ತೆಪ್ಪ ಮಗುಚಿ ಯುವಕ ನೀರುಪಾಲು

ಸುಂಟಿಕೊಪ್ಪ

ಹಾರಂಗಿ ಹಿನ್ನೀರನ್ನು ದಾಟುತ್ತಿದ್ದ ವೇಳೆ ತೆಪ್ಪ ಮುಳುಗಿದ ಪರಿಣಾಮ ಯುವಕರೊಬ್ಬರು ಮೃತಪಟ್ಟಿದ್ದಾರೆ.

ಸೋಮವಾರಪೇಟೆ ತಾಲೂಕು ನಾಕೂರು ಶಿರಂಗಾಲ ಗ್ರಾಮದ ಎ.ಪಿ.ವಿಶ್ವನಾಥ ಎಂಬುವವರ ಮಗ ಎ.ವಿ.ವಿಜಿತ್‌(26) ಮೃತರು.

ನಾಕೂರು ಶಿರಂಗಾಲ ಗ್ರಾಮ ಪಂಚಾಯಿತಿಯ ವ್ಯಾಪ್ತಿಯ ಈಶ್ವರ ದೇವಾಲಯದ ಮುಂಭಾಗದಲ್ಲಿ ಹಾರಂಗಿ ಹಿನ್ನೀರು ಹರಿಯುತ್ತಿದ್ದು, ಆಚೆ ದಡದ ನಿವಾಸಿಗಳು ಮತ್ತೊಂದು ದಂಡೆಯ ಕಡೆಗೆ ಹೋಗಿ ಬರುವುದಕ್ಕೆ ತೆಪ್ಪವನ್ನು ಅವಲಂಬಿಸಿದ್ದಾರೆ. ಅದೇ ರೀತಿ ವಿಜಿತ್‌ ಅ.15ರಂದು ಬೆಳಗ್ಗೆ ಮನೆಯಿಂದ ಕೆಲಸದ ನಿಮಿತ್ತ ಕಾನ್‌ ಬೈಲ್‌ ಗ್ರಾಮ ಪಂಚಾಯಿತಿಗೆ ಏಕಾಂಗಿಯಾಗಿ ತೆಪ್ಪದಲ್ಲಿ ಬರುತ್ತಿದ್ದ ಸಂದರ್ಭ ಹಿನ್ನೀರಿನ ಮಧ್ಯಭಾಗದಲ್ಲಿ ತೆಪ್ಪ ನಿಯಂತ್ರಣ ತಪ್ಪಿ ಮಗುಚಿಕೊಂಡ ಪರಿಣಾಮ ಮುಳುಗಿ ಮೃತಪಟ್ಟಿದ್ದಾರೆ ಎಂದು ಗ್ರಾಮಸ್ಥರು ತಿಳಿಸಿದ್ದಾರೆ.

ಬುಧವಾರ ಬೆಳಗ್ಗೆ ಘಟನೆ ನಡೆದ ಅನತಿ ದೂರದಲ್ಲಿ ಮೃತದೇಹ ಪತ್ತೆಯಾಗಿದೆ. ಸುಂಟಿಕೊಪ್ಪ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.