕಿದವರೆಲ್ಲ ಕೈಬಿಡುತ್ತಾರೆ. ನಾವು ಸರಕಾರಕ್ಕೆ ತೆರಿಗೆ ಕಟ್ಟಿದ್ದೇನೆ. ತೆರಿಗೆ ಹಣವನ್ನು ಕೆಲ ರಾಜಕಾರಣಿಗಳು ಹಾಗೂ ಅಧಿಕಾರಿಗಳು ಕೊಳ್ಳೆಹೊಡೆಯುತ್ತಾರೆ. ಹಿರಿಯ ನಾಗರಿಕರಿಗೆ 5ಸಾವಿರ ರೂ. ಮಾಸಾಶನ ನೀಡಬೇಕು ಎಂದು ಹಿರಿಯರಾದ ಜಿ.ವಿ.ಜಯರುದ್ರಪ್ಪ ಹೇಳಿದರು.

ಟ್ರಸ್ಟ್‌ನ ಅಧ್ಯಕ್ಷ ಎಂ.ಟಿ.ದಾಮೋದರ, ನಿವೃತ್ತ ನ್ಯಾಯಾಧೀಶ ಎಂ.ಆರ್‌.ದೇವಪ್ಪ, ನಿವೃತ್ತ ಮಾಹಿತಿ ಆಯುಕ್ತ ಜೆ.ಸಿ.ವಿರೂಪಾಕ್ಷ ಯ್ಯ, ಡಾ.ಬಿ.ಸಿ.ನವೀನ್‌ ಕುಮಾರ್‌, ಹಿರಿಯ ನಾಗರಿಕರಾದ ಜಿ.ಎಸ್‌.ಪ್ರಭುದೇವ್‌, ಎಚ್‌.ಸಿ.ನಾಗೇಶ್‌, ಎಸ್‌.ಪಿ.ಪ್ರಸನ್ನ, ಸಿ.ಕೆ.ಮಲ್ಲಪ್ಪ, ಎಸ್‌.ಎಂ.ಡಿ'ಸಿಲ್ವಾ ಇದ್ದರು.