ಮನೆಯೊಳಗೆ ನುಗ್ಗಿದ ಕಾಡಾನೆ: ಪ್ರಾಣಭೀತಿಯಲ್ಲಿ ಬದುಕುತ್ತಿದೆ ಕುಟುಂಬ..!

ಕೊಡಗು: ಮನೆಯೊಳಗೆ ನುಗ್ಗಿ ಕಾಡಾನೆಯೊಂದು ದಾಂಧಲೆ ನಡೆಸಿದ ಘಟನೆ ಕೊಡಗು ಜಿಲ್ಲೆಯ ವಿರಾಜಪೇಟೆ ತಾಲೂಕಿನ ಚೆನ್ನಂಗಿ ಬಸವನಹಳ್ಳಿ ಹಾಡಿಯಲ್ಲಿ ನಡೆದಿದೆ.

ನಿನ್ನೆ ರಾತ್ರಿ ಮನೆಯವರೆಲ್ಲ ನಿದ್ರಿಸಲು ತಯಾರಾಗುತ್ತಿದ್ದ ವೇಳೆ ಇದ್ದಕ್ಕಿದ್ದಂತೆ ಕಾಡಾನೆಯೊಂದು ಮನೆಗೆ ಲಗ್ಗೆ ಇಟ್ಟಿದ್ದು, ಆನೆ ದಾಳಿ ಮಾಡ್ತಿದ್ದಂತೆ ಮನೆಯಲ್ಲಿದ್ದವರೆಲ್ಲ ಓಡಿ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.

ಪೊನ್ನಂಪೇಟೆಯಲ್ಲಿ ಜಿಂಕೆ ಬೇಟೆ, ಮೂವರ ಬಂಧನ

ವಿರಾಜಪೇಟೆ ತಾಲೂಕಿನ ಪಾಲಿಬೆಟ್ಟ ಸಮೀಪದ ಚೆನ್ನಂಗಿ ಬಸವನಹಳ್ಳಿ ಹಾಡಿಯಲ್ಲಿ ಕೂಲಿ ಕಾರ್ಮಿಕರಾಗಿರುವ ಸೋಮುಣು ಚಂದ್ರ ಅವರು ತಮ್ಮ ಹೆಂಡತಿ ಮತ್ತು ಮೂವರು ಪುಟ್ಟ ಮಕ್ಕಳೊಂದಿಗೆ ಕಳೆದ ಕೆಲ ವರ್ಷಗಳಿಂದ ವಾಸ ಮಾಡುತ್ತಿದ್ದಾರೆ. ನಿನ್ನೆ ಏಕಾಏಕಿ ಮನೆಯೊಳಗೆ ನುಗ್ಗಿದ ಆನೆ ಆಹಾರ ಪದಾರ್ಥಗಳನ್ನು ತಿಂದು ಪಾತ್ರೆಗಳನ್ನು ತುಳಿದು ಹಾಕಿದೆ. ಅಲ್ಲದೇ ಮನೆಯ ಬಾಗಿಲನ್ನು ಒಡೆದು ಹಾಕಿದ್ದು, ಸೋಮುಣು ಅವರ ಮನೆ ಹಾನಿಗೊಳಗಾಗಿದೆ.

ಸಂಕಷ್ಟದಲ್ಲಿ ಕೊಡಗು ಪ್ರವಾಸೋದ್ಯಮ: ಎರಡು ವರ್ಷ ಪ್ರಾಕೃತಿಕ ವಿಕೋಪ, ಈಗ ಕೊರೊನಾ ಹಾವಳಿ

ಈ ಭಾಗದಲ್ಲಿ ಕಳೆದ ಕೆಲ ವರ್ಷಗಳಿಂದ ಕಾಡಾನೆಗಳ ಸಂಚಾರವಿದ್ದು, ಜನರು ಭಯ ಭೀತಿಯಿಂದಲೇ ದಿನದೂಡಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ಸದ್ಯ ಸೋಮುಣು ಅವರ ಮನೆ ಕಾಡಾನೆ ದಾಳಿಯಿಂದ ಹಾನಿಗೊಳಗಾಗಿದ್ದು, ಕೂಲಿ ಕಾರ್ಮಿಕರಾಗಿರುವ ಅವರು ಪರಿಹಾರ ನೀಡುವಂತೆ ಒತ್ತಾಯಿಸಿದ್ದು, ಸರ್ಕಾರದ ನೆರವಿಗಾಗಿ ಎದುರು ನೊಡುತ್ತಿದ್ದಾರೆ.

ಕೊಡಗಿನಲ್ಲಿ ಮತ್ತೆ 7 ಜನಕ್ಕೆ ಸೋಂಕು: 18ಕ್ಕೇರಿದ ಕಂಟೇನ್ಮೆಂಟ್‌ ಝೋನ್ಸ್‌!