ಕಾಡಾನೆ ದಾಳಿ: ಫಸಲು ನಾಶ

ಸುಂಟಿಕೊಪ್ಪ: ಈರಳೆವಳಮುಡಿ ಗ್ರಾಮದ ತೋಟಕ್ಕೆ ನುಗ್ಗಿದ್ದ ಕಾಡಾನೆ ಹಿಂಡು ಅಪಾರ ಪ್ರಮಾಣದ ಫಸಲಿಗೆ ನಷ್ಟ ಉಂಟುಮಾಡಿವೆ.

ಗ್ರಾಮದ ಬಿ.ಕೆ.ಪದ್ಮಿನಿ ಎಂಬುವವರ ತೋಟಕ್ಕೆ ಮಧ್ಯರಾತ್ರಿ ವೇಳೆ ಆಹಾರ ಅರಸಿ ಆಗಮಿಸಿದ್ದ ಕಾಡಾನೆಗಳು, ಅಪಾರ ಪ್ರಮಾಣದ ಕೃಷಿ ಫಸಲನ್ನು ಧ್ವಂಸಗೊಳಿಸಿವೆ.

ಬಿ.ಕೆ.ಪದ್ಮಿನಿ ಅವರಿಗೆ ಸೇರಿದ 10 ಎಕರೆ ಜಾಗದಲ್ಲಿದ್ದ ಕಾಫಿ, ಅಡಕೆ ಸಿಲ್ವರ್‌ ಗಿಡ ಬೆಳೆಸಲಾಗಿತ್ತು. ಫಸಲು ಸೇರಿದಂತೆ ಪಂಪ್‌ಸೆಟ್‌ ಅನ್ನು ತುಳಿದು ನಾಶಗಳಿಸಿದ್ದು ಲಕ್ಷಾಂತರ ರೂ. ನಷ್ಟ ಸಂಭವಿಸಿದೆ ಎಂದು ತೋಟದ ಮಾಲೀಕರು ಅರಣ್ಯ ಇಲಾಖೆಯವರಿಗೆ ದೂರು ನೀಡಿದ್ದಾರೆ.

ಕಾಡಾನೆಗಳ ಹಿಂಡು ತೋಟದಲ್ಲಿ ವಾಸ್ತವ್ಯ ಹೂಡಿದ್ದು , ಕೆಲಸಕ್ಕೆ ಬರುವ ಕಾರ್ಮಿಕರು, ಶಾಲಾ ಮಕ್ಕಳು ಸೇರಿದಂತೆ ಸಾರ್ವಜನಿಕರು ಭಯಗೊಂಡಿದ್ದಾರೆ. ಈ ಭಾಗದಲ್ಲಿ ನಿರಂತರವಾಗಿ ಕಾಡಾನೆಗಳು ಕೃಷಿ ಫಸಲನ್ನು ತಿಂದು, ಧ್ವಂಸಗೊಳಿಸುತ್ತಿವೆ ಎಂದು ಕೃಷಿಕರು ಪತ್ರಿಕೆಯಲ್ಲಿ ತಮ್ಮ ಆಳಲನ್ನು ತೋಡಿಕೊಂಡಿದ್ದಾರೆ.