ಮೂರು ದಿನದ ಒಳಗೆ ಕೇಂದ್ರದಿಂದ ನೆರೆ ಪರಿಹಾರ: ಬಿಜೆಪಿ ಸಂಸದ

ಕೋಲಾರ: ಉತ್ತರ ಕರ್ನಾಟಕಕದ ನೆರೆ ಸಂತ್ರಸ್ತ ಪ್ರತಿ ಜಿಲ್ಲೆಗೂ ಈಗಾಗಲೇ ರಾಜ್ಯ ಸರಕಾರದಿಂದ 50-100 ಕೋಟಿ ರೂಪಾಯಿ ಪರಿಹಾರ ನೀಡಲಾಗಿದ್ದು, ಕೇಂದ್ರ ಸರಕಾರದಿಂದಲೂ 3 ದಿನಗಳ ಒಳಗೆ ಪರಿಹಾರದ ಹಣ ಬರಲಿದೆ ಎಂದು ಸಂಸದ ಎಸ್‌ ಮುನಿಸ್ವಾಮಿ ಹೇಳಿದರು.

ನಗರದಲ್ಲಿ ಬುಧವಾರ ಸುದ್ದಿಗಾರರೊಂದಿಗೆ ಮಾತನಾಡಿ, ರಾಜ್ಯ ಸರಕಾರದಿಂದ ಸಾಕಷ್ಟು ಕಡೆ ಈಗಾಗಲೇ ಸಚಿವರನ್ನು ಕರೆದುಕೊಂಡು ಹೋಗಿ ಪ್ರತಿ ಜಿಲ್ಲೆಗೂ 50-100 ಕೋಟಿ ನೀಡಲಾಗಿದೆ. ಜಿಲ್ಲಾಧಿಕಾರಿಗಳ ಬಳಿ ಮಾಹಿತಿಯೂ ಇದೆ ಎಂದವರು ವಿವರಿಸಿದರು.

ಉತ್ತರ ಕರ್ನಾಟಕದ ನೆರೆ ಪರಿಹಾರಕ್ಕೆ ಕೇಂದ್ರ ಸರಕಾರ ಯಾವುದೇ ಹಣ ಬಿಡುಗಡೆ ಮಾಡಿಲ್ಲ ಎಂಬ ಆರೋಪಗಳು ತೀವ್ರ ಸ್ವರೂಪ ಪಡೆದುಕೊಂಡಿರುವ ಹೊತ್ತಲ್ಲಿ ಅವರು ಈ ಹೇಳಿಕೆ ನೀಡಿದ್ದಾರೆ.

ಕೇಂದ್ರದವರು ಸಮೀಕ್ಷೆ ನಡೆಸಿ, ಪಡೆದುಕೊಂಡಿರುವ ವರದಿ ಆಧರಿಸಿ 2-3 ದಿನಗಳಲ್ಲಿ ನೆರೆ ಸಂತ್ರಸ್ತರಿಗೆ ಪರಿಹಾರದ ಹಣ ಸಿಗಲಿದೆ. ಆ ಕುರಿತಾಗಿ ನಿರ್ಮಲಾ ಸೀತಾರಾಮನ್‌ ಅವರು ಭರವಸೆ ನೀಡಿದ್ದಾರೆ. ರಾಜ್ಯದ ಜನರನ್ನು ನಾವು ಎಂದಿಗೂ ಬಿಟ್ಟುಕೊಡುವುದಿಲ್ಲ. 25 ಸಂಸದರೂ ಒಗ್ಗಟ್ಟಾಗಿದ್ದೇವೆ. ರಾಜ್ಯ ಸರಕಾರವು ಪಕ್ಷಾತೀತ, ಜಾತ್ಯತೀತವಾಗಿ ಪರಿಹಾರ ಕಲ್ಪಿಸುತ್ತದೆ ಎಂದು ಹೇಳಿದರು.

ಯಡಿಯೂರಪ್ಪ ಅವರನ್ನು ಡಮ್ಮಿ ಮಾಡುವ ಪ್ರಶ್ನೆಯಿಲ್ಲ. ಈ ವಯಸ್ಸಿನಲ್ಲಿಯೂ ಕಾಲಿಗೆ ಚಕ್ರ ಕಟ್ಟಿಕೊಂಡು ಅವರು ಓಡಾಡುತ್ತಿದ್ದಾರೆ. ನಾವೂ ಸಹ ಸತತ ಪ್ರಯತ್ನ ಮಾಡುತ್ತಿದ್ದು, ಪರಿಹಾರ ಬಂದೇ ಬರುತ್ತದೆ. ಅನುಮಾನವೇ ಇಲ್ಲ ಎಂದು ಅವರು ಮಾಹಿತಿ ನೀಡಿದರು.

ಮುನಿಸ್ವಾಮಿಗೆ ನೇರವಾಗಿ ಬೆಂಬಲ ನೀಡಿದ್ದೆ

ಶಾಸಕ ಕೆ. ಶ್ರೀನಿವಾಸಗೌಡ ಮಾತನಾಡಿ, ಕಳೆದ ಲೋಕಸಭೆ ಚುನಾವಣೆಯಲ್ಲಿ ಕಾಂಗ್ರೆಸ್‌ ಸೋಲಿಗೆ ಜೆಡಿಎಸ್‌ ಕಾರಣ ಎಂದು ಸತ್ಯಶೋಧನಾ ಸಮಿತಿ ವರದಿಯಲ್ಲಿ ಬಂದಿರುವುದು ನಿಜ. ನಾನೂ ಸಹ ನೇರವಾಗಿ ಎಸ್‌. ಮುನಿಸ್ವಾಮಿಗೆ ಬೆಂಬಲ ನೀಡಿದ್ದೆ. ವಿಧಾನಸಭೆ ಚುನಾವಣೆಯಲ್ಲಿ ನನಗೆ ತೊಂದರೆ ಮಾಡಿದವರಿಗೆ ಅವರ ಚುನಾವಣೆಯಲ್ಲಿ ನಾನು ಯಾಕೆ ಸಹಾಯ ಮಾಡಲಿ ಎಂದು ಕೆ.ಎಚ್‌. ಮುನಿಯಪ್ಪ ವಿರುದ್ಧ ಕಿಡಿಕಾರಿದರು.

ಮೈತ್ರಿ ವಿಚಾರ ನನಗೆ ಸಂಬಂಧಿಸಿದ್ದಲ್ಲ. ದೇವೇಗೌಡರನ್ನು ಕೇಳಿಕೊಳ್ಳಿ. ರಾಜಕಾರಣ ವ್ಯತ್ಯಾಸಗಳಾಗಿತ್ತು, ಕೆ.ಎಚ್‌. ವಿರುದ್ಧ ಎದ್ದಿದ್ದ ಅಲೆಯೇ ಅವರ ಸೋಲಿಗೆ ಕಾರಣವಾಗಿದೆ ಎಂದರು.

ನೆರೆ ಹಾವಳಿಗೆ ಯಾವುದೇ ಸರಕಾರವೂ ಅಗತ್ಯವಾಗಿ ಕ್ರಮವಹಿಸಿ, ಕಾರ್ಯಕ್ರಮಗಳನ್ನು ಮಾಡಬೇಕು. ಸರಕಾರವೇ ಇನ್ನೂ ಪೂರ್ತಿಯಾಗಿಲ್ಲ. ಹೀಗಾಗಿ ಸ್ವಲ್ಪ ತಡವಾಗಿದೆ. ಸ್ಪಷ್ಟ ಬಹುಮತವಿಲ್ಲ, 17 ಮಂದಿಯನ್ನು ಕರೆದುಕೊಂಡು ಅದೂ ಗೊಂದಲಗಳಲ್ಲಿರುವುದರಿಂದ ಸಮಸ್ಯೆಗಳು ಜಾಸ್ತಿ ಇವೆ. ಬಿಜೆಪಿಯವರು ನೆರೆ ಪರಿಹಾರಕ್ಕಾಗಿ ಎಲ್ಲ ಪ್ರಯತ್ನಗಳನ್ನು ಮಾಡುತ್ತಿದ್ದಾರೆ, ಬೇಗನೆ ನೀಡಲಿ ಎಂದು ಆಶಿಸುವುದಾಗಿ ಹೇಳಿದರು.