ಎಸಿಬಿ ಬಲೆಗೆ ಬಿಸಿಎಂ ತಾಲೂಕು ವಿಸ್ತರಣಾಧಿಕಾರಿ!

ಕೋಲಾರ: ನೀರು ಪೂರೈಕೆದಾರನಿಂದ 18 ಸಾವಿರ ಲಂಚ ಸ್ವೀಕರಿಸುತ್ತಿದ್ದ ವೇಳೆ ಹಿಂದುಳಿದ ವರ್ಗಗಳ ಕಲ್ಯಾಣ ಲಾಖೆಯ ತಾಲೂಕು ವಿಸ್ತರಣಾಧಿಕಾರಿ ಕಚೇರಿಯಲ್ಲೇ ಎಸಿಬಿ ಬಲೆಗೆ ಬಿದ್ದಿರುವ ಘಟನೆ ಗುರುವಾರ ನಡೆದಿದೆ.

ಹಿಂದುಳಿದ ವರ್ಗಗಳ ಕಲ್ಯಾಣ ಇಲಾಖೆಯ ತಾಲೂಕು ವಿಸ್ತರಣಾಧಿಕಾರಿ ವಿ.ಮಂಜುನಾಥ್‌ ಎಸಿಬಿ ಬಲೆಗೆ ಬಿದ್ದವರಾಗಿದ್ದು, ಹಾಸ್ಟೆಲ್‌ಗಳಿಗೆ ನೀರು ಪೂರೈಕೆ ಮಾಡಿದ್ದ ಖಾಸಗಿ ನೀರು ಪೂರೈಕೆದಾರ ಕನಕನಪಾಳ್ಯ ವಾಸಿ ಮಂಜುನಾಥ್‌ ಅವರ 6 ತಿಂಗಳ 65,000 ಬಿಲ್‌ ಬಾಕಿಗೆ 18000ರೂ ಲಂಚದ ಬೇಡಿಕೆ ಇಟ್ಟಿದ್ದರು.

ಅಂತೆಯೇ ಗುರುವಾರದಂದು 18000 ರೂ.ಗಳೊಂದಿಗೆ ನೀರು ಪೂರೈಕೆದಾರ ಮಂಜುನಾಥ್‌ ಕಚೇರಿಗೆ ಹೋಗಿ ಹಣ ನೀಡಲು ಮುಂದಾಗಿದ್ದಾರೆ. ಆ ವೇಳೆಗೆ ಎಸಿಬಿ ಅಧಿಕಾರಿಗಳು ದಾಳಿ ನಡೆಸಿ ಅಧಿಕಾರಿಯನ್ನು ವಶಕ್ಕೆ ಪಡೆದುಕೊಂಡಿದ್ದಾರೆ.

ದಾಳಿಯಲ್ಲಿ ಎಸಿಬಿ ಡಿವೈಎಸ್ಪಿ ಎಂ.ಪುರುಷೋತ್ತಮ್‌, ಇನ್ಸ್‌ಪೆಕ್ಟರ್‌ ಜಿ.ಎನ್‌.ವೆಂಕಟಾಚಲಪತಿ ಮತ್ತಿತರರು ಉಪಸ್ಥಿತರಿದ್ದರು.