ಕುಡಿಯಲು ಚಿಕ್ಲಿಹೊಳೆ ಡ್ಯಾಂನಿಂದ ನೀರು

ಮಡಿಕೇರಿ: ಕುಶಾಲನಗರಕ್ಕೆ ಕುಡಿಯುವ ನೀರಿನ ಅಗತ್ಯ ಇರುವುದರಿಂದ ಚಿಕ್ಲಿ ಹೊಳೆ ಜಲಾಶಯದಿಂದ 100 ಕ್ಯೂಸೆಕ್‌ ನೀರನ್ನು ಕಾವೇರಿ ನದಿಗೆ ಹರಿಸುವಂತೆ ಹಾರಂಗಿ ಯೋಜನೆಯ ಸಹಾಯಕ ಕಾರ್ಯಪಾಲಕ ಅಭಿಯಂತರರಿಗೆ ಜಿಲ್ಲಾಧಿಕಾರಿ ಆದೇಶಿಸಿದ್ದಾರೆ. ಜಿಲ್ಲೆಯಲ್ಲಿ ಕುಡಿಯುವ ನೀರಿನ ಸಮಸ್ಯೆ ಬಗೆಹರಿಸುವ ಸಲುವಾಗಿ ಶುಕ್ರವಾರ ಸಂಜೆ ತಮ್ಮ ಕಚೇರಿಯಲ್ಲಿ ಕರೆದಿದ್ದ ಸಭೆಯಲ್ಲಿ ಈ ಆದೇಶ ಮಾಡಿದ್ದಾರೆ.

ಕಾವೇರಿ ನದಿಗೆ ಯಾವುದೇ ಪಂಪ್‌ ಸೆಟ್‌ ಅಳವಡಿಸುವುದನ್ನೂ ನಿಷೇಧಿಸಲಾಗಿರುತ್ತದೆ. ಈ ಸಂಬಂಧ ಸೆಕ್ಷನ್‌ 144 ಕೂಡ ಜಾರಿಗೊಳಿಸಲಾಗಿದ್ದು, ಕಾವೇರಿ ನದಿಯಿಂದ ನೀರು ಎತ್ತುವುದು ಕಂಡು ಬಂದಲ್ಲಿ ಅವರ ವಿರುದ್ಧ ಕಾನೂನು ಕ್ರಮ ತೆಗೆದುಕೊಳ್ಳುವುದಾಗಿಯೂ ಎಚ್ಚರಿಸಿದ್ದಾರೆ.